Yak furlan

intes valadis dal Nadison

No si cjate dome intai altiplans dal Tibet, ma ancje intes valadis dal Nadison chest tipo di yak con un biel mantel colôr rossit… l’arlevament al è logât intun sierai dongje dal Nadison e intune posizion indulà il soreli, biel za buinore sot sere, nol è plui… par la cuâl chel mantel cun il pêl lunc al permet al animâl di frontâ un clime une vore garp…

Look at... the pictures about the yak

:mrgreen:

BENVIGNÛT 2015

…WELCOME 2015 !

I WISH ALL CLIMBERS AND 0000 SPEED SKATERS 0000 ALL OVER THE WORLD A HAPPY NEW YEAR !

An gnûf vite gnove, no stait mai a contentâsi di un cûr di seconde man, inalore ad alt i cûrs !

O tacarai chest an 2015 cuntun proponiment e cuntune riflession.

Il proponiment al è chel di judâ chei che a fasin fadure a lâ indenant inte vite e di combati la tindince, dal dì di vuê, di meti dongje masse ricjece intes mans di pocje int, tant che si ledi viers dai mûts di convivence indulà la int e rive a cjatâ lavôr e a mantignî la famee.
O pues dîsi, par esperience, che cumò e je int abenade che si profite de crisi par cirî di paiâ pôc i lavoradôrs, une robe tant plui triste par vie che si trate di lavoradôrs che a àn un lavôr a scjadince e che a àn a disposizion dai imprescj par fasi justizie une vore costôs e lents.
Biadelore che la int triste e finìs di rompi i cits !

La riflession impen e vên de savietât dal Orient lontan:
“La ativitât dai umign e va indenant cence padin; co e rive ae fin e torne di gnûf a scomençâ. Duncje e pues lâ indenant in perpetui. Cuant une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co i umign savis e stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”

WELCOME 2015 ! Look at... the pictures about Grado

😎

Fuarce Friûl

sul puint e svintule bandiere zale/blu !

la patrie dal friul

Un bon proponiment par l’an che e ven al è chel di pandi la nestre identitât furlane, rivant ad ore a vinci la antighe vergogne di fevelâ la mari lenghe in public. Mi auguri che la int cuant che si cjate a scuele, par strade, intai lûcs publics e fasedi un piçul sfuarç e, cjapantle a pet, e feveli par furlan. Ma ancje che o tachin a lei e a scrivi par furlan. Si viodin ator dai libris di storie furlane indulà e je dome la jentrade par furlan, masse pôc par mantignî vive une lenghe, cuant e coventarès sedi scrivile sedi leile.
Nus fasarès ancje plasê che intai mass medie, come previodût de leç, a fossin plui spazis par il furlan. Cumò lu si scolte dome par Radio Onde Furlane e 30 minûts par la Rai regjonâl cuant che par altris lenghis minorizzadis i spazis a disposizion a son une vore di plui. Ma par meti in vore chest proponiment e bisugnarès puartâ la sede regjonâl de RAI a Udin e fâ in mût che i gjornaliscj a fossin di marilenghe furlane. Salacor no spindint cetancj bêçs par il teatri Verdi dal cjâf lûc cjarsulin, 14MLN di euros intal 2014, e invistint in culture furlane fuarte.
Une altre robe cetant triste a je stade la leç finanziarie de gnove zonte regjonâl che e gjave, magari cussì no, i finanziaments par l’insegnament dal furlan intes scuelis, lant cuintri dutis lis leçs di tutele dal furlan ma soredut pandint la politiche de çampe viers de lenghe e de identitât furlane. Par il 2015 il nestri proponiment e sarà inalore chel di domandà che il furlan e vegni doprât cetant che lenghe veicolâr intes scuelis dant la pussibiltàt a ducj di imparâ doprant la lenghe mari.
Ancjemò o vin di bataiâ par il non de nestre regjon. O vin voie che sedi dome Friûl. Parcè che un non al è cetant che cjalâsi intal spieli e viodi ce che o sin. E co o cjalìn intal spieli o viodin il Friûl nuie di plui e nuie di mancul. Par la cuâl lis peraulis Vignesie Julie no o rivìn ad ore a capì ce che e stan a fâ. Il podê di Vignesie al è finît da un toc, e ce che nus reste aromai a son dome i palaçs e par chel che al inten la peraule Julie, no si rive a cjatâ un segn intes cjartis gjeografichis. Par la cuâl o domandìn che la nestre regjon e sedi clamade Friûl e vonde.
Une altre riflession nus imponi chel che al è capitât in Friûl al Consorzi des Latariis Furlanis, che cumò al è passât di man deventant de Parmalat, e indulà si previôt che a laràn a cjase une vore di lavoradôrs. In Friûl a son aromai cetantis lis fabrichis che a sierin o a riduzin il numar dai dipendents tant che la situazion e devente simpri plui grivie par vie che cetancj lavoradôrs a àn un contrat a scjadince cun paiis une vore bassis. Si che duncje e sarès ore che la cuistion dal lavôr e vignedi cjapade sul seri mudant lis regulis dal zûc e dant la pussibilitât al sisteme di lâ indenant tignint front ae concorence e permitint a cui che al lavore di puartâ a cjase une paie buine par vivi.
Par di plui i sorestants a van ator a dîsi che a tegnin a la mont e che a fasaran alc par jê ma di fat a àn sierât il Tribunâl di Tumieç gjavant tancj puescj di vore e cumò a son daûr a sierâ ancje il prin socors di Glemone in graciis di une riforme sanitarie che e puarte a centralizâ cuasi ducj i servizis intal ospedâl di Udin bandonant i ospedâi di Latisane, Cividât e Glemone, magari cussì no.
O crodin che par i furlans e sedi dome une pussibilitât par saltâ fûr di cheste situazion cetant nereose, deventâ une regjon autonome cjapant a model la Catalogne indulà i catalans a àn a disposizion cetancj mass media inte lôr mari lenghe, e indulà ducj a fevelin par catalan.
E voaltris cuâi proponiments vêso fat pal 2015 ?

Fuarce Friûl !

BON FINIMENT E BON PRINCIPI A DUCJ !
e un an plen di fortune cun buine lune !

«O ai cirût di volêi ben ae mê tiere furlane, part dal mont, e servintle jê o ai intindût di servî il mont intîr»
Pre Antoni Beline (1941-2007), testament spirituâl, 1992

Bon finiment e Bon principi

😎

Un voli viers il cret

indulà rimpinâsi al è maravee

Look at... Scudo movie
O sin rivâts ae fin dal an e al è timp di fâ un belanç ancje par webandana.com, inalore tachin cjalant i dâts di Google:
lis visitis a son stadis 29.505
i visitadôrs unics 21.186
lis pagjinis viodudis 134.489
I rimpinadôrs che a an fat il Test inte sezion training a son stâts: 8286.

Ma butant il voli plui inlà dai numars, o vin di impensâsi che chest an a son stadis viertis dôs bielis cretis in Friûl, ven a stai:
1- La crete dal Mont Stele, dongje Tarcint, indulà si cjatin une ventine di viis.
2- La crete dal Zardin dai Clapons, dongje Cjavaç, indulà a son une cuindisine di viis.
Il mês di Setembar al à viodût il cret de Cjargne e dal Glemonês protagonist dal meeting “Find your way” indulà tancj rimpinadôrs si son cjatâts ducj intune e indulà a jerin ancje Adam Ondra e Silvio Reffo. Adam, come par solit, al è rivât a maraveâ ducj viersint une gnove vie  intal cret dal pas di Mont di Crôs.
E je stade fate une propueste par sistemâ la viele stazion dai trens di Cividât fasintle deventâ un climbing center ma… i nestris sorestants a vuelin fâle deventâ un museu de Prime Vuere Mondiâl, magari cussì no.
O sin daûr a pensâ di fâ in mut che si puedin viodi off-line lis pagjinis inte sezion de Falesie.
La comunitât di rimpinadôrs di webandana.com si cjate su Twitter con l’hastag #climbersFriuli. Tant che su Facebook e je la pagjine webandana.com.
Cun il proposit di jessi simpri di plui a rimpinâsi intor pal mont o ai voie di ringraciâ di cûr ducj chei che nus an visitât.
MANDI A DUCJ E BON AN 2015 !!!
Simpri par gnovis emozions !!!

😎

Vignesie Julie vendisi

une vere ocasion !

E je cualchidun che al vûl comprâsi la Vignesie Julie ?
Nô, ben vulintîr o volaressin vendile, e no stait a vê pinsîrs pal presit parcè si contentìn di pocjis palanchis.
O miôr, podìn ancje vignî in jutori dantle fûr par di bant… alore ce spietaiso a fâus indenant…
e je une vere ocasion !!!

 Venezia-Giulia vendesi !!!

😎

La rade di Sistiana

Novembar 2014

Dilunvie la cueste dal golf di Triest si cjate la biele rade di Sistiane. La rade e je pardabon un tesaur par la sô bielece naturâl e di Istât cetante int e rive chenti par passâ une zornade al mâr. Culì no si cjatin lis bielis splazis di savalon di Grau e Lignan, stant che a son dome claps, ma in compens si pues fâ des bielis nadadis par vie che la aghe dal mâr e je subite alte. Inte part plui a tramontan al è il cret indulà a son diviersis viis par rimpinâsi. Impen parsore al cret al côr il bielissim troi Rilke, tant innomenât par vie che il poete al leve lenti a fâ lis sôs cjaminadis. Inte rade al è ancje un piçul puart par lis barcjis a vele e une scuele di nautiche. In plui inte zone dal parcament privât al è une discoteche che e organize bielis seradis cun musiche. A sarès dut ben ma… la aministazion comunâl al à pensât ben, par valorizâ il puest, di meti un biel depuradôr propit sot de crete indulà si rimpine, par la cuâl li dongje si sint une puce mostre. Ma a àn ancje fate une altre biele robe, ven a stai chê di vendi sù dut. E za parcè il parcament al è privât, e cualchidun al à tirât sù ancje une piçule cjasute dongje il cret, tant che inte zone plui a sud, indulà si cjatave la gjave, cumò a stan costruint un biel vilaç isto-venit, come lu àn clamât, cun tantis cjasutis une parsore che altre e cun daûr il cret e denant il mâr. Insume, di naturâl al è restât ben pôc e la int par lâ al mâr al à di paiâ. Ma la idee di fâ un biel parc naturâl indulà passâ cualchi ore in compagnie e jere masse sempliç di realizâ e salacor no permeteve di puartâ intes cassis dal comun lis palanchis. Cussì la mancjance di un plan regjonâl dal paisaç, dai piçui sorestants cence cûr e amôr pe nature e un capitalisim rogant a son, ancjemò une volte, lis causis de esgjerade cimentazion de nestre biele tiere.
O crôt che chest câs al à di vierzi i voi a ducj i furlans che a vuelin ben ae lôr tiere, par fâ in mût che in futûr dinissun e podarâ fâ chenti ce che vûl.

Look at… the photos: La baia di Sistiana

la baia di sistiana 2014

:mrgreen:

La piste ciclabile di Grau

da Primero a Grau

Dal puint di Primero, dongje Fossalon, e tache la biele piste ciclabile che e mene fintremai a Grau. Cheste piste e je tant biele a fâle cun i patins a rodelis ma in chest periodi daspò, il timpât che al è stât lis setemanis passadis, e je cuvierzude di cetantis fueis dulinvie diviers tocs par la cuâl al è miôr pontâ daurman a Grau li dal parcament indulà si fâs il mercjât 😉

Look at… the photos: Ciclabile di Grado ( lis fotos a son chês insom dal album )

ciclabile di Grado 2014

:mrgreen:

12^ Maratonine di Palme 2014

cun i rollers

Îr il timp al jere cetant nereôs e vie pe gnot al à plot, tant che lis previsions dal timp pa la zornade di vuê, ven a stai di domenie 16/11/2014, no jerin masse bielis. Cussì cuant che cheste matine a buinore o soi jevât e o ai viodût lis stelis intal cîl o ai cjapât cûr e o ai tacât a prontâmi par lâ jù a Palme a cori cun i patins a rodelis la 12e maratonine. Rivant in place il soreli e tacave za a scjaldâ ma lis stradis a jerin ancjemò bagnadis. Tor lis 09H50 e jere la partence dai cicolons e dai rollers tant che i runners a partivin aes 10H00. Ma a partî cun i rollers si jere dome in cinc, cuatri oms e une fantate di vot agns e ancje i ciclons a jerin in pôcs, o crôt par vie che il brut timp di îr al à puartât tante int a decidi di no vignî e vuê l’àn cjapade intal comedon, magari cussì no. Il soreli a scjaldave ben e o vin podût cori cun intôr dome la t-shirt ma lis stradis a jerin une vore bagnadis par la cuâl no si podeve sburtâ masse. In ogni câs o vin fat un biel trenin e o sin rivâts in place Grande a Palme dopo 01H12M fasint une medie orarie di 17.5 km/h e cuntune biele volade finâl vinçude di me. Biadelore o soi rivât prin, dut merit di chei cûr di leons dal gru che a àn sghindade la corse par pore dal timp 🙂
Po dopo, cjatantsi ducj intune in place Grande, o vin podût gjoldi dal soreli sentâts a bevi, a contâsi alc e daspò lant a mangiâ une buine pastesute cun il tocj di folp grant.
Insome une bielissime zornade propit par vie che dinissun si spietave un timp cussì biel.
Mandi a ducj !

Look at… the photos: 12^ Mezza Maratona della Città di Palmanova (UD) 2014

12^ Mezza Maratona della Città di Palmanova (UD) 2014

😎

Vile Cernazai Pontoni

Diplis di Premariâs (UD)

Dilunc la strade che puarte da Spesse a Diplis si cjate, suntune biele culine, la vile Cernazai Pontoni. Il puest al è une vore preseât par vie che dulintor a son vignâi doc, boscs, prâts, cjistiei e jaciments fossii ancjemò in buine cundizion. Par di plui de culine si pues gjoldi di un biel panorame su dute la plane di Cividât, sui Cuei Orientâi e lis Prealps Juliis. Une vore biel al è il parc zardin dut ator ator de vile cun il broili di pomârs e garofui, diviersis plantis ad alt fust e la sidrere. La vile e je fate a trê plans e e à une forme retangolâr e a son ancje lis cantinis soteraniis. Il denant de vile e cjale a soreli bonât e si slungje infûr suntune terace cun intal mieç un biel poç in piere e fier batût tant che il parapet de terace al è aromai biel za platât des jerbis. La bande secondarie e cjale a Nord viers la strade che e mene in vile. Tacade ae vile ma su un plan plui sot e je la barcjesse che si slungje viers soreli jevât cun doi plans. La vile e à un colôr blanc mentri la barcjesse e je di colôr auriane e no si sa ben cuant e sedi stade fate sù ma si pense che e sedi simil aes vilis venitis furlanis dal prin sietcent. Intai archivis catasticâi austriacs dal 1836 si cjatin lis mapis che a documentin la presince de vile cun cuasi dutis lis dipendencis. Dongje si cjate la capele privade dal palaç dedeade ae Beade Benvignude Boiani di Cividât che e jere stade fate sù intal 1659. La vile intal votcent e jere di proprietât de famee Cernazai di Udin e dentri e jere a stâ Carlo Luigi Cernazai, un studiôs di botaniche e agronom, cetant che il pari, che e rivarà a sperimentâ gnovis tecnichis par selezionâ lis uis e par lis coltivazions. La vile e je ancjemò dotade di un foledôr indulà si pues lavorâ la ue e di une cantine. Intal nûfcent la proprietât e je passade ae baronesse Elisabetta Braida de Chantal e daspò vendude intai agns cincuante a Ines Pontoni di Premariâs che intal 1967 le à donade ae cjase di polse di Cividât cun il vincul di judâ cui che e veve dibisugne. Cumò la vile e je dal Comun di Cividât ma al è in vore un contenziôs denant dal judiç cun i erêts de famee Pontoni. Jù pai ultins cincuante agns la vile e jere abitade da doi pitôrs, Aldo Colò e Pino Mocchiut e e vignive frecuentade da cetancj artiscj. Biel che intal parc fintremai ai agns novante si faseve la mitiche Fieste dal vin di Diplis.
Al dì di vuê, come si viôt ben intes fotos, la vile e je dute bandonade e il palaç al è a risi di vignî jù se cualchidun nol cjate i mieçs par intervignî.
Un comitât di citadins si è dât dongje par sburtâ l’amministrazion comunal a fâ alc. Coordinadore dal comitât e je la siore Cristine Moschioni che si cjate su la pagjine facebook: Ipplis da ritrovare
Si pues ancje dâ un jutori lant sul sît de FAI “i luoghi del cuore” e votant il lûc dal cûr.

Look at… the photos: Cividât ( lis fotos a son chês insom dal album )

Villa Cernazai Pontoni - Ipplis(UD)

😎

Pali di S. Donât 2014

… @ Cividât

Il 22-23-24 di Avost dal 2014 si à davuelt il Pali in onôr dal patron de citât, Sant Donât. Une tradizion popolâr antighe che puarte Cividât indaûr intal timp fintremai al 1200/1300. In chescj dîs si pues tornâ a vivi i timps de Ete di Mieç, indulà i artesans a lavoravin il len, la lane, il corean, la piere e i metai e lis pieris preziosis tant che la int si cjatave la sere intes betulis. Vie par il Pali i cinc borcs si disfidin in dôs garis: la corse e il tîr cun l’arc. Une volte aes garis a cjapavin part ancje i citadins di altris citâts o cjistiei e al jere ancje la corse cun i cjavai. Il moment plui biel di chest avigniment al è il corteu dilunc lis stradis dal centri la domenie matine indulà si puedin viodi i nobiloms compagnâ lis cotesanis, i popolans e i contadins cun i lôr cjars, i soldâts intes lôr armaduris cun lis spadis, i sunadôrs cun il fulzic o il tambûr grant e lis compagniis di saltarins e di bufons. Cuant, po’, e cale la sere cjaminant dilunc lis scuindudis luminadis des cjandelis e somee propit di rivivi chei timps.
Il 20 di Avost dal 1368, la sflandorose Citât di Cividât, e decideve cun leç che il Pali di S.Donât si fos tornât a fâ “par simpri”, par la cuâl si pues pensâ che al jere aromai deventât une manifestazion une vore impuartantone. Si larà indenant a fâlu fintremai al 1797 cuant Napoleon no vûl plui che si fasedi.
Ma intal 2000 il Pali e ven riscuviert e si tache a fâlu insuazantlu inte seconde part dal XIV secul, ven a stai intal periodi dal patriarcjât di Marquardo von Randeck (1368-1382), par vie che chest al è un dai moments storics plui impuartants pal Friûl e par il Patriarcjât. Di fat Marquardo e rive ad ore a fâ la leç “Constitutiones Patriae Forojulienses”, un gnûf ordenament une vore inovatîf par chei timps che e restarà in vore fin a cuant no rive, magari cussì no, il Patriarcjât di Vignesie.
Il Pali si davuelç intal fin di setemane plui dongje ae zornade di S.Donât, il 21 di Avost, e a vegnin fatis lis garis di corse e di tîr cun l’arc e la balestre.
I cinc borcs storics dentri lis muris de citât a son:

Burgo dal Domo: : cun i colôrs e il steme de nobile famee De Portis;
Burgo Brossane: cun i colôrs e il steme de nobile famee Formentini;
Burgo Sant Domeni: cun i colôrs e il steme de nobile famee Canussio
Burgo Sant Pieri: cun i colôrs e il steme de nobile famee Boiani
Burgo Ponti: cun i colôrs e il steme de nobile famee Conti.

stemma Borgo Duomo stemma Borgo Brossana stemma Borgo San Domenico stemma Borgo San Pietro stemma Borgo Ponte

Il borc che al rive a vê plui ponts intes garis al vinç il Pali e al ten il confenon inte sô glesie
Il sît dedeât al avigniment al è paliodicividale.it

1- Look at… the movie: PALIO di SAN DONATO 2014 @ Cividale del Friuli
2- Look at… the pictures: Palio di San Donato 2011
3- Look at… the movie: PALIO di SAN DONATO 2011 @ Cividale del Friuli

Palio di San Donato a Cividale del Friuli

😎

Fieste di S. Lurinç

a Reant – 2014

Passant Torean e lant viers Masarolis si rive ad une crosere indulà si svolte a cjampe par cjoli la strade che mene al biel paîs di Reant. Daspò cualchi kilometro di salide biele dure, che o ai fate dute in biciclete, si rive in paîs. A Reant lis cjasis metudis a puest a son anciemò pocjis, ma cui che al è tornât a vivi chenti al è tant vivarôs, rivant a sistemâ la glesie di S.Lurinç e fasint ogni an un biel licôf intal mês di Avost (chest an il 09/10 di Avost ) par onorâlu. Intai dîs de fieste dilunc li viis a son cetancj artiscj che sot dai gazebo e pandin lis lôr oparis, mostrant cetante biele robe lavorade a man e fate cun tante grazie. Naturalmentri come in dutis lis sagris no mancje la musiche, la tarombule, il bon gustâ e tante biele int che si riviôt culì an par an. Un graciis di cûr a Leo che nus da simpri bon acet inte sô biele cjase.
Un mandi a ducj !

Look at… the foto gallery: Reant 2014

( inte pagjine des fotos scliçant il boton ros a forme di television che si cjate parsore de scrite “scarica immagini” si pues viodi la presentazion ancje a dut schermi )

Look at... the photos: Reant 2014

😎

Vueli dai Patriarcs

…@ Colorêt

La Pro Loco di Colorêt e à inmaneât, domenie 15 Jugn 2014, une biele cjaminade dilunc lis culinis di Cjampei par fâ visite aes aziendis agriculis che a produsin vueli. Cjatantsi denant de biele glesiute di Colorêt, dedeade ai SS. Zuan e Paoli, o sin lâts dilunc il troi che e zire ator la culine, passant li dal vieli acuedot e indulà si cjate inmò la risultive, par rivâ al piçul paîs di Cjanâl Alt e daspò ae aziende agricule S. Rocco indulà nus spietave Sandre Zamarian par contânus alc de lavorazion dal vueli e par mostrânus la cantine. Chenti o vin ancje profitât dal bon acet cerçant sedi il vueli sedi il vin acompagnât da pan e formadi o salam. Graciis Sandre !
La cjaminade e continuave rivant a Cjampei ae aziende di Achille Stefanelli, “Ronc dai Ulivârs“, indulà nus spietave la fie, Silvie che nus contave dai problemis che a son cun la cultivazion dai ulîfs e lis diversis cualitât che lôr a àn. Ancje chenti o vin gjoldût dal bon acet cerçant sedi il vueli sedi il vin acompagnât da pan e formadi. Graciis Silvie !
Il zîr al continuave tornant sù pe culine, passant il riu Merîs e rivant a Colorêt li de aziende di Comelli indulà il bielvedê su lis culins al è un incjant. Ancje culì o vin podût visitâ la cantine e cerça il vueli di Comelli e chel des aziendis Suffumbergi e Purinan simpri di Colorêt.
Cussì tra une tabaide e chê altre, cerçant alc, o sin stâts in legre compagnie.
Mandi a ducj !

Look at… the photos: Cjaminade par i roncs dai ulivârs dilunc lis culinis di Cjampei

Look at... the photos: Camminata tra gli uliveti delle colline di Campeglio

:mrgreen:

Zîr d’Italie 2014

in Friûl

Gran finâl dal zîr d’Italie in Friûl… sabide, 31.05.2014, il zîr e rive chenti cuntune biele tape da Manià a la mont dal Zoncolan… cumò sul Zoncolan al è mieç metri di nêf ma par sabide al somee che il timp al larà in miôr… domenie, 01.06.2014, pe ultime tape il zîr al partîs da Glemone, tor lis 12H35, par rivâ intal cjâf lûc cjarsolin e al passarà ancje par Atimis, Faedis e Cividât… i coridôrs a saran a Cividât tor lis 13H30…
Mandi a ducj !

Look at… the photos: Cividale del Friuli (UD)

Look at the photos: Cividale del Friuli

😎

Une vedude di Cividât a svol di uciel

an overview of Cividale del Friuli (UD)

Cjalant Cividât da la mont dai Bûs si reste cjapâts da sô bielece ma ancje e salte subite al voli chel condomini che si cjate propit intal mieç des altris cjasis… e ven di domandâsi cemût che ur à saltât intal cjâf ai nestris sorestants di lassâ costruî un robe dal gjenâr in plen centri storic… eh za e jerin i timps in cui e veve il cjaçut in man la DC e cumò nô o vin di patî lis consecuencis… mai che un Diu un folc i trai…

Look at… the photos: Cividale del Friuli (UD)

Look at the photos: Cividale del Friuli

:mrgreen:

Mirinde cun lis jerbis 2014

dilunc i comunâi di Faedis (UD)

Il 25 di Avrîl e il 04 di Mai 2014 o sin lâts ator par i comunâi di Faedis cun Rita dal ristorant “Ai nove Castelli” di Faedis, che nus à contât cemût doprâ lis jerbis salvadiis. Cussì o vin scuviert che dilunc dai trois a si cjatin cetantis jerbis che si puedin doprâ in cusine ma bisugne cognossile par no cjapâ sù chês velenosis. Il tamar e il urtiçon a fasin un zermuei che si pues doprâ cetant che un sparc intai risots, ma il tamar al à lis fueis in forme di cûr e e à di jessi bulît prin di doprâlu cuant che il urtiçon al è plui ruspiôs cun sfueis a trê pontis simii a chês de cannabis. La talate o pissecjan e je une jerbe garbe doprade par fâ salate. E intal filmut si viodin cetantis altris jerbis che si puedin doprâ…
Inte prime jessude o sin lâts ator par i comunâi che si cjatin su lis culinis denant dal ristorant e ae fin dal zîr o sin rivâts intun roncûl indulâ nus spietave il gustâ improntât da Matteo il cogo dal ristorant, e di bevi a jerin i sirops di saût, sedi chel blanc fat cun lis rosis sedi chel ros fat cun lis pomulis, fats da Rita.
La seconde jessude e je stade fate dilunc il troi che al mene al cjstiel di Zucco ristruturât, parzialmentri, da cualchi an e indulâ o vin podût fermâsi a gustâ il vuardi cun lis jerbis, un pastiç di lasagnis e altris robis cetant buinis. Tant che intal salon dal cjstiel si podeve scoltâ un zovin duo, il “Progetto corde”, in conciert. Il timp une vore biel nus à permitût di gjoldi a plen des dôs zornadis stant in legre compagnie. Un graciis a Matteo e Rita, alla Pro Loco di Colorêt e al circul Legambiente di Udin par ve organizât lis dôs jessudis.
Mandi a ducj !

Look at… the photos: jerbis 2014

Look at… the movie 2013: Le erbe selvatiche @ Faedis (UD)

Look at... the movie: Le erbe selvatiche @ Faedis (UD)

😎

Cors patinaç corse

Istitût Bearzi di Udin

Domenie passade a si è concludût il cors di patinaç corse, li dal centri Bearzi di Udin, tignût dal istrutôr Paoli Bomben dal trop skating Comine di Pordenon, un patinadôr cetant bulo che nus à mostrât la tecniche juste par cori cun i patins.
Un graciis a Carla dal trop inlineskateschool di Udin par vê inmaneât un cors cetant istrutîf.
Mandi a ducj !

Corso di pattinaggio corsa

:mrgreen: