Ancje chest an il plat dai “grancj” de musiche furlane, che a presentaran al “Palamostre” i lôr ultins lavôrs, al è une vore siôr. Si tache cun
Francis and the Phantoms,
vincitôrs de edizion stade dal Premi Friûl, che a presentin il lôr prin album segnât di sunôrs che nus rimandin ae miôr tradizion new wave dai agns ‘80 e dai tescj neris e visionaris di Checo Tam, alias “Francis”.
Di dut un altri stamp e sarà la esibizion di
Loris Vescovo e Caia Grimaz
che a presentin il progjet Cjantâ Vilotis: une produzion che e propon une rileture di cjantis tradizionâls de aree ladine (furlane, dolomitane e grisone) fate di un grup di musiciscj che si son dâts dongje ator de vôs di Antonella Ruggiero.
I Fîl&Fiar
e il lôr CD Platimi, cul lôr sunôr rock alternatîf, agressîf e diret, e cui tescj poetics di Massimo Govetto, a son une des propuestis plui frescjis e plui gnovis de musiche furlane dal dì di vuê.
Par finî o cjatìn I Turcs tal Friûl: l’ultin lavôr dal cjantautôr cjargnel Luigi Maieron
che al propon sot forme di teatri – cjançon cheste opare teatrâl zovanîl di Pier Paolo Pasolini.
Tes setemanis stadis un osservatori di gjornaliscj al à scoltât dutis lis gnovis jessudis discografichis furlanis e al à selezionât lis propuestis segnaladis chi disore. Une di lôr e sarà premiade intant de manifestazion cu la Targhe Deganutti: il ricognossiment consegnât ai autôrs dal disc plui significatîf dal an.
Par chel che al rivuarde, invezit, lis novitâts proponudis dal Premi Friûl, a testemoneâ la vivarositât de lenghe furlane, ancje chest an si cjatìn denant di une grande varietât di gjenars musicâi proponûts di grups che a rivin un pôc di dut il Friûl: de Cjargne al Gurizan, de Alte dal Friûl ocidentâl ae Basse furlane.

(H)USBAU, MIG 29 OVER DISNEYLAND, ZARKUS, ORCHESTRA CORTILE, ELEONORA CEDARO, HAMIT: a son i sîs grups in concors che a son stâts selezionâts framieç di passe trente propuestis ineditis. Un di lôr al sarà premiât cu la produzion e la promozion di un cd publicât de etichete “Musiche Furlane Fuarte”.
La manifestazion, al è just ricuardâlu, e je la uniche dal so gjenar framieç des comunitâts minorizadis che a vivin intal stât talian.