Casera Cregnedul alta

ReImagine Winter

Vuê o vin fate une biele cjaminade dilunc il troi CAI 625 di Nevee fin ae Casere Cregnedul disore par dî vonde ai gnûfs implants par schiâ e par pandi un gnûf mût di vivi la mont… di fat il cambiament dal clime nus impon di tornâ a pensâ lis ativitâts che si puedin fâ in mont, stant che di sigûr no si podarà plui lâ indenant a doprâ la aghe par fâ nêf artificiâl… aghe che e je sempri plui une risorse limitade…po dopo al è il probleme dai coscj, une vore alts, dai implants par schiâ, implants doprâts dome di un 3% de int… di plui la situazion a Nevee e je une vore paradossâl stant che o vin la piste viere, chê che e ven jù dal Bila Pec, che e je sierade di agns e, di chê altre bande, o vin un gnûf progjet di fâ une piste, esponude a Sud 🙆, dongje il troi 625 che e va sù a casere Cregnedul disore… robis di mats po… i fantats dal grup The Outdoor Manifesto a àn inmaneât chest event che si à concludût lì de casere cun i intervents di diviersis personis… graciis a ducj par cheste biele zornade…

Bila Pec
La vecchia pista di sci e il Bila Pec

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Falesia di Braulins

…setôr Eremo

Vint pôc timp o soi lât a fâ un zîr lì de biele glesiute di Sant Michêl a Braulins par dâ un cuc ae crete… achì lis viis a son une vore penzis in particolâr chês a drete de glesiute… di fat “La saggezza e la pazzia” , “Tazormania” e “Progetto Asteryx” 8a/+ a son viis par int come Chen… “Mungitopo” 8a, “Pompamagna” e “Pink Eremo” 7c+ ancje chestis a son viis fatis dome dai climber plui fuarts… jo o ai fate dome une vie a çampe de glesiute e mi visi di vê fat un grum di fadure a sierâle ancje par vie de crete che e je une vore abrasive e e domande une buine tecniche di pîts… po dopo o ai viodût che de ultime volte che o jeri stât a son stadis vierzudis gnovis viis insom a drete, simpri de glesiute, indulà il cret al è stât dut netât e a son stadis spitadis des bielis e lungjis viis e culchiduna ancje sù bielis cjanis… un spetacul maraveôs che mi à jemplât il cûr di gjonde… un graciis di cûr a ducj chei che a àn fat chest biel lavôr… good job, guys !!!
In sumis un cret bielonon ma che al domande une buine tecniche e tante benze, par la cuâl
climb hard or stay home

Chiesetta di San Michele - Braulins
Falesia di Braulins – Settore Eremo

Buinis cjaminadis a ducj !!!

Cjale il filmut 🎥 . . .

#peaceandlove 💙

☮ − ☯ − ☵ − ☸ − 🌍

Rifugio Zacchi

. . . e Lâcs di Fusinis

Parcade, prin des dîs, la machine lì dal lâc disore o ai cjolt la strade biele largje e dute cuvierte di nêf batude che e va sù fin al ripâr Zacchi… dilunc lis voltis indaûr o ai cjatât cetante int che e lave sù a pîts, cun i schîs o cun lis slitis, di fat cheste bariglarie e à une pendence cuasi simpri dolce e e je lungje plui di 5 km par la cuâl vignî jù cun i schîs al è un biel svagament… rivât al ripâr Zacchi, plen di int, o soi lât sù ancjemò un toc dilunc il troi CAI 512 che al va indenant fin ae beorcje indulà lant par il 512/a si rive lì de La Porticina, tant che svoltant a çampe si torne jù rivant al lât disot… dopo vê gustât inte biele boschete in sante pâs o soi tornât indaûr saludant la Ponza tant biele… rivât al parcament daspò une piçule polse, stant la biele zornade soreglade, o soi lât a fâ ancje il zîr ator dai lâcs tant biei, il prin cuasi dut inglaçât e il secont, chel inferiôr, cetant biel cun il riflès dai nui inte aghe… cussì o ai sierât il zîr in cheste zornade spetacular tacade cun la fumate e finide cun il soreli… D+ 550 – 16km …

Ponza
Ponza

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Plan di Vas

…dilunc il troi CAI 227…

E jere une cjalde zornade d’Istât cuant un trop di zovins a tacavin a lâ dilunc il troi des bandis di Sostâs… a pene tacât a cjaminâ a sintirin il rumôr fuart di un scavadôr a bene e fate la svolte lu vioderin lì denant ch’al slargjave il troi spostant la tiere par fâ un stradon… ducj i fantats a restarin scaturîts e biel prest tornant indaûr ur vignî intal cjâf di creâ un grup sù Facebook par difindi il troi e par metisi cussì adun e fâ des manifestazions di proteste fasint sintî la vôs de int ai sorestants che a vevin dât il benstâ a cheste violence sul ambient naturâl…

Il grup “Salviamo i sentieri CAI 227 e 228” al ve di subit un bon acet e ae prime manifestazion inmaneade, di lì a pôc, si cjatarin in tancj a cjaminâ dilunc il troi CAI 227… partîts di Plan di Vas a rivarin fin lì de malghe Tuglia gjoldin, vie pal troi, dal biel paesaç… lenti cualchidun al tacà a fevelà… ducj a jerin dacuardi intal pensâ che fâ un stradon intun puest tant biel no sarès stade une buine idee sedi par vie dai slacs che a vegnin jù cence padin de mont ( viôt la CLPV ) sedi par il rispiet de tante int passionade di lâ a cjaminâ in pâs dilunc di un troi cenglât de mont cjargnele… cualchidun al berlave disint di sbusâ lis gomis dal scavadôr ma chei altris si meterin a ridi… ae fin a deciderin di lâ a tabaiâ cun i sorestants de regjon e cun i sindics dai piçui comuns par displeâ lis lôr motivazions in difese dal troi CAI 227/CAI228…

Dopo ve fevelât cun i sorestants i zovins si inarcuarzerin biel prest di cjatâsi denant un mûr di gome… di fat i sorestants no rivavin a capî lis lôr motivazions e, stant che i lavôrs a jerin bielzà tacâts, a lavin indenant cun il progjet di fâ il stradon par fâ passâ lis motoslitis… eh za, i zovins a vevin capît che cheste e jere la finalitât dal stradon, ven a stai mudâ la mont furlane fasint respirâ smog e fasint davoi tant che in citât… biele robe po… di fat il stradon al varès di unî la Cime di Sapade cun il ripâr Chiampizzulon passant par malghe Tuglia, dilunc il troi CAI227 e il CAI228 e viazant parsore de cuote de boschete tor dai 1600 m e po dopo lâ fin a Sostâs passant pe mont Talm… un biel zirut, pecjât però par i puars animâi e pe int che a varès di patî dut chel rumôr e dut chel incuinament… ancje in chest câs i sorestants a pandevin pocje capacitât di viodi lontant no rivant a creâ armonie jenfri economie e ambient…

A chest pont i zovins si domandarin: “Ce fasìno cumò po?”… par fortune a cualchidun i vignì intal cjâf di lâ a cjalâ lis mapis online e si inacuarzè che suntune mape alc nol jere segnât ben… biel cjalant la mape sul sît idrogeo.isprambiente.it al viodè che no jere segnalade la presince di slacs dilunc il troi CAI 227… visâts i compagns ducj si meterin in opare par capî cemût risolvi il probleme… la storie e va indenant …

Une dì di vore i zovins a larin sù a Rigulât e po dopo a Ludario indulà a parcarin la machine stant che la strade par rivâ a Plan di Vas e jere sierade e cjaminat a rivarin lì dal troi CAI 227 ch’al jere dut cuviert di nêf… tornant indaûr tor lis trê a rivarin a Rigulât e achì si cjatarin denat di lôr dôs camionis che a stavin passant juste apont par chê strade strete, tant che un budiel, e daûr lis camionis a vioderin che si jere formade une biele code dis machinis che a lavin jù biel a planc a planc… cussì a rivarin a capì che une gnove camionabil e cuventave par slizerî il trafic pesant dilunc la SR355 des bandis di For Davôtri, Rigulât e Comelians… parcè che la alternative e jere dome chê di slargjâ la strade regionâl ma cemût si fasie a slargjâ une strade che e passe intal mieç di un piçul paîs?… cussì a cjaparin cussience che une altre strade par rivâ a Cime Sapade di Davâr e coventave, ancje se e lave progjetade ben par rispietâ il plui pussibil l’ambient e mantignî il troi CAI 227… la storie e va indenant …

Climbing Wall
Climbing wall – Piani di Vas

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Il riviel dal 1511

… la crudêl zobja grassa

Tal 1511 la Joibe Grasse e colave juste ai 27 di Fevrâr e, ta chê zornade, si invià il riviel plui grues de storie dal Friûl.
Stiçats de false gnove, butade fûr di Toni Savorgnan (il sassin), che i filoimperiâi a jerin rivâts a Pradaman, cetancj contadins plens di marum a tacarin un riviel cuintri dai nobii udinês. La prime cjase a colâ e fo propit chê dai Della Torre (i Troians), che a stavin de bande dai nobii e dai borghês.
In bandis di vuerilie, i contadins a cjaparin, a meterin a sac e a brusarin cjistiei e palaçs ator par dute la Patrie tant che chei di Vilalte, Murùs, Çopule, Voleson, Spilimberc, Colorêt, Susans, Madrîs, S.Denêl, Feagne, Tarcint e v.i. A bonâ il dut a rivarin il taramot dai 26 di Març che al sdrumà il cjistiel di Udin e la gjandusse che a faserin miârs di muarts.
Il riviel al fo inneât tal sanc, ma lis comunitâts furlanis a cjaparin cussience de lôr fuarce. Une fuarce che ur permetè di tratâ la lôr poie militâr a Vignesie daûr dal rispiet dai lôr dirits e che, cualchi an plui tart, e fasè nassi la Contadinance, orghin rapresentatîf des comunitâts rurâls cence avuâi in Europe. Cussì il 27 di Fevrâr e je deventade la date miôr par celebrâ la Zornade Furlane dai Dirits.
Inalore visinsi simpri dal 27 Fevrâr 1511 par ricjatâ cussience e braure di cui che o sin, par no dismenteâ che i furlans a àn savût lotâ pai lôr dirits.

#FuarceFriûl, simpri !

il riviel dal 1511

#peaceandlove 💙

☮ − ☯ − ☵ − ☸ − 🌍

Val Bartolo

…dilunc il troi des cjasutis bielis

Vuê o vin fate une biele cjaminade simpri inte boschete milenarie di Tarvis ma cheste volte o sin lâts in Val Bartolo cjapant prin il troi CAI 509 e po dopo lant sù drets fin al confin di stât cun l’Austrie, indulà si cjate la tabele “Achtung Staatsgrenze”… une spassizade une vore biele cuntune pendence dolce e che e passe intune valade indulà si puedin viodi tantis bielis cjasutis di len e indulà si cjate ancje la crete par lâ a rimpinâsi… e cuant che si torne indaûr e je la Baita di Beatrice che us da bon acet cuntune buine birute… il disnivel al è di 400 m e si fasin 14 km a/r che intune zornade biele come cheste propit no si sintin…🗻🌞🗻

Un biel cîl turchin
sul cjâf cence nûi
nêf glaçade si disfe

Buinis cjaminadis a ducj !!!

Falesia della Val Bartolo
Falesia della Val Bartolo

#peaceandlove 💙

☮ − ☯ − ☵ − ☸ − 🌍

Gran Monte

. . . Siele Kriz

Vuê o ai fat la prime di Invier dal Grant Mont lant sù par il troi CAI 711 che al tache dal pas di Tanamea e al va sù dilunc il lât Nord de mont… une cjaminade avonde penze par vie de nêf alte, a part il prin toc, che e rint la cjaminade dificil stant che il pît al va dentri di 30 e passe cm ad ogn pas… ad ogni mût o soi rivât a lâ fin in som in graciis des olmis di cualchidun che par fortue al jere za passât di lì e chest mi à cetant judât… rivât in cime la gjonde e je stade massime sedi par il biel panorame sù la mont dute tor ator, sedi par il mâr che si viodeve in lontanance cjalant viers Sud e sedi par il biel soreli che mi à scjaldât il cûr… inte foto di vierzidure o podeis viodi la mont Cjanine in dute la sô bielece… D+ 700 m ma cun la nêf al è come fâ un disnivel di 1000 m… in dut a son ladis 05H … fasint une biele e mertate polse in cime…

. . . Cjale il filmut 🎥 . . .

Lant sù pe cleve
Mi cjali dentri
In som mi busse il soreli

Buinis cjaminadis a ducj !!!

Gran Monte - Sella Kriz - Friuli
Gran Monte – Sella Kriz

#peaceandlove 💙

☮ − ☯ − ☵ − ☸ − 🌍

Mont Stabet

Puanina Tour…

Un biel zîr a anel tacant di Ugovizza e lant sù dilunc il troi CAI 504a fin ae malghe Priu indulà si cjatin ancje lis bielis cjasutis cu la forme di pigne, i nîts d’amôr… e po dopo cjapant il troi par il ripâr Gortani fin ae crosere par la casere Mezesnig… rivâts lì de casere si pues gjoldi di un biel panorame de mont furlane… Mangart, Jôf Fuart e Jôf di Montâs… e di chenti lant jù par il troi panoramic fin a Ugovizza si siere il zîr di plui o mancul 8 km e D+ 600 m… dut il zîr al passe dilunc la biele boschete milenarie di Tarvis in mieç dai peçs…🚶💨💥

Nêf inglaçade
O cjamini salt
Par rivâ al nît d’amôr

Casetta a forma di pigna

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Cappella Zita e malga Rauna

la biele capele dedeade ae imperadore Zita di Borbone…

Une zornade maraveose cuntun cîl turchin/blâf cuasi cence nûi e une lune che nus cjalave lâ sù dilunc dal troi CAI 607 dut biel cuviert di nêf ma ben segnât e batût da chei cun lis cjaspis… e lant sù dilunc la forestâl che passe in mieç de boschete milenarie di Tarvis cuasi no si sint la fadure tant e je la bielece dai peçs ancjemò plens di nêf… nêf che ogni tant e cole jù fasint un biel sunôr e rinfrescjant la muse di nô che i si passave dongje… rivâts lì de malghe Raune o vin fat un pit stop par bevi alc di cjalt e po dopo o sin lâts sù fin ae biele capele Zita… achì il prât di nêf che si intaie cun il cîl ad alt dal cjadin al è un spetacul… e rivâts lì de capele o ai vude une biele sensazion di pâs… po dopo pôc plui ad alt si pues gjoldi di un biel panorame su dutis lis monts… in some o soi stât tant contenton di cheste zornade spetacolâr passade in buine compangnie cuntun soreli ch’al spacave lis pieris e sot di un cîl turchin che no mi visi di vêlu mai viodût tant biel… 😍

Cappella Zita
Cappella Zita – Valbruna Malborghetto Tarvisio

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Forcele Nebria

…in Val Saisera

Vuê o ai fate une biele cjaminade dilunc il troi CAI 658 e CAI 608 rivant fin lì de forcele Nebria a 940 m… po dopo no soi plui rivât a lâ indenant par vie che la nêf sfarinose e jere alte 50 cm e cence rachetis e jere penze… di plui rivât lî de forcele no si viodeve plui il segn dal troi ma dome lis olmis di cualchi puar ungulât… par fortune il timp al jere avonde biel e i nui si viodevin dome in lontance… tornant indaûr o ai cjatât 3 personis che a lavin sù cun lis rachetis ma ancje lôr no jerin mai stâts di chês bandis e come me a lavin a la venture… biel cussì… ad ogni mût e je stade une biele cjaminade sù di un tapët di nêf fofe e lizere… ❄⛄❄

. . . Cjale il filmut 🎥 . . .

Forcella Nebria - Val Saisera

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Il riviel dal 1511

… la crudêl zobja grassa

il riviel dal 1511 Tal 1511 la Joibe Grasse e colave juste ai 27 di Fevrâr e, ta chê zornade, si invià il riviel plui grues de storie dal Friûl.
Stiçats de false gnove, butade fûr di Toni Savorgnan (il sassin), che i filoimperiâi a jerin rivâts a Pradaman, cetancj contadins plens di marum a tacarin un riviel cuintri dai nobii udinês. La prime cjase a colâ e fo propit chê dai Della Torre (i Troians), che a stavin de bande dai nobii e dai borghês.
In bandis di vuerilie, i contadins a cjaparin, a meterin a sac e a brusarin cjistiei e palaçs ator par dute la Patrie tant che chei di Vilalte, Murùs, Çopule, Voleson, Spilimberc, Colorêt, Susans, Madrîs, S.Denêl, Feagne, Tarcint e v.i. A bonâ il dut a rivarin il taramot dai 26 di Març che al sdrumà il cjistiel di Udin e la gjandusse che a faserin miârs di muarts.
Il riviel al fo inneât tal sanc, ma lis comunitâts furlanis a cjaparin cussience de lôr fuarce. Une fuarce che ur permetè di tratâ la lôr poie militâr a Vignesie daûr dal rispiet dai lôr dirits e che, cualchi an plui tart, e fasè nassi la Contadinance, orghin rapresentatîf des comunitâts rurâls cence avuâi in Europe. Ve che alore, chê dai 27 di Fevrâr, e je la date miôr par celebrâ la Zornade Furlane dai Dirits.
Inalore visinsi simpri dal 27 Fevrâr 1511 par ricjatâ cussience e braure di cui che o sin, par no dismenteâ che i furlans a àn savût lotâ pai lôr dirits.

#FuarceFriûl, simpri !

#peaceandlove 💙

☮ − ☯ − ☵ − ☸ − 🌍