13e tape dal Zîr d’Italie

Palme – Cividât

Cividât si è piturade di rose vinars ai 20 di Mai 2016 cuant a son passâts chenti i cicliscj dal Zîr… dut ator ator a jerin flocs, galis, balons e listons in rose… la statue di Juli Cesar e veve intor la maiute rose… la scrite Mandi e jere in rose… dutis lis feminis a vevin intor alc di rose… di plui a jerin cetantis bicicletis piçadis daperdut dutis in rose… o ai ancje viodût la sacume di un gjat in rose… e, no podeve mancjâ, al jere il frico dut rose… une biele atmosfere che si è scjaldade une vore cuant a son passâts i cicliscj in vie Libertât corint cetant fuart, ducj in rie a fâ un biel trenin e cun daûr une file di machinis, lis amiraliis, che no finive plui… e cualchidun ch’al cridave ato viodût Nibali?
Ma ancjemò plui biel al è stât viodi il zîr in TV par vie des ripresis fatis dal elicotar e des motos indulà si viodeve dute la int che e jere dilunc il percors in salide, lis personis che a svintulavin la biele bandiere zale/blu dal Friûl e soredut il spetacul maraveôs des valadis furlanis viodudis dal alt… chest par visâsi di cetant biele che e je la niestre tiere furlane… inalore sperin che a tornin a passâ chenti biel prest… MANDI A DUCJ !!!!!

Look at… the movie: 99° Giro d’Italia – 2016 @ Cividale del Friuli
Look at… the photos: Il Giro d’Italia a Cividale

😎

Marcje des Cisilis

a Cividât

Domenie, 20 Març 2016, e je stade a Cividât la Marcje des Cisilis. Si partive dal “Pala Natisone”, ven a stai il palaç dal sport, indulà si cjatâvisi e po dopo si partive cuant si voleve jenfri lis 08H30 – 09H30… e jere ancje la pussibilitât di sielzi tra trê itineraris di 4-10-24 km… chel plui lunc e rivave fintremai a Madone di Mont, tant che chei altris doi a fasevin un zîr par lis nascuindudis di Cividât rivant fin a Sanguarç indulà al jere il puest di ristorazion… il timp al jere une vore bielon ni masse cjalt ni masse frêt, propit just par fâ une biele cjaminade o cori… di fat in tancj a cjaminavin fermantsi a fâ lis fotos tant che cualchidun une vore bulo al coreve, no savint ce che si pierdeve… Buine Vierte a ducj !

Cjalait dutis lis fotos: Marcia delle Rondini 2016

😎

Pifanie 2016

…a Cividât

Intal 1077, sot dal imperadôr Indrì cuart, al è nassût il Friûl cul non di PATRIE DAL FRIÛL. In chel timp il patriarcje al ere ancje cont. Dal 1077 indenant, il Friûl al è un stat tant indipendent che al à ancje un Parlament e il patriarcje al ere il president e al ere obleât a ubidî a ce che il Parlament al decideve. I nestri patriarcjis a vignivin ducj de Germanie e a jerin int di prime categorie. Intal 1366 e riverà a Cividât MARQUART, un patriarcje di Ausburg, une vore bulo, omp di ciâf, di culture, avocat dai plui grancj dal so secul che nus à dât lis “CONSTITUTIONES PATRIAE FORIJULII“. Savêso ce che al vûl dî? Il codiç dal Friûl che al durerà a dilunc fin tal 1797. Intant che il parlament al durarà fintremai al 1420 cuant je rivade Vignesie, che nus à metut sot e il patriarcje lu à privât dal podê civîl. E intal puest dal patriarcje e à mandât un lutignint, che si è metût a stâ a Udin. Al è par chel che a Udin a àn scomençat a fevelâ venit, par sintîsi di valôr.
Cussì, come par solit, ancje chest an al è stât fat il corteu par visâsi di cuant Marquart al è jentrât in citât ma stant l’inovâl, dai 650 agns, a son stadis inmaneadis cetantis altris robis. Di fat intal dopomisdì inte ex-glesie di S.Francesc al jere un biel conciert cun il côr de parochie, Officiun Consort, che nus à fat scoltâ cualchi cjante antighe finint cun un maraveôs Magnificat. Tant che sot sere in place dal Domo e je stade impiade la fogarisse e a son rivâts, a fânus cjapâ pore, i Krampus di Tarvis intune cun i Tambûrs di vuere di Cividât. In plui in place Juli Cesar al jere un biel mercjât di robe fate a man. Insome une biele Pifanie cun tan frêt ma ancje tante int vivarose.

Look at… the movie: “Epifania 2016 @ Cividale del Friuli ( UD )
Look at… the movie: “Magnificat @ Cividale del Friuli (UD)

Nêf nêf nêf

finalmentri e je rivade

…vuê di matine o vin vût un disveâsi dolç… dut di fûr al jere blanc e la nêf e colave a flocs fofe, morbide, lizere… lant ator pe citât si sintive il scjaf scjaf des rudeis des machinis e il talpetament des scarpis de int inte nêf… par fortune e à molât di neveâ a vonde buinore cussì no son stâts problemas a lâ par lis stradis primariis…

Look at… the movie: Neve Neve Neve @ Cividale del Friuli 2016

😎

BENVIGNÛT 2016

…WELCOME 2016 !

I WISH ALL CLIMBERS AND 0000 SPEED SKATERS 0000 ALL OVER THE WORLD A HAPPY NEW YEAR !!!!!

An gnûf vite gnove, no stait mai a contentâsi di un cûr di seconde man, inalore ad alt i cûrs !

O tacarai chest an 2016 cuntun proponiment e cuntune riflession.

Il proponiment al è chel di judâ chei che a fasin fadure a lâ indenant inte vite e di combati la tindince, dal dì di vuê, di meti dongje masse ricjece intes mans di pocje int, tant che si ledi viers dai mûts di convivence indulà la int e rive a cjatâ lavôr e a mantignî la famee.
La riflession impen e vên de savietât dal Orient lontan:
“La ativitât dai umign e va indenant cence padin; co e rive ae fin e torne di gnûf a scomençâ. Duncje e pues lâ indenant in perpetui. Cuant une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co i umign savis e stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”

WELCOME 2016 ! Look at... the pictures about Grado

😎

Il cistjel di Ahrensperg

o Cistjel dall’Acuile

La strade che e côr dilunvie la rive drete dal Nadison dal puint di S.Quirin fintremai a Pulfar e passe par une zone di fortificazions de ete tarde-romane clamade Vallum Alpium Iuliarum. Di fat cheste strade rivant fin te valade dal Lusinç e jere impuartatone par la cuâl si pense che a sedin stâdis fatis sù une vore di tors par fâ segnalazions, ancje se cumò di dut chest si cjate ben pôc.
Rivant a Biacis, dongje de glesiute di S. Jacum, si cjate il cistjel di Ahrensperg, di ete almancul Langobarde o forsit ancje anteriôr, che apartignive ae int gjermaniche ma che al è stât cjapât da Cividât e po dopo butât jù dal patriarcje Ludovico della Torre intal 1364, e i taramots dal 1511 e 1513 a finirin la opare. Ma si salvarin lis muris che a centavin il cistjel e lis dôs tors. La tor plui piçule, indulà si metevin i prisonîrs, e je chê che o viodin cumò invezit chê altre e fo dal dut butade jù cuant la fabriche di ciment Italcementi e costruî une ferade par puartâ il ciment fûr de gjave di Tarcete.
Intai ultins agns la Universitât dal Friûl al à fat dai sgjâfs archeologjics par cirî di capî la estension dal sît, rivant ad ore a cognossi indulà che si cjatave la tor grande e l’abitazion principâl e permetint la parziâl ricostruzion par cont dal atuâl proprietari. A son stadis, cussì, tiradis sù cuasi dutis lis muris, la piçule tor e l’abitazion secondarie, in plui a son daûr a fâ sù il piçul palatium dal cistjel.
Il troi che e puarte al cistjel al continue e al rive, cuant che al è in bon stât, fintremai ae glesiute di S. Zuan dal Landri.

Look at… the photos: Il Castello di Ahrensperg

Festinparco 2015

a Cividât e intes Valadis dal Nadison

la idee e je chê di rivâ ad ore a fâ un PARC cence confins par podê gjoldi des bielecis naturâls dilunc il Nadison… il progjet al ten dentri dutis lis aministazions indulà al passe il flum, ven a stai Cjaurêt, Taipane, Pulfar, S. Pieri dal Nadison, Cividât, Premariâs, Manzan, S. Zuan dal Nadison, Cjopris Viscon e Trivignan… chestis aministrazions a àn fat un acuardi clamât “contrat di flum” par meti in vore il progjet… tant che la Associazions Parc dal Nadison e à inmaneât Festinparco, une fieste che si davuelç ogni an, dal 2014, par pandi cheste biele idee… e domenie a jerin cetantis robis di podè fâ e nô o sin lâts a fâ il zîr dilunc la ciclabîl FVG-3 organizade dal trop Natison in biciclete e po dopo o vin fat un salt intal landri di Antro intes Valadis dal Nadison… a fâ il zîr in biciclete a jerin une trentine di personis e o vin podût gjoldi de biele zornade lant dilunc lis stadutis che a passin dongje dal Nadison… o sin ancje passâts par Sdricca di Sore indulà intal 1917 al jere stât fat il trop dai “Arditi d’Italia”… po dopo rivâts dongje Manzan o vin cjatât dai troncs di sbighet dilunc dal troi che dinissun ju sposte passe doi agns… ma a part chest piçul probleme a son ancjemò da risolvi cetantis altris robis une vore plui penzis come i depuradôrs des aghis sporcjis che no funzionin, la glerie che e jemple il jet dal flum, i troncs dai arbui che a blochin il regolâr flus de aghe… rivant a Vuelis o sin fermâts a cerçâ alc li dal agriturisim “La Grande Betulla” indulà nus vevin prontât dai plats di afetâts e formadis varis cun des jerbis, salacor une biele pastesute e sarès stât miôr stant che si veve ancjemò di finî il zîr… par di plui nus stavin puartant in taule no sai trops bocâi di vin blanc e neri… va ben che o sin a Friûl cjoc ma no si va indenat dome a vin… e dopo che sul mangjâ pront lis mans o vin slungjât, la voie parant vie, o sin tornâts a pedalâ passant par Levrons, Firman e rivant di gnûf a Cividât li de viele stazion dai trens, indulà si jere partîts… insome une biele zornade tant che cualchidun al à domandât a Stiefin di tornâ a organizâ biel prest un altri zîr… inalore sperant di tornâsi a viodi in curt… mandi a ducj!!!

Look at… the photos: Festinparco 2015

:mrgreen:

Hortus conclusus

a Cividât

A S. Zorz, un borc di Cividât bande Firman, al è un puest indulà si pues stâ in pâs intal mieç de nature. Culì al è cui che al à fat di mancul di tirâ su viletis par mantignî l’ort, i çamps, il bosc, dongje dal Nadison, e une biele glesiute de ete medievâl. Insome un biel puest indulà passâ une zornade in compagnie di int che si dedee ae cognossince de part plui nascuindude dai umign.
A jerin i workshop di Chi Gong, di Danze dal Vintri, di Self Reberthing e l’esperience cun i sunôrs des Cjampanis Tibetanis e sot dai arbui, intai gazebo, si podeve incuintrâ e fevelâ cun i operadôrs. Par di plui Lorenzo, dilunc la zornade, al à inmaneât des visitîs ae glesiute spiegant la sô storie e l’impuartance dai lavôrs che a stan fasint par tignîle di cont.
O ai di saludâ e ringracjâ, in particolâr, chei dal Yoga des Ridadis vint sunât intune.
Mandi a ducj !

Look at… the photos: Il Giardino del Chiostro

😎

Skating Cividât

intes valadis dal Nadison

Gno pari e veve la passion dai patins e inte foto lu si viôt intune cun il sô trop dilunc la strade che da S.Pieri al Nadison e mene viers Pulfero… e jere il 9 di Setembar dal 1939… tant timp fâ… cuant i roller a jerin ancjemò di vignì… e i patins a rodelis che a dopravin a jerin i quad… inte foto, magari cussì no, si viôt dome un toc di ruede e i laçs par tigniur fers… ma mi visi di vê ancje viodût une foto indulà i patins si viodevin ben e o speri di rivâ, prin o dopo, a cjatâle. Gno pari al è il prin a çampe, cjalant la foto,… e alore no veve nancje vincj agns… salacor a jerin i ultins moments cence pinsîrs stant che, juste il 3 di Setembar, e jere tacade in Europe la II vuere mondiâl, par la cuâl i tocjerà, pôc dopo, lâ a fâ la naie che i puartarà vie sîs agns… lant prin cun il mortâl 81 a scombati in Slovenie e daspò, vuidant lis camionis cun trê as, jù a Bari in Pulie…

Look at... the pictures about Valli del Natisone

:mrgreen:

La Cjase Medievâl di Cividât

…la cjase plui viele

Daspò i lavôrs di sistemazion, miercus ai 15 di Avrîl 2015, e je stade screade la Cjase Medievâl di Cividât cuntun incuintri li dal Munistîr di S.Marie in Vâl indulà il sindic Stiefin Balloch, la storiche Silvie Zambon e il responsabil de associazion Ambientarti di Cividât a àn fevelât dal progjet pe sistemazion de cjase e di cualis che a son lis ideis par gjestîle. Il sindic nus à contât di cemût che lis robis a son ladis indenant in timps une vore curts tant che il progjet presentât tal 2013 al è stât metût in vore intal Otubar dal 2014 e al è stât finît juste cumò rispietant lis tabelis. Cun di plui, il progjet di sistemazion e gjestion de cjase intal 2014 al à vinçût il prin premi intal Bant par “Progjets integrâts pubblic/privâts par la realizazion di servizis ricreatîfs e ativitâts culturâls, dentri dal Programe regionâl par il disvilup rurâl 2007/2013, Asse IV Leader”, inmaneât da Gal Tor Nadison. In chest mût il Comun al à podût finanziâ i lavôrs tant che la associazion Ambientarti si è ocupade di sistemâ i ambients didentri.
Par chel che rivuarde la storie de cjase, Silvie nus à contât che al è un studi, fat dal storic cividalês A. Tagliaferri intal ’80, indulà si dîs che forsit la cjase e jere tal prin une Tor, stant la sô forme cuadrade, e che dome daspò il riviel dal 1378, cuant al jere stât butât jù l’alt dal tor, e deventarà la cjase di un artesan. In ogni câs di sigûr si trate di un impuartanton manufat rivât fin ai nestris timps e che si cjate intun borc medievâl une vore biel e ben tignût.
Intes fotos si pues viodi ancje cemût a son stadis sistemadis lis stanziis. Al plan tiere si cjate la buteghe dal oresin e forsit sot e jere ancje une cjanive, al prin plan e je la cjamare di durmî e al secont plan e je logade la cusine, che e je la stanzie plui grande e indulà si cjate il caminet, chest par vie che plui curte e jere la fumarie e mancul pericul al jere che dut al cjapàs fûc. Po dopo, daûr de cjase si cjate un piçul curtîl cuntun porton ch’al dâ su chel altri androne.
Salacor cumò la cjase dute metude a gnûf cun chês pieris a viste e somee un pôc mancul ninine di prime ma, dut câs, o crôt che al sedi stât fat un bon lavôr e che la storie medievâl de nestre biele citât e vedi vût indaûr un toc une vore biel e une testemoneance uniche intal so gjenâr.

Look at… the photos: La Casa Medievale di Cividale

La casa medievale di Cividale

Judoka dal Tenri judo a Cividât

intai agns ’70

Al jere il timp che si faseve judo cun il mestri gjaponês Kuroki, cinture nere di cuint dan, inte palestre dal ex-CAP di Ruvignans a Cividât. Cun Kuroki o sin cjatâts cetant ben. Nus faseve lavorâ une vore ma dut al jere fat in mût di zûc par la cuâl l’alenament e jere plasevul. In plui o vin imparât sedi la dissipline sportive sedi la capacitât di frontâ situazions critichis come lis cjadudis e la difese personâl. Di fat no tant timp fa colant cun la MTB o soi rivât a parâmi propit par vie che o vevi biel za fat gno il mecanisim de cjadude. Mi visi ancje di un gno compagn dal liceu che mi diseve che il tô judo no servìs a nuie inte vite reâl. Inalore i ai dite fasìn une prove chenti, tant che si jere intune palestre dulinvie la ore di giinnastiche. Chel ca al jere une vore plui fuart di me e ancje plui pesant ma cuntune biele mosse o soi rivât a butâlu jù e a jentrâ intune leve. Chest par dîsi che il judo al dâ une buine preparazion fisiche e metût adun al ju-jitzu al permet ancje di difindisi benon. Kuroki nol è stât il sôl mestri gjaponês che o vin vût. Cualchi an dopo al rivarà ancje il mestri Takata, cinture nere di setim dan, ancje lui une vore bulo ma plui vieli e plui seri di Kuroki. Mi displâs dome che par vie dal impegn cun il studi o ai lassât di fâ judo. In ogni câs o puarti simpri intal cûr un biel ricuardi di chel periodi e o speri che lo sedin ancje lis fotos che o cjatâis intai comments 😉
Mandi a ducj !

Manifestazion in difese dai Ospedâi dal Friûl

a Cividât

Vuê, 31 di Zenâr 2015, plui di cinccent personis si son cjatadis aes 11H00 denant dal Ospedâl di Cividât par manifestâ cuintri la riforme sanitarie a pene mitude in vore de zonte Serracchiani. A jerin chei dai comitâts di Glemone, di Sacile, des valadis dal Nadison e di Cividât. In plui a jerin ancje i sindics cun la fasse tricolôr, in primis Stefano Balloch, in rapresentace dal comun di Cividât e dai comuns dulintor. Ma e jere ancje cetante int vignude par pandi la proprie contarietât aes sieltis de assesore Telesca. Come al jere scrit intun cartel: “Sindaci e Cittadini uniti per la Sanità”. Ma viodin ce che e tocjarà al Ospedâl di Cividât. Inte sô schede si lei che a restaran il CUP, par prenotâ i esams, i ambulatoris par fâ lis visitis specialistichis, e reste ancje il centri par il prelêf e la racuelte dal sanc, i 12 puescj par fâ la dialisi, la radiologje tradizionâl e la ecografie, a saràn ancje i 30 puescj jet di RSA, il centri di salût mentâl 24H e chel par lis dipendencis, il centri di riabilitazion e la assistence infiermeristiche a cjase. Impen al sarà sierât il “Pronto Soccorso” 24H e al sô puest al vignarà fat un centri di prin socors 12H, e di conseguence nol sarà plui il repart di medicine tant che al sô puest e vignarà fat un repart di 20 puescj pai cronics e pai post-acûts. Al sarà ancje un Hospice cun 4 puescj jet e un ospedâl di comunitât cun 8 puescj jet gjestît dai miedics di base.
A cjalà ben si capîs subite che si trate di un sisteme une vore ben studiât par sierâ dut un pôc par volte. Di fat nus lassin dome i puescj jet par chei che a son vielis e a àn biel za un pît di là. Par di plui il “Pronto Soccorso”, servint Cividât e dutis lis valadis dal Nadison, e je une strutture une vore impuartantone cence la cuâl une persone che si sint mâl sot sere e à dome la pussibilitât di cori jù fin a Udin par jessi curade. Insome une situazion une vore grivie che no fâs justizie ad une regjon come il Friûl che e à simpri dât tant al Stât talian e che cumò si cjate ad jessi une vore tibiade. Par ches motîf e je stade inmaneade cheste manifestazion a Cividât, par dîsi vonde a ducj i sorestants che no vuelin plui judânus a cambiâ in miôr lis robis. Fuarce Friûl!

Look at… the pictures: Manifestazion pe tutele dai Ospedâi dal Friûl

 Look at... the pictures

😎

BENVIGNÛT 2015

…WELCOME 2015 !

I WISH ALL CLIMBERS AND 0000 SPEED SKATERS 0000 ALL OVER THE WORLD A HAPPY NEW YEAR !

An gnûf vite gnove, no stait mai a contentâsi di un cûr di seconde man, inalore ad alt i cûrs !

O tacarai chest an 2015 cuntun proponiment e cuntune riflession.

Il proponiment al è chel di judâ chei che a fasin fadure a lâ indenant inte vite e di combati la tindince, dal dì di vuê, di meti dongje masse ricjece intes mans di pocje int, tant che si ledi viers dai mûts di convivence indulà la int e rive a cjatâ lavôr e a mantignî la famee.
O pues dîsi, par esperience, che cumò e je int abenade che si profite de crisi par cirî di paiâ pôc i lavoradôrs, une robe tant plui triste par vie che si trate di lavoradôrs che a àn un lavôr a scjadince e che a àn a disposizion dai imprescj par fasi justizie une vore costôs e lents.
Biadelore che la int triste e finìs di rompi i cits !

La riflession impen e vên de savietât dal Orient lontan:
“La ativitât dai umign e va indenant cence padin; co e rive ae fin e torne di gnûf a scomençâ. Duncje e pues lâ indenant in perpetui. Cuant une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co i umign savis e stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”

WELCOME 2015 ! Look at... the pictures about Grado

😎

Fuarce Friûl

sul puint e svintule bandiere zale/blu !

la patrie dal friul

Un bon proponiment par l’an che e ven al è chel di pandi la nestre identitât furlane, rivant ad ore a vinci la antighe vergogne di fevelâ la mari lenghe in public. Mi auguri che la int cuant che si cjate a scuele, par strade, intai lûcs publics e fasedi un piçul sfuarç e, cjapantle a pet, e feveli par furlan. Ma ancje che o tachin a lei e a scrivi par furlan. Si viodin ator dai libris di storie furlane indulà e je dome la jentrade par furlan, masse pôc par mantignî vive une lenghe, cuant e coventarès sedi scrivile sedi leile.
Nus fasarès ancje plasê che intai mass medie, come previodût de leç, a fossin plui spazis par il furlan. Cumò lu si scolte dome par Radio Onde Furlane e 30 minûts par la Rai regjonâl cuant che par altris lenghis minorizzadis i spazis a disposizion a son une vore di plui. Ma par meti in vore chest proponiment e bisugnarès puartâ la sede regjonâl de RAI a Udin e fâ in mût che i gjornaliscj a fossin di marilenghe furlane. Salacor no spindint cetancj bêçs par il teatri Verdi dal cjâf lûc cjarsulin, 14MLN di euros intal 2014, e invistint in culture furlane fuarte.
Une altre robe cetant triste a je stade la leç finanziarie de gnove zonte regjonâl che e gjave, magari cussì no, i finanziaments par l’insegnament dal furlan intes scuelis, lant cuintri dutis lis leçs di tutele dal furlan ma soredut pandint la politiche de çampe viers de lenghe e de identitât furlane. Par il 2015 il nestri proponiment e sarà inalore chel di domandà che il furlan e vegni doprât cetant che lenghe veicolâr intes scuelis dant la pussibiltàt a ducj di imparâ doprant la lenghe mari.
Ancjemò o vin di bataiâ par il non de nestre regjon. O vin voie che sedi dome Friûl. Parcè che un non al è cetant che cjalâsi intal spieli e viodi ce che o sin. E co o cjalìn intal spieli o viodin il Friûl nuie di plui e nuie di mancul. Par la cuâl lis peraulis Vignesie Julie no o rivìn ad ore a capì ce che e stan a fâ. Il podê di Vignesie al è finît da un toc, e ce che nus reste aromai a son dome i palaçs e par chel che al inten la peraule Julie, no si rive a cjatâ un segn intes cjartis gjeografichis. Par la cuâl o domandìn che la nestre regjon e sedi clamade Friûl e vonde.
Une altre riflession nus imponi chel che al è capitât in Friûl al Consorzi des Latariis Furlanis, che cumò al è passât di man deventant de Parmalat, e indulà si previôt che a laràn a cjase une vore di lavoradôrs. In Friûl a son aromai cetantis lis fabrichis che a sierin o a riduzin il numar dai dipendents tant che la situazion e devente simpri plui grivie par vie che cetancj lavoradôrs a àn un contrat a scjadince cun paiis une vore bassis. Si che duncje e sarès ore che la cuistion dal lavôr e vignedi cjapade sul seri mudant lis regulis dal zûc e dant la pussibilitât al sisteme di lâ indenant tignint front ae concorence e permitint a cui che al lavore di puartâ a cjase une paie buine par vivi.
Par di plui i sorestants a van ator a dîsi che a tegnin a la mont e che a fasaran alc par jê ma di fat a àn sierât il Tribunâl di Tumieç gjavant tancj puescj di vore e cumò a son daûr a sierâ ancje il prin socors di Glemone in graciis di une riforme sanitarie che e puarte a centralizâ cuasi ducj i servizis intal ospedâl di Udin bandonant i ospedâi di Latisane, Cividât e Glemone, magari cussì no.
O crodin che par i furlans e sedi dome une pussibilitât par saltâ fûr di cheste situazion cetant nereose, deventâ une regjon autonome cjapant a model la Catalogne indulà i catalans a àn a disposizion cetancj mass media inte lôr mari lenghe, e indulà ducj a fevelin par catalan.
E voaltris cuâi proponiments vêso fat pal 2015 ?

Fuarce Friûl !

BON FINIMENT E BON PRINCIPI A DUCJ !
e un an plen di fortune cun buine lune !

«O ai cirût di volêi ben ae mê tiere furlane, part dal mont, e servintle jê o ai intindût di servî il mont intîr»
Pre Antoni Beline (1941-2007), testament spirituâl, 1992

Bon finiment e Bon principi

😎

Vile Cernazai Pontoni

Diplis di Premariâs (UD)

Dilunc la strade che puarte da Spesse a Diplis si cjate, suntune biele culine, la vile Cernazai Pontoni. Il puest al è une vore preseât par vie che dulintor a son vignâi doc, boscs, prâts, cjistiei e jaciments fossii ancjemò in buine cundizion. Par di plui de culine si pues gjoldi di un biel panorame su dute la plane di Cividât, sui Cuei Orientâi e lis Prealps Juliis. Une vore biel al è il parc zardin dut ator ator de vile cun il broili di pomârs e garofui, diviersis plantis ad alt fust e la sidrere. La vile e je fate a trê plans e e à une forme retangolâr e a son ancje lis cantinis soteraniis. Il denant de vile e cjale a soreli bonât e si slungje infûr suntune terace cun intal mieç un biel poç in piere e fier batût tant che il parapet de terace al è aromai biel za platât des jerbis. La bande secondarie e cjale a Nord viers la strade che e mene in vile. Tacade ae vile ma su un plan plui sot e je la barcjesse che si slungje viers soreli jevât cun doi plans. La vile e à un colôr blanc mentri la barcjesse e je di colôr auriane e no si sa ben cuant e sedi stade fate sù ma si pense che e sedi simil aes vilis venitis furlanis dal prin sietcent. Intai archivis catasticâi austriacs dal 1836 si cjatin lis mapis che a documentin la presince de vile cun cuasi dutis lis dipendencis. Dongje si cjate la capele privade dal palaç dedeade ae Beade Benvignude Boiani di Cividât che e jere stade fate sù intal 1659. La vile intal votcent e jere di proprietât de famee Cernazai di Udin e dentri e jere a stâ Carlo Luigi Cernazai, un studiôs di botaniche e agronom, cetant che il pari, che e rivarà a sperimentâ gnovis tecnichis par selezionâ lis uis e par lis coltivazions. La vile e je ancjemò dotade di un foledôr indulà si pues lavorâ la ue e di une cantine. Intal nûfcent la proprietât e je passade ae baronesse Elisabetta Braida de Chantal e daspò vendude intai agns cincuante a Ines Pontoni di Premariâs che intal 1967 le à donade ae cjase di polse di Cividât cun il vincul di judâ cui che e veve dibisugne. Cumò la vile e je dal Comun di Cividât ma al è in vore un contenziôs denant dal judiç cun i erêts de famee Pontoni. Jù pai ultins cincuante agns la vile e jere abitade da doi pitôrs, Aldo Colò e Pino Mocchiut e e vignive frecuentade da cetancj artiscj. Biel che intal parc fintremai ai agns novante si faseve la mitiche Fieste dal vin di Diplis.
Al dì di vuê, come si viôt ben intes fotos, la vile e je dute bandonade e il palaç al è a risi di vignî jù se cualchidun nol cjate i mieçs par intervignî.
Un comitât di citadins si è dât dongje par sburtâ l’amministrazion comunal a fâ alc. Coordinadore dal comitât e je la siore Cristine Moschioni che si cjate su la pagjine facebook: Ipplis da ritrovare
Si pues ancje dâ un jutori lant sul sît de FAI “i luoghi del cuore” e votant il lûc dal cûr.

Look at… the photos: Cividât ( lis fotos a son chês insom dal album )

Villa Cernazai Pontoni - Ipplis(UD)

😎

Pali di S. Donât 2014

… @ Cividât

Il 22-23-24 di Avost dal 2014 si à davuelt il Pali in onôr dal patron de citât, Sant Donât. Une tradizion popolâr antighe che puarte Cividât indaûr intal timp fintremai al 1200/1300. In chescj dîs si pues tornâ a vivi i timps de Ete di Mieç, indulà i artesans a lavoravin il len, la lane, il corean, la piere e i metai e lis pieris preziosis tant che la int si cjatave la sere intes betulis. Vie par il Pali i cinc borcs si disfidin in dôs garis: la corse e il tîr cun l’arc. Une volte aes garis a cjapavin part ancje i citadins di altris citâts o cjistiei e al jere ancje la corse cun i cjavai. Il moment plui biel di chest avigniment al è il corteu dilunc lis stradis dal centri la domenie matine indulà si puedin viodi i nobiloms compagnâ lis cotesanis, i popolans e i contadins cun i lôr cjars, i soldâts intes lôr armaduris cun lis spadis, i sunadôrs cun il fulzic o il tambûr grant e lis compagniis di saltarins e di bufons. Cuant, po’, e cale la sere cjaminant dilunc lis scuindudis luminadis des cjandelis e somee propit di rivivi chei timps.
Il 20 di Avost dal 1368, la sflandorose Citât di Cividât, e decideve cun leç che il Pali di S.Donât si fos tornât a fâ “par simpri”, par la cuâl si pues pensâ che al jere aromai deventât une manifestazion une vore impuartantone. Si larà indenant a fâlu fintremai al 1797 cuant Napoleon no vûl plui che si fasedi.
Ma intal 2000 il Pali e ven riscuviert e si tache a fâlu insuazantlu inte seconde part dal XIV secul, ven a stai intal periodi dal patriarcjât di Marquardo von Randeck (1368-1382), par vie che chest al è un dai moments storics plui impuartants pal Friûl e par il Patriarcjât. Di fat Marquardo e rive ad ore a fâ la leç “Constitutiones Patriae Forojulienses”, un gnûf ordenament une vore inovatîf par chei timps che e restarà in vore fin a cuant no rive, magari cussì no, il Patriarcjât di Vignesie.
Il Pali si davuelç intal fin di setemane plui dongje ae zornade di S.Donât, il 21 di Avost, e a vegnin fatis lis garis di corse e di tîr cun l’arc e la balestre.
I cinc borcs storics dentri lis muris de citât a son:

Burgo dal Domo: : cun i colôrs e il steme de nobile famee De Portis;
Burgo Brossane: cun i colôrs e il steme de nobile famee Formentini;
Burgo Sant Domeni: cun i colôrs e il steme de nobile famee Canussio
Burgo Sant Pieri: cun i colôrs e il steme de nobile famee Boiani
Burgo Ponti: cun i colôrs e il steme de nobile famee Conti.

stemma Borgo Duomo stemma Borgo Brossana stemma Borgo San Domenico stemma Borgo San Pietro stemma Borgo Ponte

Il borc che al rive a vê plui ponts intes garis al vinç il Pali e al ten il confenon inte sô glesie
Il sît dedeât al avigniment al è paliodicividale.it

1- Look at… the movie: PALIO di SAN DONATO 2014 @ Cividale del Friuli
2- Look at… the pictures: Palio di San Donato 2011
3- Look at… the movie: PALIO di SAN DONATO 2011 @ Cividale del Friuli

Palio di San Donato a Cividale del Friuli

😎