Motîfs di riflession tor la famee

… @ Buri – Udin

Il progjet SPAC e presente inte biele suaze de Vile Di Toppo Florio in vie Morpurgo 8 a Buri (UD), ae 19.30 di cheste sabide 01 di Març 2014, la mostre di arts visivis “Motivi di Famiglia” pe cure di Paoli Toffolutti. I zovins artiscj che a cjaparan part inte mostre a ciraran di frontâ il teme dal mudament de famee partint da chê patriarcâl par rivâ a chê fate di une sole persone, scrusignant il significât dai rûi di pari, mari e fi dentri di un gnûf concet di famee in cercje di dirits par lis cubiis di fat, i matrimonis jenfri lis cubiis dal stes gjenar e fintremai une comunitât slargjade, di fat une detule in Afriche e dîs che par fâ cressi ben un frut e covente dut il paîs. Aes 18.00, prin de scree de mostre, e sarà fate une babade sul teme cun diviersis personis, tant che, aes 20.00 e sarà un moment dedeât al bal contemporani cun la partecipazion dal trop Etoil3. Ae 20.30 si podarà viodi la mostre indulà si cjatin 125 oparis fatis da ben 45 artiscj, e daspò, par finî in bielece la serade, al sarà un licôf.
La mostre e larà indenant fin al 30 di Març 2014 e si podarà viodi intal orari sabide 16.00 – 19.00 , domenie 11.00-13.00, 16.00-19.00.
O sperìn che un teme cetant delicât e sedi frontât e disvilupât presentant ducj i ponts di viste par vie che dome cussì e vignarà stiçat un dibatiment culturâl cence prejudizis e une vore positîf pe dute le comunitât.
Mandi a ducj !

😎