… Istitût Bearzi di Udin
Domenie passade a si è concludût il cors di patinaç corse, li dal centri Bearzi di Udin, tignût dal istrutôr Paoli Bomben dal trop skating Comine di Pordenon, un patinadôr cetant bulo che nus à mostrât la tecniche juste par cori cun i patins.
Un graciis a Carla dal trop inlineskateschool di Udin par vê inmaneât un cors cetant istrutîf.
Mandi a ducj !
… progjets di ristruturazion
Li dal munistîr di S.Marie in Val si puedin viodi, dal 6 di Avrîl fin ai 18 di Mai 2014, i progjets par meti a gnûf la stazion viele dai trens di Cividât. Di fat il Comun al à pensât ben di mostrânus cemût che a vignarà il gnûf museu de Prime Vuere Mondiâl. E za la stazion e deventarà un museu, ma ce che nus covente un museu de vuere mondiâl a Cividât ❓
No son za cetancj ator? E la int no varès miôr lâ a viodi i puescj indulà che si à combatût fasintsi une biele cjaminade pluitost che sta sierade intun museu?
Pussibil che dinissun e vedi vude une idee un pôc plui origjinâl e pratiche?
La mê idee e sarès chê di ristruturâ la viele stazion dai trens fasint une palestre par rimpinâsi che e podarès restâ vierte ducj i dîs de setemane e puartâ chenti cetante int stant che culì dongje no a’nd è. Ce pensaiso di cheste idee? O pûr volêso proponi voaltris alc di diviers ?
😎
… il leam cun lis nestris lidrîs
Il 3 di Avrîl dal 1077, co il patriarcje di Aquilee Sigjeart di Tengling al ricêf a Pavie la investidure feudâl bande di Indrì IV, al nas il Stât Patriarcjâl furlan, ven a stai la Patrie dal Friûl, une istituzion che e larà indenant fintremai il XVIII secul. Il stât feudâl, une vore plui grant dal Friûl di vuê, tal imprin al jere vuidât dai patriarcjis di divignince todescje e a darà cetant lustri ae nestre tiere tant di fâle deventâ un pont di riferiment economic, politic e culturâl a nivel european. Il pês che e veve la Patrie i à permetût ai patriarcjis di no interessâsi di papis e rês. Di fat Ricart Cûr di Leon chenti al è stât fat presonîr di Gofrêt, tant che al cirive di tornâ viers cjase, di li si dîs che e sedi nassude le conte di Robin Hood.
Si che duncje, cul fat che il patriarcje Sigjeart tal 1077 nol jere plui dome vescul ma ancje cont, e scomence la storie dal Stât indipendent furlan de Ete di Mieç.
Dal 1077 indenant, il Friûl al è un Stât tant indipendent che al à parfin un parlament. Nô o vin i documents di une riunion dal parlament furlan vincj agns prin di chel che i storics talians e inglês a disin che al è il parlament inglês. Dal 1200 nô o vevin za il parlament, ma il nestri nol jere come chel inglês. Chel al veve une sole funzion: che il re nol podeve imponi une tasse e tirâle, cence che i siôrs si metessin dacuardi su cui che al veve di paiale. Nuie altri!
Culì no; culì, intant, il patriarcje al è dome il president e al è obleât a ubidî a ce che il parlament al decît. Seconde robe: tal nestri parlament no son dentri dome siôrs, ma a son ancje lis libaris comunitâts, i comuns, come Udin, Glemone e Cividât. Tierce robe: nissun al po tignî un esercit cence il permès dal parlament.
Il parlament furlan tacât in che epoche li e larâ indenant fintremai tal 1420.
Cumò, daspò 937 agns, in Friûl si fâs fieste par ricuardâ lis nestris lidris…
Fuarce Friûl, simpri !
😎
… ma ogjet no identificât
Cjalant la foto fate a un cjamp di raviçon o ai viodût une robe intal cîl che nol è un avion e nancje un uciel ma e somee a un disc svolant. Co o ai fate la foto o jeri tant cjapât dal smicjâ lis rosiz zalis che no mi soi acuart dal disc se di no o varès provât a fâ un zoom par cirî di viodi di plui dongje ce che al jere, magari cussì no.
Salacor al jere propit un ufo…
😎
Questo sito gestisce tutti i dati trattati nel rispetto del Regolamento europeo noto come GDPR che riguarda il trattamento e la libera circolazione dei dati personali, inoltre utilizza i dati al solo fine di fornire i servizi richiesti. I cookie ci aiutano a fornire i nostri servizi. Utilizzando tali servizi, accetti l'utilizzo dei cookie da parte nostra. Nessun dato trattato è fornito a terze parti.
Privacy Policy OK !