Tanti auguroncici

… a ti !!!

Fin culì, di rif o di raf, o soi rivât… inalore sperin di lâ indenant ben ancjemò par cualchi an… fasintsi fuarce simpri cuntune preiere…
savint che… o deventarai vieli… i respiri parsore…
savint che… o podarai inmalami… i respiri parsore…
savint che… o prin o dopo o varai di lâ ancie jo… i respiri parsore…
savint che… o pierdarai ducj i miei afiets plui cjârs… i respiri parsore…
savint che… o puartarai di là dome ce che o ai fat … i respiri parsore…
savint che… o ai voie di jessi simpri cussint … i respiri parsore…
savint che… o vuei il ben di ducj… i respiri parsore…
savint che… o saludarai simpri cuntun biel mandi… i respiri parsore…

Happy Birthday to you!

😎

No vin di vaî, ma dome di tornâ a fâ sù

chest al è stât il spirt di chês zornadis
al jere il 6 di Mai dal 1976 e il Friûl al vignive sdrumât dal taramot, tant che sot di chês ruvinis a jerin cuasi 1000 personis jenfri oms e fantats… ma la dì dopo e jere chenti cetante int pronte a dâ une man… alpins, oms dal esercit, volontaris clamâts adun des parochiis… a vignivin no dome de Italia ma ancje de Austrie, Gjermanie, Americhe… e modon su modon, piere su piere dut al è stât tirât sù di gnûf… dulà ca jerin, cemût ca jerin… daspò 41 agns nô furlans no dismenteìn chei moments e ducj chei che nus an judât… inalore ve culì une poesie dal poete furlan Leonardo Zanier…

L’ORCULAT

Oh se il teremot
al foss un orculat
ingiaulât salvan
fuarton e trist
bon di sdrumâ cence fadia
tors di glescias e storia
e di parâ in masceria’
bicocas e cjascjeî
e come un giôc di cjartas
i paisuts dai cjargnei…

Oh se il teremot
al foss un drâc
platât dismenteât
vivarôs e luscint
che sott via al va sgarfant
ora prescint
par fâ sprofondâ
citâts e marans
e ca e là a so caprici
las cjasas dai furlans

Oh se il teremot
al foss un mazzarot
pelôs grass
vuarp e bigot
ch’al va sdrondenant di nott
cjadenas sui tetts
e quant ch’hai peta
come scorias
las cjapa cun dôs mans
e ‘l para in fruçons
i paîs dai terons…

Massa biel
s’al foss cussì
il teremot
che alora bastaress
di âga santa un spargott
o di San Zorz il spiçott

poesie cjapade fûr de racuelte:
Sboradura e sanc, Nuova Guaraldi, Firenze, 1981

fuarce Friûl

BENVIGNÛT 2017

…WELCOME 2017 !

I WISH ALL CLIMBERS AND 0000 SPEED SKATERS 0000 ALL OVER THE WORLD A HAPPY NEW YEAR !!!!!

Chest an par me nol tache masse ben par vie che me mari si cjate in ospedâl e lis sôs condizions a son une vore griviis… il miedi nus à dite che a son dai organs une vore mal mitûts, par la cuâl no si sâ se rivarâ ad ore a lâ indenant… une mari cetant dolce e buine di cûr, che e à fat cetant par nô e cumò, gno fradi e jo, no podin fâ altri che stâi dongje il plui pussibil… mari me, cualsisei robe e sarà tu tu saràs simpri intal nestri cûr… tu sês la mari plui biele dal mont e ti vuei cetant ben…

O tacarai chest an 2017 cuntun proponiment e cuntune riflession.

Il proponiment al è chel di judâ chei che a fasin fadure a lâ indenant inte vite e di combati la tindince, dal dì di vuê, di meti dongje masse ricjece intes mans di pocje int, tant che si ledi viers dai mûts di convivence indulà la int e rive a cjatâ lavôr e a mantignî la famee.
La riflession impen e vên de savietât dal Orient lontan:
“La ativitât dai umign e va indenant cence padin; co e rive ae fin e torne di gnûf a scomençâ. Duncje e pues lâ indenant in perpetui. Cuant une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co i umign savis e stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”

Mirok al è lât a Rome

Mirok the scarecrow and Gina the lark

Une gnove striche di Mirok il pipinat e Gine la lodule…

Mirok a Rome

– Mandi Mirok !
– Mandi Gine, cumô ti conti une gnove…
– A contin che la Debore si sedi cjalade intal spieli domandantli: cui ise la plui biele dal ream ?
– E chel di rispueste i vedi dite: tu tu sês biele ma Virginie e je plui biele…
– E je, inalore, ce aial fat ?
– Po ben, e à butât jù il spieli mandantlu in mil tocs e tacant a berghelâ: cheste zonte no si à di fâ !

🙂

Cjaminade su la mont Mia

Stupizza di Pulfero

il comun di Pulfero e à inmaneade, domenie 31 di Lui 2016, une fieste lì des malghis su la mont Mia in ocasion de concession forestâl par il sfrutament dal bosc… l’apontament al jere aes 11H30… tant che cualchidun al rivave in machine dilunc la strade forestâl, chei altris acompagnâts da dôs vuidis, Stefania e Marco, a levin a pît dilunc il troi che da Stupizza e rive sù la Mont Mia… une biele cjaminade fate cun calme in 2H30 e passant traviers bielis boschetis e i crets di calcâr inte part ad alt… a pene tacade la cjaminade o vin podût viodi a man çampe lis ruvinis di un antic borc, Pedrobac abitât fin al inizi dal ‘900, che e veve un mût inzegnôs di conservâ il formadi e altris prodots metintju dentri un çondar taponât cun lis pieris e lassant dome doi piçui barcons in mût che al fos il zîr di aiar, in chest mût la temperadure si mantignive simpri compagne dilunc dutis lis stagjons… po dopo il troi al tacave a lâ sù e stant che al jere une vore di scjafoiaç o vin sudât trê cjamesis… lis robis a son ladis miôr rivant inte valade dal Pradolino… une valade une vore alte che e je stade sgjavade dal Nadison intal cret di calcâr , par vie che il so jet al passave, tancj agns indaûr, di chestis bandis… rivant aes malghis tor lis 11H30 o vin podût gjoldi di un biel licôf cun bire, vin e di gustâ pastesute cun tocj di cjar, e par secont a jerin i ćevapčići o lis fetutis di cjar cun la polente o ancje i fasûi… insome tante robe… ma par cui che e veve fate dute che cjaminade e al veve ancjemò di tornâ indaûr a pît salacor une biele fete di angurie o dei pierçui a saressin lâts une vore benon… tant che si mangjave, il sindic e i studiôs nus contavin de concession e de impuartance di chest bosc, stant che al è deventât SIC ven a stai Sît d’Interès Comunitari, e di ce che a àn intenzion di fâ par tignîlu in bon stât… tor la une, cun Marco, o vin decidût di tornâ indaûr stant che il meteo nus faseve viodi che al jere dongje a rivâ un biel burlaç… e cheste e je stade la nestre fortune par vie che rivâts al parcament, tor lis 15H00, pôc dopo e tacave a gotâ e in cinc minûts si à discjadenade une biele bissebove… no sai però cemût che e je lade a finîle a chei altris che cun Stefania a jerin restâts sù par gjoldi dal conciert di trombis e che a son partîts plui a tart… un graciis di cûr a Stefania e Marco che nus àn vuidât displeantnus lis bielecis de nature e un riviodisi a ducj l’an che al ven… mandi a ducj !!!

look at… the photos: Cjaminade Monte Mia

:mrgreen:

13e tape dal Zîr d’Italie

Palme – Cividât

Cividât si è piturade di rose vinars ai 20 di Mai 2016 cuant a son passâts chenti i cicliscj dal Zîr… dut ator ator a jerin flocs, galis, balons e listons in rose… la statue di Juli Cesar e veve intor la maiute rose… la scrite Mandi e jere in rose… dutis lis feminis a vevin intor alc di rose… di plui a jerin cetantis bicicletis piçadis daperdut dutis in rose… o ai ancje viodût la sacume di un gjat in rose… e, no podeve mancjâ, al jere il frico dut rose… une biele atmosfere che si è scjaldade une vore cuant a son passâts i cicliscj in vie Libertât corint cetant fuart, ducj in rie a fâ un biel trenin e cun daûr une file di machinis, lis amiraliis, che no finive plui… e cualchidun ch’al cridave ato viodût Nibali?
Ma ancjemò plui biel al è stât viodi il zîr in TV par vie des ripresis fatis dal elicotar e des motos indulà si viodeve dute la int che e jere dilunc il percors in salide, lis personis che a svintulavin la biele bandiere zale/blu dal Friûl e soredut il spetacul maraveôs des valadis furlanis viodudis dal alt… chest par visâsi di cetant biele che e je la niestre tiere furlane… inalore sperin che a tornin a passâ chenti biel prest… MANDI A DUCJ !!!!!

Look at… the movie: 99° Giro d’Italia – 2016 @ Cividale del Friuli
Look at… the photos: Il Giro d’Italia a Cividale

😎

No vin di vaî, ma dome di tornâ a fâ sù

chest al è stât il spirt di chês zornadis
al jere il 6 di Mai dal 1976 e il Friûl al vignive sdrumât dal taramot, tant che sot di chês ruvinis a jerin cuasi 1000 personis jenfri oms e fantats… ma la dì dopo e jere chenti cetante int pronte a dâ une man… alpins, oms dal esercit, volontaris clamâts adun des parochiis… a vignivin no dome de Italia ma ancje de Austrie, Gjermanie, Americhe… e modon su modon, piere su piere dut al è stât tirât sù di gnûf… dulà ca jerin, cemût ca jerin… daspò 40 agns nô furlans no dismenteìn chei moments e ducj chei che nus an judât… inte Vile Manin di Passarian e je la mostre “Memorie. Arte, immagini e parole del terremoto in Friuli” par visâsi di chei moments a traviers lis contis di ducj… inalore ve culì une poesie dal poete furlan Leonardo Zanier…

L’ORCULAT

Oh se il teremot
al foss un orculat
ingiaulât salvan
fuarton e trist
bon di sdrumâ cence fadia
tors di glescias e storia
e di parâ in masceria’
bicocas e cjascjeî
e come un giôc di cjartas
i paisuts dai cjargnei…

Oh se il teremot
al foss un drâc
platât dismenteât
vivarôs e luscint
che sott via al va sgarfant
ora prescint
par fâ sprofondâ
citâts e marans
e ca e là a so caprici
las cjasas dai furlans

Oh se il teremot
al foss un mazzarot
pelôs grass
vuarp e bigot
ch’al va sdrondenant di nott
cjadenas sui tetts
e quant ch’hai peta
come scorias
las cjapa cun dôs mans
e ‘l para in fruçons
i paîs dai terons…

Massa biel
s’al foss cussì
il teremot
che alora bastaress
di âga santa un spargott
o di San Zorz il spiçott

poesie cjapade fûr de racuelte:
Sboradura e sanc, Nuova Guaraldi, Firenze, 1981

fuarce Friûl

Marcje des Cisilis

a Cividât

Domenie, 20 Març 2016, e je stade a Cividât la Marcje des Cisilis. Si partive dal “Pala Natisone”, ven a stai il palaç dal sport, indulà si cjatâvisi e po dopo si partive cuant si voleve jenfri lis 08H30 – 09H30… e jere ancje la pussibilitât di sielzi tra trê itineraris di 4-10-24 km… chel plui lunc e rivave fintremai a Madone di Mont, tant che chei altris doi a fasevin un zîr par lis nascuindudis di Cividât rivant fin a Sanguarç indulà al jere il puest di ristorazion… il timp al jere une vore bielon ni masse cjalt ni masse frêt, propit just par fâ une biele cjaminade o cori… di fat in tancj a cjaminavin fermantsi a fâ lis fotos tant che cualchidun une vore bulo al coreve, no savint ce che si pierdeve… Buine Vierte a ducj !

Cjalait dutis lis fotos: Marcia delle Rondini 2016

😎

Nêf nêf nêf

finalmentri e je rivade

…vuê di matine o vin vût un disveâsi dolç… dut di fûr al jere blanc e la nêf e colave a flocs fofe, morbide, lizere… lant ator pe citât si sintive il scjaf scjaf des rudeis des machinis e il talpetament des scarpis de int inte nêf… par fortune e à molât di neveâ a vonde buinore cussì no son stâts problemas a lâ par lis stradis primariis…

Look at… the movie: Neve Neve Neve @ Cividale del Friuli 2016

😎

BENVIGNÛT 2016

…WELCOME 2016 !

I WISH ALL CLIMBERS AND 0000 SPEED SKATERS 0000 ALL OVER THE WORLD A HAPPY NEW YEAR !!!!!

An gnûf vite gnove, no stait mai a contentâsi di un cûr di seconde man, inalore ad alt i cûrs !

O tacarai chest an 2016 cuntun proponiment e cuntune riflession.

Il proponiment al è chel di judâ chei che a fasin fadure a lâ indenant inte vite e di combati la tindince, dal dì di vuê, di meti dongje masse ricjece intes mans di pocje int, tant che si ledi viers dai mûts di convivence indulà la int e rive a cjatâ lavôr e a mantignî la famee.
La riflession impen e vên de savietât dal Orient lontan:
“La ativitât dai umign e va indenant cence padin; co e rive ae fin e torne di gnûf a scomençâ. Duncje e pues lâ indenant in perpetui. Cuant une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co i umign savis e stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”

WELCOME 2016 ! Look at... the pictures about Grado

😎

Maratonine di Palme 2015

Speed Skating Half Marathon – Palmanova (UD)

…intune zornade avonde grise o sin cjatâts a Palme par cori cun i patins a rodelis la 13e Maratonine di Palme, ma o vin vût biel za une grande fortune a podê fâle stant che chest an gli organizadôrs si jerin dismenteâts di nô… cussì ae partence, tor lis 09H50, une trentine di patinadôrs a àn cjapât il vie… a jerin chei dal Comine di Pordenon, chei dal trop Roller Evolution di Udin e chei di Cividât…. a Cividât nol è ancjemò un trop di speed skating, magari cussì no, ma sperin di metîlu adunc biel prest, salacor si podarès clamâlu Speed Skating Cividale Association … jo o buti là la propueste, viodarin se cualchidun la cjape sù… mandi a ducj!!!

Look at… the photos: 13^ Maratonina di Palmanova 2015

:mrgreen:

Une ruede mendose

ce porcarie di ruede!!!

Be careful with that wheel !!!

No vevi nancje fats 50km che cheste ruede si è spacade fasintmi colâ. Par fortune che o levi biel planc ma se o fos stât dilunc une ribe jù no sai cemût che e sarès lade. Po ben, dut al è ben chel che al finìs ben !
Cumò o ai scrit une email a che dite, tedescje, che al vent chestis ruedis pitochis. Viodarin ce che mi disaran…

Il cistjel di Ahrensperg

o Cistjel dall’Acuile

La strade che e côr dilunvie la rive drete dal Nadison dal puint di S.Quirin fintremai a Pulfar e passe par une zone di fortificazions de ete tarde-romane clamade Vallum Alpium Iuliarum. Di fat cheste strade rivant fin te valade dal Lusinç e jere impuartatone par la cuâl si pense che a sedin stâdis fatis sù une vore di tors par fâ segnalazions, ancje se cumò di dut chest si cjate ben pôc.
Rivant a Biacis, dongje de glesiute di S. Jacum, si cjate il cistjel di Ahrensperg, di ete almancul Langobarde o forsit ancje anteriôr, che apartignive ae int gjermaniche ma che al è stât cjapât da Cividât e po dopo butât jù dal patriarcje Ludovico della Torre intal 1364, e i taramots dal 1511 e 1513 a finirin la opare. Ma si salvarin lis muris che a centavin il cistjel e lis dôs tors. La tor plui piçule, indulà si metevin i prisonîrs, e je chê che o viodin cumò invezit chê altre e fo dal dut butade jù cuant la fabriche di ciment Italcementi e costruî une ferade par puartâ il ciment fûr de gjave di Tarcete.
Intai ultins agns la Universitât dal Friûl al à fat dai sgjâfs archeologjics par cirî di capî la estension dal sît, rivant ad ore a cognossi indulà che si cjatave la tor grande e l’abitazion principâl e permetint la parziâl ricostruzion par cont dal atuâl proprietari. A son stadis, cussì, tiradis sù cuasi dutis lis muris, la piçule tor e l’abitazion secondarie, in plui a son daûr a fâ sù il piçul palatium dal cistjel.
Il troi che e puarte al cistjel al continue e al rive, cuant che al è in bon stât, fintremai ae glesiute di S. Zuan dal Landri.

Look at… the photos: Il Castello di Ahrensperg

Festinparco 2015

a Cividât e intes Valadis dal Nadison

la idee e je chê di rivâ ad ore a fâ un PARC cence confins par podê gjoldi des bielecis naturâls dilunc il Nadison… il progjet al ten dentri dutis lis aministazions indulà al passe il flum, ven a stai Cjaurêt, Taipane, Pulfar, S. Pieri dal Nadison, Cividât, Premariâs, Manzan, S. Zuan dal Nadison, Cjopris Viscon e Trivignan… chestis aministrazions a àn fat un acuardi clamât “contrat di flum” par meti in vore il progjet… tant che la Associazions Parc dal Nadison e à inmaneât Festinparco, une fieste che si davuelç ogni an, dal 2014, par pandi cheste biele idee… e domenie a jerin cetantis robis di podè fâ e nô o sin lâts a fâ il zîr dilunc la ciclabîl FVG-3 organizade dal trop Natison in biciclete e po dopo o vin fat un salt intal landri di Antro intes Valadis dal Nadison… a fâ il zîr in biciclete a jerin une trentine di personis e o vin podût gjoldi de biele zornade lant dilunc lis stadutis che a passin dongje dal Nadison… o sin ancje passâts par Sdricca di Sore indulà intal 1917 al jere stât fat il trop dai “Arditi d’Italia”… po dopo rivâts dongje Manzan o vin cjatât dai troncs di sbighet dilunc dal troi che dinissun ju sposte passe doi agns… ma a part chest piçul probleme a son ancjemò da risolvi cetantis altris robis une vore plui penzis come i depuradôrs des aghis sporcjis che no funzionin, la glerie che e jemple il jet dal flum, i troncs dai arbui che a blochin il regolâr flus de aghe… rivant a Vuelis o sin fermâts a cerçâ alc li dal agriturisim “La Grande Betulla” indulà nus vevin prontât dai plats di afetâts e formadis varis cun des jerbis, salacor une biele pastesute e sarès stât miôr stant che si veve ancjemò di finî il zîr… par di plui nus stavin puartant in taule no sai trops bocâi di vin blanc e neri… va ben che o sin a Friûl cjoc ma no si va indenat dome a vin… e dopo che sul mangjâ pront lis mans o vin slungjât, la voie parant vie, o sin tornâts a pedalâ passant par Levrons, Firman e rivant di gnûf a Cividât li de viele stazion dai trens, indulà si jere partîts… insome une biele zornade tant che cualchidun al à domandât a Stiefin di tornâ a organizâ biel prest un altri zîr… inalore sperant di tornâsi a viodi in curt… mandi a ducj!!!

Look at… the photos: Festinparco 2015

:mrgreen:

Hortus conclusus

a Cividât

A S. Zorz, un borc di Cividât bande Firman, al è un puest indulà si pues stâ in pâs intal mieç de nature. Culì al è cui che al à fat di mancul di tirâ su viletis par mantignî l’ort, i çamps, il bosc, dongje dal Nadison, e une biele glesiute de ete medievâl. Insome un biel puest indulà passâ une zornade in compagnie di int che si dedee ae cognossince de part plui nascuindude dai umign.
A jerin i workshop di Chi Gong, di Danze dal Vintri, di Self Reberthing e l’esperience cun i sunôrs des Cjampanis Tibetanis e sot dai arbui, intai gazebo, si podeve incuintrâ e fevelâ cun i operadôrs. Par di plui Lorenzo, dilunc la zornade, al à inmaneât des visitîs ae glesiute spiegant la sô storie e l’impuartance dai lavôrs che a stan fasint par tignîle di cont.
O ai di saludâ e ringracjâ, in particolâr, chei dal Yoga des Ridadis vint sunât intune.
Mandi a ducj !

Look at… the photos: Il Giardino del Chiostro

😎

Dilunvie la ciclabîl Resiute – Pontêbe

une biele domenie di Jugn

La ciclabîl che da Resiute e mene a Pontêbe e côr indulà che une volte e pasave il tren, colegant la plane cun la mont, par chest fasintle in bici o cun i roller si cjatin cetantis galariis e puints altonons in fier. La matine cuant si jentre dentri une galarie si à une biele sensazion di fresc e cun i roller bisugne fâ atenzion all’asfalt un pôc sbrissot. Lis galariis a son cuasi dutis iluminadis ma e je ancje cualchidune dal dut scure e avonde lungje, par chest bisugnarès vê cualchi lûs par fâsi viodi. La ciclabîl a côr intal mieç di un biel bosc e da Resiute a Pontêbe e je dute di ribe sù. Fin a Scluse, ven a stai i prins 7.5 km, la pendence no je tante ma dopo e devente un pôc plui impegnative soredut di ribe jù cuant cun i roller si cjape une buine velocitât. A Sculse la viele stazion dai trens e je stade sistemade e chenti si pues fermâsi a bevi alc al bar e a cjapâ colôr sentâts di fûr. Passade la viele stazion dai trens di Dogne e lant viers Pieretaiade e je une biele sorprese par cui che al va cun i roller. Di fat, daspò vê passât i puints cun lis gradis in fier, une rampe di masegns, e lis galariis sbrissôsis si cjate une biele scjalinade che e puarte suntune strade asfaltade e di culì par tornâ lì de ciclabîl bisugne fâ dôs rampis. Pa gno cont, rivâts lì de scjalinade cun i roller e conven tornâ indaûr, po dopo viodêt voaltris ce che ur plâs di fâ…

Look at… the photos: La ciclabîl Resiute-Pontêbe

:mrgreen:

Dilunc il lât di Ossiacher

in Austrie

Ducj intune, bikers e skaters, o sin cjatâts domenie passade dilunc lis stradis dal lât di Ossiacher, che pe ocasion a vegnin sieradis aes machinis… il percors e côr dut intor dal lât ma si pues rivâ fintremai dal paîs di Fieldkirchen fasint cualchi km in plui, in dut une cuarantine di kilometros… si trate di un percors cetant biel ma no tant facil par vie che a son tancj sù e jù che a impegnin une vore… in ogni câs si à a disposizion dut il timp stant che si partìs aes 10H00 e si à timp fin aes 15H00 par finî il zîr… chest an e jere tante int soredut tancj bikers, tant che i skaters, plui o mancul, a jerin simpri chei cun tancj di lôr che a vignivin di Udin… di fat a jerin sedi chei dal Inlineskateschool, sedi chei dal mitic Gru, il trop plui grant di patindors in dute la regjon… in place a Fieldkirchen o sin fermâts al bar indulà o vin cjatât il Campa che nus à contât des prossimis jessudis dal Gru e in particolâr di une gnove in programe cetant bielone, par la cuâl… stay tuned… daspò tornâts indaûr prime di rivâ dilunc il lât no si podeve no fâ tape li dal ristorantut indulà a fasin la trute “Blau”, ma par vie che e jere cetante int e al jere une vore di spietâ, magari cussì no, o vin dovût contentâsi dome di bevi alc… il vin culì al coste un bot, miôr butâsi su la bire… la zornade cjalde si faseve sintî e no si podeve lâ indenat cence un biel spritzeton… dopo a dute o vin fate la strade che nus à menât fintremai a St.Andra dongje dal parcament… il biel al è stât che ducj e doi i trops dai patinadôrs di Udin, cence visâsi, si son cjatâts ae stesse ore ae fin dal zîr… mandi a ducj…

Look at… the photos: Ossiacher See

😎

Dilunc la piste ciclabile Aquilee-Grau

all along the path-line

La ciclabile che da Servignan e puarte a Grau e je stade fate di pôc par la cuâl no viodevi la ore di lâ a provâle cun i patins. Domenie passade, finalmentri, o vin decidût di lâ a fâ un zîr di chês bandis e o sin cjatâts a Servignan indulà la ciclabîl e partîs. Il timp al jere bielon ancje se, come par solit in chest periodi, l’aiar no mancjave. No jere bore ma aiar di siroc, cussì lant viers Grau e si veve l’aiar in muse, biel che tornant nus sburtave un pôc. Il prin toc di ciclabîl, saltant fûr di Servignan, al è biel passant intal mieç di un parc e parsore di un puint di len ancje se a son une vore di tombins par la cuâl bisugne stâ atents. Rivant ad Aquilee, la piste e rive propit dongje i sgjâfs archeologjics, e chenti si pues gjoldi des bielecis archeologjichis de ete romane. Po dopo, rivant sul puint che coleghe la tiere ae isule d Grau, si cjatâsi denat il blu dal mâr cun il sô fuart odôr, une maravee… cuant che si rive ae fin dal puint indulà e finîs la ciclabîl e mancje ancjemò di traviersâ il puint mobil par rivâ a Grau… chenti bisugne fâ une vore di atenzion, par vie che no je une bancjine indulâ podê cori ma bisugne passâ dilunc la strade cuant no son lis machinis… in ogni câs si trate di un toc curt… daspò, par lis nascuindudis, si rive sul viâl dilunc dal mâr… in sumis, une biele ciclabîl avonde largje indulà si pues ancje cori e salacor fâle di buinore o crôt che al sedi une cjosse fantastiche…

Look at… the photos: la piste ciclabile Servignan-Grau

:mrgreen: