e il lât di Volaia 💙 . . .
Buinis cjaminadis a ducj !!!
Rauchkofel e Lago di Volaia 2023, cjale il filmut 🎥 . . . →
#peaceandlove 💙
☮ − ☯ − ☵ − ☸ − 🌍
Mont Rauchkofel
Tag: Coglians
Pal Piccolo
. . . lis cretis e lis trinceis
Vuê o ai fat un biel zîr bandis dal Pas Mont di Crôs par lâ a viodi lis cretis indulà che si fasarà Arrampicarnia 2023 e cussì o ai cjapât il troi CAI 401 che al tache li dal ampli parcament e al va sù fasint une biele sarpentine no masse impegnative… in pôc timp o soi rivât lì dal bigul ven a stai il pilasti De Infanti e subite dopo, continuant a lâ indenant, o soi passât dongje des parêts furnidis di spit… la Grotta dei Fucilieri, Emmenthal, Scogliera sinistra, Scogliera destra e La X… lis cretis a son une vore bielis ma a àn une esposizion a Sud par la cuâl al è miôr rivâ di buinore par no patî il cjalt… passadis lis cretis il troi al va sù fintremai al Pal Piccolo indulà che si cjate un biel sisteme di difese cun cetantis trinceis che a somein a un labirint di stradis intorteadis di un piçul paîs… rivant lì de crôs si pues amirâ la mont Coliàns e il biel lât inte valade austriache… us consei cuant che o rivais sot dal Pal Piccolo ( a 1800 m ) di lâ indenat drets e no svoltâ a drete… cussì si rive lì de stazion de teleferiche e po dopo cjapant il troi storic si passe intune trincee e si rive intune piçule ferade che e puarte juste sot de crôs… in chest mût si fâs un biel zirut ad anel rivant a viodi dutis lis trinceis… visaisi ancje di puartâ di bevi avonde aghe par vie che il troi al è cuasi simpri in batude di soreli… a son dai tocs indulà il troi al è un tic esponût ma non son problemas par vie che al è simpri biel larc e a son ancje des cuardis di açâl intai puescj plui pericolôs… insome une biele cjaminade no masse impegnative… D+ 1082 m – A/R 6,1 Km…
Pal Piccolo 2023, cjale il filmut 🎥 . . . –>
Buinis cjaminadis a ducj !!!
#peaceandlove 💙
☮ − ☯ − ☵ − ☸ − 🌍
Creta di Timau
…Ch’e vadi il to pinsîr a ce che plui ti è cjâr… come il miò sunâ libar e clâr…
Cuant che, domenie passade 21/08/2022, o soi rivât a casere Pramosio Alte tor lis 09H45 al jere biel za cjaldut, l’aiar al soflave ben e il parcament al jere cuasi dut plen ma par fortune o ai cjatât un puest… tor lis 10H00 o soi partît dilunc il troi CAI402 par là sù al lât di Avostanis ma cheste volte la prime tape nol jere il lât ma la Crete di Timau che cuant che tu tu rivis a Cleulis tu tu la viodis denant biele e imponent… passade la malghe delle Manze e pôc prime di rivâ al lât o ai cjapât un troi a cjampe che al puarte fin sù la cime de Crete e daspò plui o mancul une cuarantine di minûts o ai tacât la parêt furnide di cuarde di açâl rivant cussì insom de Crete pôc prime di misdì… di lassù in graciis di un cîl net si podevin viodi dutis lis mont… il Colians al faseve biele mostre di se propit li denant ma slungjant il voli fin là jù si podevin ancje viodi la Tofane il Pelmo e di chê altre bande il Mangart e il Triglav e tantis altris montagnis… un spetacul bielonon… cuant che o soi rivât in cime l’aiar al jere bielzà cuietât e no jere int ma daspò une mieze orute si jere in une cuindisine di personis… dutis impegnadis a fâ lis fotos e a nomenâ lis monts che si rivavin a viodi, tant che un zovin al à fat svolâ il drone… dopo vê mangjât e vê polsât un pôc e saludadis lis bielis fantatis di Udin o soi lât viers la siele di Avostanis cjolint un troi ch’al traverse e al puarte parsore dal lât fin lì de crete prin des rivis de mont Avostanis… achì bisugne fâ un grum di atenzion stant che il troi al zire ator de crete lant prime sù e po dopo lant di ribe jù viers la siele e deventant une vore stret, esponût e plen di jerbe… rivâts li de siele il plui al è fat… e o ai podût tacâ la mont Avostanis rivant in cime dopo vê fat une ribe in sù avonde tirade… de piche, dividude jenfri Italie e Austrie, o ai potût gjoldi di un biel panorame sù la valade austriache e di un biel grifon che al svolave in cîl cun lis sôs alis tant largjis… di chì dute ribe jù fin al lât che tor lis trê al jere plen di int, frutins e cjans tant che sù la parêt li dongje cualchidun al tacave a rimpinâsi… in sumis o pues dî che e je stade une zornade bielonone ma ancje une zornade, par me, storiche stant che o soi rivât a meti insiemi dôs cimis di passe 2000 m… une biele sodisfazion… inalore…
Buinis cjaminadis a ducj !!! 🗻