…la mont des cjavris… 🐐
Vuê o ai fate une biele cjaminade in Val Rosandra rivant fin in cime ae Mont Stena… D+ 250m – 12 km … di là sù il panorame sul mâr e su dute la valade al jere spetacolâr… ma e tirave une biele buerate… cjavris no lis ai viodudis ma ben i cenglârs platâts daûr dai baraçs e cuant che mi àn sintût rivâ, par fortune, a son scjampâts vie di corse e o ai fat juste in timp a viodi che al jere un biel trop…🐗
Buinis cjaminadis a ducj !!!
#peaceandlove 💙
☮ − ☯ − ☵ − ☸ − 🌍
…setôr Eremo
Vint pôc timp o soi lât a fâ un zîr lì de biele glesiute di Sant Michêl a Braulins par dâ un cuc ae crete… achì lis viis a son une vore penzis in particolâr chês a drete de glesiute… di fat “La saggezza e la pazzia” , “Tazormania” e “Progetto Asteryx” 8a/+ a son viis par int come Chen… “Mungitopo” 8a, “Pompamagna” e “Pink Eremo” 7c+ ancje chestis a son viis fatis dome dai climber plui fuarts… jo o ai fate dome une vie a çampe de glesiute e mi visi di vê fat un grum di fadure a sierâle ancje par vie de crete che e je une vore abrasive e e domande une buine tecniche di pîts… po dopo o ai viodût che de ultime volte che o jeri stât a son stadis vierzudis gnovis viis insom a drete, simpri de glesiute, indulà il cret al è stât dut netât e a son stadis spitadis des bielis e lungjis viis e culchiduna ancje sù bielis cjanis… un spetacul maraveôs che mi à jemplât il cûr di gjonde… un graciis di cûr a ducj chei che a àn fat chest biel lavôr… good job, guys !!!
In sumis un cret bielonon ma che al domande une buine tecniche e tante benze, par la cuâl
…climb hard or stay home…
Buinis cjaminadis a ducj !!!
Cjale il filmut 🎥 . . .
#peaceandlove 💙
☮ − ☯ − ☵ − ☸ − 🌍
. . . e Lâcs di Fusinis
Parcade, prin des dîs, la machine lì dal lâc disore o ai cjolt la strade biele largje e dute cuvierte di nêf batude che e va sù fin al ripâr Zacchi… dilunc lis voltis indaûr o ai cjatât cetante int che e lave sù a pîts, cun i schîs o cun lis slitis, di fat cheste bariglarie e à une pendence cuasi simpri dolce e e je lungje plui di 5 km par la cuâl vignî jù cun i schîs al è un biel svagament… rivât al ripâr Zacchi, plen di int, o soi lât sù ancjemò un toc dilunc il troi CAI 512 che al va indenant fin ae beorcje indulà lant par il 512/a si rive lì de La Porticina, tant che svoltant a çampe si torne jù rivant al lât disot… dopo vê gustât inte biele boschete in sante pâs o soi tornât indaûr saludant la Ponza tant biele… rivât al parcament daspò une piçule polse, stant la biele zornade soreglade, o soi lât a fâ ancje il zîr ator dai lâcs tant biei, il prin cuasi dut inglaçât e il secont, chel inferiôr, cetant biel cun il riflès dai nui inte aghe… cussì o ai sierât il zîr in cheste zornade spetacular tacade cun la fumate e finide cun il soreli… D+ 550 – 16km …
Buinis cjaminadis a ducj !!!
#peaceandlove 💙
☮ − ☯ − ☵ − ☸ − 🌍
…dilunc il troi des cjasutis bielis
Vuê o vin fate une biele cjaminade simpri inte boschete milenarie di Tarvis ma cheste volte o sin lâts in Val Bartolo cjapant prin il troi CAI 509 e po dopo lant sù drets fin al confin di stât cun l’Austrie, indulà si cjate la tabele “Achtung Staatsgrenze”… une spassizade une vore biele cuntune pendence dolce e che e passe intune valade indulà si puedin viodi tantis bielis cjasutis di len e indulà si cjate ancje la crete par lâ a rimpinâsi… e cuant che si torne indaûr e je la Baita di Beatrice che us da bon acet cuntune buine birute… il disnivel al è di 400 m e si fasin 14 km a/r che intune zornade biele come cheste propit no si sintin…🗻🌞🗻
Un biel cîl turchin
sul cjâf cence nûi
nêf glaçade si disfe
Buinis cjaminadis a ducj !!!
#peaceandlove 💙
☮ − ☯ − ☵ − ☸ − 🌍
Une poesie dedeade ae mont furlane…
Cjaminant
Jenfri i glaçs, i sdrups e lis cretis eternis
Si rimpine la mê ment e il gno cuarp
Intal cinidôr de mont, inte urne
De Nature, indulà ogni robe e je ancjemò.O scolti la vôs dal aiar, ch’e sofle
Tra i pâs sù la crete, e mi puarte
In chest viaç interiôr, indulà ogni robe
al à un sens, un significât e une lûs.E intant che o cjamini, il gno cûr ad alt
cun la cime, si lasse lâ intun inzirli
dal infinît, e i miei pinsîrs a svolin
tant che uciei, viers orizonts lontans.E o sint il pês dai miei ingòs, des mês pôris
sfantâsi, intal cinidôr di chei lûcs imens
E mi visi che la fuarce de Nature
e je la fuarce dal Om, e che nô o sin part di jê.Biel inalore il plasè di cjaminâ,
Di sintîsi vîfs, intun mont imens,
Di preseâ la bielece de mont,
des nestris Alps in ogni moment.
Buinis cjaminadis a ducj !!!
. . . Cjale il filmut 🎥 . . .
#peaceandlove 💙
☮ − ☯ − ☵ − ☸ − 🌍
…WELCOME 2023 !!!
I wish you all a HAPPY NEW YEAR 2023 !!!!!
Nô furlans o vin a cûr il nestri biel Friûl e o domandin, in chest inizi di an 2023, che finalmentri la regjon fvg e podedi clamâsi Friûl e vonde… di plui o varessin gust che la nestre biele lenghe furlane e deventi lenghe veicolâr inte scuelis di ogni ordin e grât… biadelore… #fuarceFriûl simpri . . .
E cumò une riflession che e ven de savietât dal Orient lontan:
“La ativitât dai umign e va indenant cence padin; co che e rive ae fin e torne di gnûf a scomençâ. Duncje e pues lâ indenant in perpetui. Cuant che une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co che la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co che i umign savis a stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”
Mandi a ducj !!!
#peaceandlove ☮ 💙 ☯
a ducj !!!
#BonAnGnûf2023
on Instagram
☮ − ☯ − ☵ − ☸ − 🌍
… e i piçui zupets che a cjapin il soreli dilunc dal troi . . .
Daspò vê parcade la machine insom de vie Sottomonte a Glemone si cjape la vie mont Glemine indulà si cjate il biel lavadôr di pôc timp fat sù come ch’al jere une volte e cjalant ad alt si viôt come un puint in piere parsore de galarie e chel cuant ch’al plûf e je la pissande dal Glemine, pôc plui indenat cjalait ben a cjampe par cjoli il troi ch’al va sù dongje de galarie e di lì lait par la strade turistiche e dopo 100 m al tache il troi CAI 716 ch’al puarte sul Cuarnan… rivâts ad une crosere si cjate la tabele par lâ sul Glemine… di chì indenant il troi al è un spetacul par vie dal panorane che nus lasse gjoldi sul Tiliment, su Glemone, su la mont Brancot e v.i. di plui in cheste zornade maraveose cuntun cîl celest cence nancje un nûl e un soreli ch’al scjaldave ben si podevin viodi a svolâ chei cun il “parapendio”… rivâts li de anconute faseit atenzion, stant che nol è segnalât ben, a cjapâ il troi che si cjate daûr de anconute e di lì in dîs minûts si rive in cime dal Glemine ( 721 m )… indulà che si cjate une biele crôs fate cun dai tubos taronts… di chì si puedin viodi il Cuarnan, il Cjampon, il Simeon e v i. insome une zornade bielonone par lâ a fâ une cjaminade par la mont furlane…
Buinis cjaminadis a ducj… mandi…
:: peace ::
z morje na Krasu
Une biele cjaminade jenfri mâr e Cjars dilunc il Troi de Salvie partint di Aurisina e rivant a Sante Crôs indulà che si cjate, in vie dal Pucino, la biele crete par lâ a rimpinâsi…
Buinis cjaminadis a ducj… mandi !!! 🙋
L’urli di piere…
Cheste Istât 2022 si siere cun il bot dilunc il troi CAI353 che mi à puartât a lì dal Cjampanili di Val Montanaia e al ripâr Perugini… une cjaminade une vore preseade che si scugne fâ almancul une volte inte vite e che ducj chei che a son passionâts di montagne a àn fate ancje plui di une volte… lant sù dilunc il canalon, indulà ch’al côr il riu Val Montanaia, si è contornâts de biele crete des Dolomiti Furlanis e biel prest si tache a viodi il Cjampanili, che si fâs un tic bramâ par vie che al mancje ancjemò un biel toc prin di rivâ lì dal ripâr Perugini… ma cuant che si rive lì de boschete si pues biel za viodilu in dute la so bielece e jo o ai pensât a tropis voltis che Mauro Corona al è lât a rimpinâsi sù chê biele crete e a cetant bulo che al è stât… di fat e je une parêt grandonone e une vore alte e par fâle e covente une buine preparazion sedi fisiche, che tecniche, che mentâl… fate la ultime fadure e rivâts lì dal prât si cjatâsi intun cjadin cenglât des cretis… la Croda Cimoliana, il Campanile Pordenone, la Cima Meluzzo, la Cima Rosina e v.i. e vint voie si pues lâ sù fintremai ae Forcella Montanaia… il timp al jere biel ancje se, la sù, la buere frede si faseve sintì… fatis lis fotos ancje ae biele parêt nord o soi tornât indaûr fin lì dal parcament dongje dal Ripâr Pordenon… par lâ e tornâ mi son ladis plui o mancul 4 oris e il disnivel fat al è stât D+ 850 m… in some, une biele cjaminade impegnative ma ripaiade de bielece dal Cjampanili di Val Montanaia…
Buinis cjaminadis a ducj !!!
cjaminant in Cjanâl da la Aupe…
…dal parcament, (COORD 46.47630 , 13.18496 ), si cjape il troi CAI 437 che al puarte al ripâr Grauçarie… il troi si disvilupe par 2,6 km cuntun D+ di 561 m e al passe prin intun biel bosc e plui adalt si cjamine sui claps cun tancj cjanâi che a vegnin jù da la mont che cuant che al plûf a puartin jù des veris e propis lavinis di aghe… lis tabelis che o viodeis dilunc chest toc di troi a son stadis metudis par memorâ lis personis muartis par jessi stadis cjapadis de plene de aghe, par la cuâl prin di fâ cheste cjaminade al è miôr jessi sigûrs ch’al timp al sedi biel… di plui bisugne vê des buinis gjambis stant che il troi al tire sù ben… rivâts li dal ripâr, ch’al è viert dal 2 di Jugn 2022, si cjate une biele fontane cun aghe frescje e lis panchis par sintâsi sedi di fûr che dentri e il bon acet dal gjestôr simpri pront a serviti alc di bon o une bocalete di aghe… fate une piçule polse si pues lâ indenant simpri par il CAI 437 fintremai al Foran da la Gjaline cuntune altre biele tirade in mieç de biele boschete e di li ciapant il troi CAI 419 si rive ae Forcje di Nuviernulis indulà si pues viodi la tor di Nuviernulis tant grande cun il diedri Bulfoni e la sô maestât dal Sernio cetant bielonone… fin chì a son 5 km e un D+ di 1128 m, ma no son robis che ti metin in dificoltât e salacor al è avonde puartâsi alc di bevi e di mangiâ… dae Forcje vint voie e buinis gjambis si pues lâ fin sù la mont Sernio… ma cheste e je une altre storie… mandi e buine cjaminade a ducj…
…WELCOME 2020 !
I wish all Climbers, Runners and Tai Chi practitioner all over the world a HAPPY NEW YEAR 2020 !!!!!
il proponiment, par chest an, al è chel di judâ chei che a fasin fadure a lâ indenant inte vite e di combati la tindince, dal dì di vuê, di meti dongje masse ricjece intes mans di pocje int, tant che si ledi viers dai mûts di convivence indulà la int e rive a cjatâ lavôr e a mantignî la famee…
la riflession impen e vên de savietât dal Orient lontan:
“La ativitât dai umign e va indenant cence padin; co e rive ae fin e torne di gnûf a scomençâ. Duncje e pues lâ indenant in perpetui. Cuant une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co i umign savis e stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”
Mandi a ducj !!!
#peaceandlove ☮ ☯
…WELCOME 2019 !
I wish all Climbers, Speed Skaters and Tai Chi practitioner all over the world a HAPPY NEW YEAR 2k19 !!!!!
il proponiment, par chest an, al è chel di judâ chei che a fasin fadure a lâ indenant inte vite e di combati la tindince, dal dì di vuê, di meti dongje masse ricjece intes mans di pocje int, tant che si ledi viers dai mûts di convivence indulà la int e rive a cjatâ lavôr e a mantignî la famee…
la riflession impen e vên de savietât dal Orient lontan:
“La ativitât dai umign e va indenant cence padin; co e rive ae fin e torne di gnûf a scomençâ. Duncje e pues lâ indenant in perpetui. Cuant une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co i umign savis e stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”
Mandi a ducj !!!
#peaceandlove ☮ ☯
…indulà rimpinâsi al è maravee
O sin rivâts ae fin dal an e al è timp di fâ un belanç ancje par webandana.com. Chest an i dâts no son chei di Google par vie che la leç sui cookies nus impedìs di doprâju. Inalore ve culì lis statistichis dal server:
visitadôrs unics: 166.251
lis pagjinis viodudis: 1.170.266
hits: 1.968.377
I rimpinadôrs che a an fat il Test inte sezion training a son stâts: 9500.
Ma butant il voli plui inlà dai numars, o vin di impensâsi che chest an a son stadis viertis gnovis viis inte biele crete di Vile Santine dongje Tumieç… che o vin scuviert, dongje il cret di Anduins, un puest maraveôs indulà lâ par stâ un pôc in pâs, ven a stai Cerdevol Curnila inte valade dal flum Arzin… che, l’organizazion dai climber in USA, Access Fund, e à comprât un teren indulà si cjate la falesie di Homestead in Arizona, risolvint cussì il probleme de responsabilitât intun teren privât… che la nestre propueste par sistemâ la viele stazion dai trens di Cividât, fasintle deventâ un climbing center, no je stade scoltade dai nestris sorestants che la an fate deventâ un museu de Prime Vuere Mondiâl, magari cussì no, ma nô o lin indenant cun il nestri biel progjet e sperin ben par l’avignì, prime o dopo a varan ben di stufâsi di che robe che a àn fate… che intant al vâ indenant il procès par la muart di Tito Traversa, 03 Lui 2013, e che il judiç al à domandât trê rinviaments a judizi ma no je indagade la persone che al à mitût dongie i imprescj, une robe che sune une vore strambe viodint che il principi secont il cuâl lis robis a varessin di jessi fatis cun la “diligjence dal bon pari di famee” al è un principi ae fonde dal nestri codiç civil… o soi sigûr di vê dismenteât cetantis altris robis… in ogni câs se voaltris o vês intal cjâf alc o podeis zontâle intai coments…
La comunitât di rimpinadôrs di webandana.com si cjate su Twitter con l’hastag #climbersFriuli, e i messaçs si viodin inte pagjine de ricercje su Twitter in timp reâl, e a puedin jessi doprâts tant che une chat jenfri di nô. Tant che su Facebook e je la pagjine webandana.com.
Cun il proposit di jessi simpri di plui a rimpinâsi intor pal mont o ai voie di ringraciâ di cûr ducj chei che nus an visitât.
MANDI A DUCJ E BON AN 2016 !!!
Simpri par gnovis emozions !!!
😎
…indulà rimpinâsi al è maravee
O sin rivâts ae fin dal an e al è timp di fâ un belanç ancje par webandana.com, inalore tachin cjalant i dâts di Google:
lis visitis a son stadis 29.505
i visitadôrs unics 21.186
lis pagjinis viodudis 134.489
I rimpinadôrs che a an fat il Test inte sezion training a son stâts: 8286.
Ma butant il voli plui inlà dai numars, o vin di impensâsi che chest an a son stadis viertis dôs bielis cretis in Friûl, ven a stai:
1- La crete dal Mont Stele, dongje Tarcint, indulà si cjatin une ventine di viis.
2- La crete dal Zardin dai Clapons, dongje Cjavaç, indulà a son une cuindisine di viis.
Il mês di Setembar al à viodût il cret de Cjargne e dal Glemonês protagonist dal meeting “Find your way” indulà tancj rimpinadôrs si son cjatâts ducj intune e indulà a jerin ancje Adam Ondra e Silvio Reffo. Adam, come par solit, al è rivât a maraveâ ducj viersint une gnove vie intal cret dal pas di Mont di Crôs.
E je stade fate une propueste par sistemâ la viele stazion dai trens di Cividât fasintle deventâ un climbing center ma… i nestris sorestants a vuelin fâle deventâ un museu de Prime Vuere Mondiâl, magari cussì no.
O sin daûr a pensâ di fâ in mut che si puedin viodi off-line lis pagjinis inte sezion de Falesie.
La comunitât di rimpinadôrs di webandana.com si cjate su Twitter con l’hastag #climbersFriuli. Tant che su Facebook e je la pagjine webandana.com.
Cun il proposit di jessi simpri di plui a rimpinâsi intor pal mont o ai voie di ringraciâ di cûr ducj chei che nus an visitât.
MANDI A DUCJ E BON AN 2015 !!!
Simpri par gnovis emozions !!!
😎
Questo sito gestisce tutti i dati trattati nel rispetto del Regolamento europeo noto come GDPR che riguarda il trattamento e la libera circolazione dei dati personali, inoltre utilizza i dati al solo fine di fornire i servizi richiesti. I cookie ci aiutano a fornire i nostri servizi. Utilizzando tali servizi, accetti l'utilizzo dei cookie da parte nostra. Nessun dato trattato è fornito a terze parti.
Privacy Policy OK !
