Dilunc il lât di Ossiacher

in Austrie

Ducj intune, bikers e skaters, o sin cjatâts domenie passade dilunc lis stradis dal lât di Ossiacher, che pe ocasion a vegnin sieradis aes machinis… il percors e côr dut intor dal lât ma si pues rivâ fintremai dal paîs di Fieldkirchen fasint cualchi km in plui, in dut une cuarantine di kilometros… si trate di un percors cetant biel ma no tant facil par vie che a son tancj sù e jù che a impegnin une vore… in ogni câs si à a disposizion dut il timp stant che si partìs aes 10H00 e si à timp fin aes 15H00 par finî il zîr… chest an e jere tante int soredut tancj bikers, tant che i skaters, plui o mancul, a jerin simpri chei cun tancj di lôr che a vignivin di Udin… di fat a jerin sedi chei dal Inlineskateschool, sedi chei dal mitic Gru, il trop plui grant di patindors in dute la regjon… in place a Fieldkirchen o sin fermâts al bar indulà o vin cjatât il Campa che nus à contât des prossimis jessudis dal Gru e in particolâr di une gnove in programe cetant bielone, par la cuâl… stay tuned… daspò tornâts indaûr prime di rivâ dilunc il lât no si podeve no fâ tape li dal ristorantut indulà a fasin la trute “Blau”, ma par vie che e jere cetante int e al jere une vore di spietâ, magari cussì no, o vin dovût contentâsi dome di bevi alc… il vin culì al coste un bot, miôr butâsi su la bire… la zornade cjalde si faseve sintî e no si podeve lâ indenat cence un biel spritzeton… dopo a dute o vin fate la strade che nus à menât fintremai a St.Andra dongje dal parcament… il biel al è stât che ducj e doi i trops dai patinadôrs di Udin, cence visâsi, si son cjatâts ae stesse ore ae fin dal zîr… mandi a ducj…

Look at… the photos: Ossiacher See

😎

Dilunc la piste ciclabile Aquilee-Grau

all along the path-line

La ciclabile che da Servignan e puarte a Grau e je stade fate di pôc par la cuâl no viodevi la ore di lâ a provâle cun i patins. Domenie passade, finalmentri, o vin decidût di lâ a fâ un zîr di chês bandis e o sin cjatâts a Servignan indulà la ciclabîl e partîs. Il timp al jere bielon ancje se, come par solit in chest periodi, l’aiar no mancjave. No jere bore ma aiar di siroc, cussì lant viers Grau e si veve l’aiar in muse, biel che tornant nus sburtave un pôc. Il prin toc di ciclabîl, saltant fûr di Servignan, al è biel passant intal mieç di un parc e parsore di un puint di len ancje se a son une vore di tombins par la cuâl bisugne stâ atents. Rivant ad Aquilee, la piste e rive propit dongje i sgjâfs archeologjics, e chenti si pues gjoldi des bielecis archeologjichis de ete romane. Po dopo, rivant sul puint che coleghe la tiere ae isule d Grau, si cjatâsi denat il blu dal mâr cun il sô fuart odôr, une maravee… cuant che si rive ae fin dal puint indulà e finîs la ciclabîl e mancje ancjemò di traviersâ il puint mobil par rivâ a Grau… chenti bisugne fâ une vore di atenzion, par vie che no je une bancjine indulâ podê cori ma bisugne passâ dilunc la strade cuant no son lis machinis… in ogni câs si trate di un toc curt… daspò, par lis nascuindudis, si rive sul viâl dilunc dal mâr… in sumis, une biele ciclabîl avonde largje indulà si pues ancje cori e salacor fâle di buinore o crôt che al sedi une cjosse fantastiche…

Look at… the photos: la piste ciclabile Servignan-Grau

:mrgreen:

Anìn a grîs

usgnot

Une bielissime poesie, plene di sintiment, di Marie Grazie Di Glerie e devente une cjante interpretade de biele vôs di Alice. La musiche e je di Marco Liverani. Look at… the movie: Anìn a grîs

Anìn a grîs usgnot
jenfri jerbe e tiere
dongje il Tiliment.
Anìn a pièrdisi tal scûr
fra sterps e cîl
cence carnîrs nè bêçs.

Siôrs di libertât a racuei
grignei di vite e respîrs di ajar net
e a durmî di voie sul jèt
d’arint da l’aghe cence pore d’inneâsi
marivèe di sanc lontan da gilugne
e dal lisp dai simiteris.

Anìn a grîs usgnot
jenfri erbe e tiere.
Anìn a grîs usgnot
dongje il Tiliment.

Anìn a stelis usgnot
cun voi discolçs e musiche
tal flât cjalt da nestre piçule poesie.

Siôrs di libertât a racuei
grignei di vite e respîrs di ajar net
e a durmî di voie sul jèt
d’arint da l’aghe cence pore d’inneâsi
marivèe di sanc lontan da gilugne
e dal lisp dai simiteris.

Anìn a grîs usgnot
jenfri jerbe e tiere.
Anìn a grîs usgnot
dongje il Tiliment.

La Cjase Medievâl di Cividât

…la cjase plui viele

Daspò i lavôrs di sistemazion, miercus ai 15 di Avrîl 2015, e je stade screade la Cjase Medievâl di Cividât cuntun incuintri li dal Munistîr di S.Marie in Vâl indulà il sindic Stiefin Balloch, la storiche Silvie Zambon e il responsabil de associazion Ambientarti di Cividât a àn fevelât dal progjet pe sistemazion de cjase e di cualis che a son lis ideis par gjestîle. Il sindic nus à contât di cemût che lis robis a son ladis indenant in timps une vore curts tant che il progjet presentât tal 2013 al è stât metût in vore intal Otubar dal 2014 e al è stât finît juste cumò rispietant lis tabelis. Cun di plui, il progjet di sistemazion e gjestion de cjase intal 2014 al à vinçût il prin premi intal Bant par “Progjets integrâts pubblic/privâts par la realizazion di servizis ricreatîfs e ativitâts culturâls, dentri dal Programe regionâl par il disvilup rurâl 2007/2013, Asse IV Leader”, inmaneât da Gal Tor Nadison. In chest mût il Comun al à podût finanziâ i lavôrs tant che la associazion Ambientarti si è ocupade di sistemâ i ambients didentri.
Par chel che rivuarde la storie de cjase, Silvie nus à contât che al è un studi, fat dal storic cividalês A. Tagliaferri intal ’80, indulà si dîs che forsit la cjase e jere tal prin une Tor, stant la sô forme cuadrade, e che dome daspò il riviel dal 1378, cuant al jere stât butât jù l’alt dal tor, e deventarà la cjase di un artesan. In ogni câs di sigûr si trate di un impuartanton manufat rivât fin ai nestris timps e che si cjate intun borc medievâl une vore biel e ben tignût.
Intes fotos si pues viodi ancje cemût a son stadis sistemadis lis stanziis. Al plan tiere si cjate la buteghe dal oresin e forsit sot e jere ancje une cjanive, al prin plan e je la cjamare di durmî e al secont plan e je logade la cusine, che e je la stanzie plui grande e indulà si cjate il caminet, chest par vie che plui curte e jere la fumarie e mancul pericul al jere che dut al cjapàs fûc. Po dopo, daûr de cjase si cjate un piçul curtîl cuntun porton ch’al dâ su chel altri androne.
Salacor cumò la cjase dute metude a gnûf cun chês pieris a viste e somee un pôc mancul ninine di prime ma, dut câs, o crôt che al sedi stât fat un bon lavôr e che la storie medievâl de nestre biele citât e vedi vût indaûr un toc une vore biel e une testemoneance uniche intal so gjenâr.

Look at… the photos: La Casa Medievale di Cividale

La casa medievale di Cividale

Judoka dal Tenri judo a Cividât

intai agns ’70

Al jere il timp che si faseve judo cun il mestri gjaponês Kuroki, cinture nere di cuint dan, inte palestre dal ex-CAP di Ruvignans a Cividât. Cun Kuroki o sin cjatâts cetant ben. Nus faseve lavorâ une vore ma dut al jere fat in mût di zûc par la cuâl l’alenament e jere plasevul. In plui o vin imparât sedi la dissipline sportive sedi la capacitât di frontâ situazions critichis come lis cjadudis e la difese personâl. Di fat no tant timp fa colant cun la MTB o soi rivât a parâmi propit par vie che o vevi biel za fat gno il mecanisim de cjadude. Mi visi ancje di un gno compagn dal liceu che mi diseve che il tô judo no servìs a nuie inte vite reâl. Inalore i ai dite fasìn une prove chenti, tant che si jere intune palestre dulinvie la ore di giinnastiche. Chel ca al jere une vore plui fuart di me e ancje plui pesant ma cuntune biele mosse o soi rivât a butâlu jù e a jentrâ intune leve. Chest par dîsi che il judo al dâ une buine preparazion fisiche e metût adun al ju-jitzu al permet ancje di difindisi benon. Kuroki nol è stât il sôl mestri gjaponês che o vin vût. Cualchi an dopo al rivarà ancje il mestri Takata, cinture nere di setim dan, ancje lui une vore bulo ma plui vieli e plui seri di Kuroki. Mi displâs dome che par vie dal impegn cun il studi o ai lassât di fâ judo. In ogni câs o puarti simpri intal cûr un biel ricuardi di chel periodi e o speri che lo sedin ancje lis fotos che o cjatâis intai comments 😉
Mandi a ducj !

La crudêl zobja grassa

il riviel dal 1511 in Friûl

il riviel dal 1511 Tal 1511 la Joibe Grasse e colave juste ai 27 di Fevrâr e, ta chê zornade, si invià il riviel plui grues de storie dal Friûl.
Stiçats de false gnove, butade fûr di Toni Savorgnan, che i filoimperiâi a jerin rivâts a Pradaman, cetancj contadins plens di marum a tacarin un riviel cuintri dai nobii udinês. La prime cjase a colâ e fo propit chê dai Della Torre (i Troians), che a stavin de bande dai nobii e dai borghês.
In bandis di vuerilie, i contadins a cjaparin, a meterin a sac e a brusarin cjistiei e palaçs ator par dute la Patrie tant che chei di Vilalte, Murùs, Çopule, Voleson, Spilimberc, Colorêt, Susans, Madrîs, S.Denêl, Feagne, Tarcint e v.i. A bonâ il dut a rivarin il taramot dai 26 di Març che al sdrumà il cjistiel di Udin e la gjandusse che a faserin miârs di muarts.
Il riviel al fo inneât tal sanc, ma lis comunitâts furlanis a cjaparin cussience de lôr fuarce. Une fuarce che ur permetè di tratâ la lôr poie militâr a Vignesie daûr dal rispiet dai lôr dirits e che, cualchi an plui tart, e fasè nassi la Contadinance, orghin rapresentatîf des comunitâts rurâls cence avuâi in Europe. Inalore, par nô furlans, chê dai 27 di Fevrâr, e je la date miôr par celebrâ la Zornade Furlane dai Dirits.
A cheste zornade, di aromai 504 agns indaûr ma simpri intal nestri cûr, radio Onde Furlane e dedee lis trasmissions dal 27 Fevrâr 2014 par ricjatâ cussience e braure di cui che o sin, par no dismenteâ che i furlans a àn savût lotâ pai lôr dirits.

Fuarce Friûl, simpri !

Casa della Contadinanza a Udine

😎

Oh Romeo, Romeo

cussì suspirave Giulietta co Romeo, di sot il sô barcon, i diseve peraulis dolcis

Ma cuant e indulà e nâs la storie dei doi inamorâts?
Nus contin dut intun libri Albino Comelli e Francesca Tesei dal titul “Giulietta e Romeo. L’origine friulana del mito“.
E jere il 26 di Fevrâr dal 1511, cuant, inte fieste a palaç dai Savorgnan, Gigi Da Porto s’inamore di Lucine Savorgnan Del Torre. Ma la dì dopo, ven a stai il 27 Fevrâr 1511, in Friûl si discjadene un trement riviel, il riviel de “Crudêl zobie Grasse”, e lis lôr fameis a si cjatarin une cuintri di chê altre. Gigi Da Porto e contarà dute la storie intun libri e su cheste conte Shakespeare al fondarà la sô opare.

Look at… the photos: Dolce amistât

Dolce amistat

Mostre dedeade a Harry Bertoia

Dae Nature al Segn

Wire Chair by Harry Bertoia (1948) “Dalla natura al segno” chest il titul de mostre dedeade al furlan, plui cognossût in Americhe dopo Carnera, Arieto ( Harry ) Bertoia, a cent agns dae sô nassite. La mostre si vierzarà sabide ai 7 di Fevrâr 2015 e larà indenant fintremai ai 29 di Març 2015 e e sarà logade in doi puescj: la Galarie Harry Bertoia a Pordenon e la cjase indulà al è nassût a S. Lurinç Darzin (Pn). Di fat nassût il 10 Març 1915 a S. Lurinç Darzin intune famee di contadins, al veve scuviert fin di frut la sô passion par la lavorazion dai metai divertintsi a fâ sculturis cun il fier intal cjast di cjase. Intal 1930 migrât cun il pari intai Usa e rivarà a coltivâ la passion par l’art frecuentant lis scuelis tant innomenadis di Detroit e di Bloomfield Hills. Po dopo e deventarà cognossût in dut il mont par i sôs lavôrs tant che designer, famose la sô cjadree Diamond in tondel di açal cromât. Cumò cualchiduna des sôs oparis si cjatin al Guggenheim di New York e intal Vitra Design Museum. Di plui la sô passion pe Nature, e in particolâr pe campagne furlane, lu puartarà a meti in vore des sculturis che a sunin cun l’aiar e a cjapin ispirazion dal sunôr de aiar intun cjamp di blave.
Noaltris o ven voie di ricuardâlu cun lis sôs peraulis:

L’uomo non è importante
l’umanità è ciò che conta, alla quale credo
di aver dato il mio contributo.
L’umanità continuerà anche senza di me
ma io non vado via, non vi lascio.
Ogni volta che vedrete le cime degli alberi,
mosse dal vento, voi penserete a me;
o se vedrete un fiore, penserete a me.
Non sono mai stato religioso, non in modo
formale, ma quando camminavo nel bosco
sentivo la presenza di una forza superiore
intorno a me.

Look at… the photos: Arieto Bertoia

Harry Bertoia, San Lorenzo d’Arzene, 10 marzo 1915 – Barto, 6 novembre 1978

Mandi di cûr !

Manifestazion in difese dai Ospedâi dal Friûl

a Cividât

Vuê, 31 di Zenâr 2015, plui di cinccent personis si son cjatadis aes 11H00 denant dal Ospedâl di Cividât par manifestâ cuintri la riforme sanitarie a pene mitude in vore de zonte Serracchiani. A jerin chei dai comitâts di Glemone, di Sacile, des valadis dal Nadison e di Cividât. In plui a jerin ancje i sindics cun la fasse tricolôr, in primis Stefano Balloch, in rapresentace dal comun di Cividât e dai comuns dulintor. Ma e jere ancje cetante int vignude par pandi la proprie contarietât aes sieltis de assesore Telesca. Come al jere scrit intun cartel: “Sindaci e Cittadini uniti per la Sanità”. Ma viodin ce che e tocjarà al Ospedâl di Cividât. Inte sô schede si lei che a restaran il CUP, par prenotâ i esams, i ambulatoris par fâ lis visitis specialistichis, e reste ancje il centri par il prelêf e la racuelte dal sanc, i 12 puescj par fâ la dialisi, la radiologje tradizionâl e la ecografie, a saràn ancje i 30 puescj jet di RSA, il centri di salût mentâl 24H e chel par lis dipendencis, il centri di riabilitazion e la assistence infiermeristiche a cjase. Impen al sarà sierât il “Pronto Soccorso” 24H e al sô puest al vignarà fat un centri di prin socors 12H, e di conseguence nol sarà plui il repart di medicine tant che al sô puest e vignarà fat un repart di 20 puescj pai cronics e pai post-acûts. Al sarà ancje un Hospice cun 4 puescj jet e un ospedâl di comunitât cun 8 puescj jet gjestît dai miedics di base.
A cjalà ben si capîs subite che si trate di un sisteme une vore ben studiât par sierâ dut un pôc par volte. Di fat nus lassin dome i puescj jet par chei che a son vielis e a àn biel za un pît di là. Par di plui il “Pronto Soccorso”, servint Cividât e dutis lis valadis dal Nadison, e je une strutture une vore impuartantone cence la cuâl une persone che si sint mâl sot sere e à dome la pussibilitât di cori jù fin a Udin par jessi curade. Insome une situazion une vore grivie che no fâs justizie ad une regjon come il Friûl che e à simpri dât tant al Stât talian e che cumò si cjate ad jessi une vore tibiade. Par ches motîf e je stade inmaneade cheste manifestazion a Cividât, par dîsi vonde a ducj i sorestants che no vuelin plui judânus a cambiâ in miôr lis robis. Fuarce Friûl!

Look at… the pictures: Manifestazion pe tutele dai Ospedâi dal Friûl

 Look at... the pictures

😎

L’art dal riciclâ

a Manzan

Intai ultins agns a Manzan la crisi economiche e je stade cetant nereose, une vore di aziendis a àn sierât negozi, e i capanons indulà prin si lave a vore a son restâts vueits, ma no ducj. In cualchidun si fâs ancjemò alc di gnûf e innovatîf in graciis di personis che a àn savût creâsi une gnove ativitât. Livio Fantini e je une di chestis.
La sô vite i veve dât une grande capacitât di doprâ i imprescj di vore ma cumò dut e coreve il risi di pierdisi se no ves vût cûr di metîsi in zûc rivant a tirâ fûr il sô lât artistic. Cussì cuant che lu si incontre intal capanon, intal mieç de sôs sculturis, si capîs subite che si trate di un om plen di energje e voie di fâ. Di plui la sô sensibilitât ai problemis dal ambient lu àn puartât a sielzi di doprâ cetancj materiâi di recupar. Intal sô laboratori no si bute nuje e dut e cjate, planc plancot, une forme e un puest indulà stâ. Intal atelier a son in mostre lis oparis plui impuartantis, chenti si viôt une biele Venere furlane in len di cedri, dei cesens in amôr, dai pes in piere piasentine, une rapresentazion dal infinît in marmul e un biel leon in… tant che intal laboratori a son i bancs di vore e indulà si cjatin ancje dutis lis sculturis fatis cun i fruçons, ven a stai animâi, zûcs, anei e v.i. che si puedin viodi intes fotos.

Look at… the pictures: Livio Fantini Lab

 Look at... the pictures

:mrgreen:

Mirok e il pignarûl 2015

Mirok the scarecrow and Gina the lark

Une gnove striche di Mirok il pipinat e Gine la lodule…

Mirok e il pignarûl

– Mandi Mirok !
– Mandi Gine, sêstu lade a viodi il pignarûl ?
– Po sì, o soi lade sù a Cuie di Tarcint.
– E il fum di ce bande ise lât ?
– E butave dut a misdì….
– Alore e sarà un an garp…
– Po ben, fasìnsi anim un cun chel altri.
– Ad alt i cûrs, simpri !.

😎

BENVIGNÛT 2015

…WELCOME 2015 !

I WISH ALL CLIMBERS AND 0000 SPEED SKATERS 0000 ALL OVER THE WORLD A HAPPY NEW YEAR !

An gnûf vite gnove, no stait mai a contentâsi di un cûr di seconde man, inalore ad alt i cûrs !

O tacarai chest an 2015 cuntun proponiment e cuntune riflession.

Il proponiment al è chel di judâ chei che a fasin fadure a lâ indenant inte vite e di combati la tindince, dal dì di vuê, di meti dongje masse ricjece intes mans di pocje int, tant che si ledi viers dai mûts di convivence indulà la int e rive a cjatâ lavôr e a mantignî la famee.
O pues dîsi, par esperience, che cumò e je int abenade che si profite de crisi par cirî di paiâ pôc i lavoradôrs, une robe tant plui triste par vie che si trate di lavoradôrs che a àn un lavôr a scjadince e che a àn a disposizion dai imprescj par fasi justizie une vore costôs e lents.
Biadelore che la int triste e finìs di rompi i cits !

La riflession impen e vên de savietât dal Orient lontan:
“La ativitât dai umign e va indenant cence padin; co e rive ae fin e torne di gnûf a scomençâ. Duncje e pues lâ indenant in perpetui. Cuant une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co i umign savis e stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”

WELCOME 2015 ! Look at... the pictures about Grado

😎

Fuarce Friûl

sul puint e svintule bandiere zale/blu !

la patrie dal friul

Un bon proponiment par l’an che e ven al è chel di pandi la nestre identitât furlane, rivant ad ore a vinci la antighe vergogne di fevelâ la mari lenghe in public. Mi auguri che la int cuant che si cjate a scuele, par strade, intai lûcs publics e fasedi un piçul sfuarç e, cjapantle a pet, e feveli par furlan. Ma ancje che o tachin a lei e a scrivi par furlan. Si viodin ator dai libris di storie furlane indulà e je dome la jentrade par furlan, masse pôc par mantignî vive une lenghe, cuant e coventarès sedi scrivile sedi leile.
Nus fasarès ancje plasê che intai mass medie, come previodût de leç, a fossin plui spazis par il furlan. Cumò lu si scolte dome par Radio Onde Furlane e 30 minûts par la Rai regjonâl cuant che par altris lenghis minorizzadis i spazis a disposizion a son une vore di plui. Ma par meti in vore chest proponiment e bisugnarès puartâ la sede regjonâl de RAI a Udin e fâ in mût che i gjornaliscj a fossin di marilenghe furlane. Salacor no spindint cetancj bêçs par il teatri Verdi dal cjâf lûc cjarsulin, 14MLN di euros intal 2014, e invistint in culture furlane fuarte.
Une altre robe cetant triste a je stade la leç finanziarie de gnove zonte regjonâl che e gjave, magari cussì no, i finanziaments par l’insegnament dal furlan intes scuelis, lant cuintri dutis lis leçs di tutele dal furlan ma soredut pandint la politiche de çampe viers de lenghe e de identitât furlane. Par il 2015 il nestri proponiment e sarà inalore chel di domandà che il furlan e vegni doprât cetant che lenghe veicolâr intes scuelis dant la pussibiltàt a ducj di imparâ doprant la lenghe mari.
Ancjemò o vin di bataiâ par il non de nestre regjon. O vin voie che sedi dome Friûl. Parcè che un non al è cetant che cjalâsi intal spieli e viodi ce che o sin. E co o cjalìn intal spieli o viodin il Friûl nuie di plui e nuie di mancul. Par la cuâl lis peraulis Vignesie Julie no o rivìn ad ore a capì ce che e stan a fâ. Il podê di Vignesie al è finît da un toc, e ce che nus reste aromai a son dome i palaçs e par chel che al inten la peraule Julie, no si rive a cjatâ un segn intes cjartis gjeografichis. Par la cuâl o domandìn che la nestre regjon e sedi clamade Friûl e vonde.
Une altre riflession nus imponi chel che al è capitât in Friûl al Consorzi des Latariis Furlanis, che cumò al è passât di man deventant de Parmalat, e indulà si previôt che a laràn a cjase une vore di lavoradôrs. In Friûl a son aromai cetantis lis fabrichis che a sierin o a riduzin il numar dai dipendents tant che la situazion e devente simpri plui grivie par vie che cetancj lavoradôrs a àn un contrat a scjadince cun paiis une vore bassis. Si che duncje e sarès ore che la cuistion dal lavôr e vignedi cjapade sul seri mudant lis regulis dal zûc e dant la pussibilitât al sisteme di lâ indenant tignint front ae concorence e permitint a cui che al lavore di puartâ a cjase une paie buine par vivi.
Par di plui i sorestants a van ator a dîsi che a tegnin a la mont e che a fasaran alc par jê ma di fat a àn sierât il Tribunâl di Tumieç gjavant tancj puescj di vore e cumò a son daûr a sierâ ancje il prin socors di Glemone in graciis di une riforme sanitarie che e puarte a centralizâ cuasi ducj i servizis intal ospedâl di Udin bandonant i ospedâi di Latisane, Cividât e Glemone, magari cussì no.
O crodin che par i furlans e sedi dome une pussibilitât par saltâ fûr di cheste situazion cetant nereose, deventâ une regjon autonome cjapant a model la Catalogne indulà i catalans a àn a disposizion cetancj mass media inte lôr mari lenghe, e indulà ducj a fevelin par catalan.
E voaltris cuâi proponiments vêso fat pal 2015 ?

Fuarce Friûl !

BON FINIMENT E BON PRINCIPI A DUCJ !
e un an plen di fortune cun buine lune !

«O ai cirût di volêi ben ae mê tiere furlane, part dal mont, e servintle jê o ai intindût di servî il mont intîr»
Pre Antoni Beline (1941-2007), testament spirituâl, 1992

Bon finiment e Bon principi

😎

Un voli viers il cret

indulà rimpinâsi al è maravee

Look at... Scudo movie
O sin rivâts ae fin dal an e al è timp di fâ un belanç ancje par webandana.com, inalore tachin cjalant i dâts di Google:
lis visitis a son stadis 29.505
i visitadôrs unics 21.186
lis pagjinis viodudis 134.489
I rimpinadôrs che a an fat il Test inte sezion training a son stâts: 8286.

Ma butant il voli plui inlà dai numars, o vin di impensâsi che chest an a son stadis viertis dôs bielis cretis in Friûl, ven a stai:
1- La crete dal Mont Stele, dongje Tarcint, indulà si cjatin une ventine di viis.
2- La crete dal Zardin dai Clapons, dongje Cjavaç, indulà a son une cuindisine di viis.
Il mês di Setembar al à viodût il cret de Cjargne e dal Glemonês protagonist dal meeting “Find your way” indulà tancj rimpinadôrs si son cjatâts ducj intune e indulà a jerin ancje Adam Ondra e Silvio Reffo. Adam, come par solit, al è rivât a maraveâ ducj viersint une gnove vie  intal cret dal pas di Mont di Crôs.
E je stade fate une propueste par sistemâ la viele stazion dai trens di Cividât fasintle deventâ un climbing center ma… i nestris sorestants a vuelin fâle deventâ un museu de Prime Vuere Mondiâl, magari cussì no.
O sin daûr a pensâ di fâ in mut che si puedin viodi off-line lis pagjinis inte sezion de Falesie.
La comunitât di rimpinadôrs di webandana.com si cjate su Twitter con l’hastag #climbersFriuli. Tant che su Facebook e je la pagjine webandana.com.
Cun il proposit di jessi simpri di plui a rimpinâsi intor pal mont o ai voie di ringraciâ di cûr ducj chei che nus an visitât.
MANDI A DUCJ E BON AN 2015 !!!
Simpri par gnovis emozions !!!

😎

Vignesie Julie vendisi

une vere ocasion !

E je cualchidun che al vûl comprâsi la Vignesie Julie ?
Nô, ben vulintîr o volaressin vendile, e no stait a vê pinsîrs pal presit parcè si contentìn di pocjis palanchis.
O miôr, podìn ancje vignî in jutori dantle fûr par di bant… alore ce spietaiso a fâus indenant…
e je une vere ocasion !!!

 Venezia-Giulia vendesi !!!

😎

La rade di Sistiana

Novembar 2014

Dilunvie la cueste dal golf di Triest si cjate la biele rade di Sistiane. La rade e je pardabon un tesaur par la sô bielece naturâl e di Istât cetante int e rive chenti par passâ une zornade al mâr. Culì no si cjatin lis bielis splazis di savalon di Grau e Lignan, stant che a son dome claps, ma in compens si pues fâ des bielis nadadis par vie che la aghe dal mâr e je subite alte. Inte part plui a tramontan al è il cret indulà a son diviersis viis par rimpinâsi. Impen parsore al cret al côr il bielissim troi Rilke, tant innomenât par vie che il poete al leve lenti a fâ lis sôs cjaminadis. Inte rade al è ancje un piçul puart par lis barcjis a vele e une scuele di nautiche. In plui inte zone dal parcament privât al è une discoteche che e organize bielis seradis cun musiche. A sarès dut ben ma… la aministazion comunâl al à pensât ben, par valorizâ il puest, di meti un biel depuradôr propit sot de crete indulà si rimpine, par la cuâl li dongje si sint une puce mostre. Ma a àn ancje fate une altre biele robe, ven a stai chê di vendi sù dut. E za parcè il parcament al è privât, e cualchidun al à tirât sù ancje une piçule cjasute dongje il cret, tant che inte zone plui a sud, indulà si cjatave la gjave, cumò a stan costruint un biel vilaç isto-venit, come lu àn clamât, cun tantis cjasutis une parsore che altre e cun daûr il cret e denant il mâr. Insume, di naturâl al è restât ben pôc e la int par lâ al mâr al à di paiâ. Ma la idee di fâ un biel parc naturâl indulà passâ cualchi ore in compagnie e jere masse sempliç di realizâ e salacor no permeteve di puartâ intes cassis dal comun lis palanchis. Cussì la mancjance di un plan regjonâl dal paisaç, dai piçui sorestants cence cûr e amôr pe nature e un capitalisim rogant a son, ancjemò une volte, lis causis de esgjerade cimentazion de nestre biele tiere.
O crôt che chest câs al à di vierzi i voi a ducj i furlans che a vuelin ben ae lôr tiere, par fâ in mût che in futûr dinissun e podarâ fâ chenti ce che vûl.

Look at… the photos: La baia di Sistiana

la baia di sistiana 2014

:mrgreen:

Pali di S. Donât 2014

… @ Cividât

Il 22-23-24 di Avost dal 2014 si à davuelt il Pali in onôr dal patron de citât, Sant Donât. Une tradizion popolâr antighe che puarte Cividât indaûr intal timp fintremai al 1200/1300. In chescj dîs si pues tornâ a vivi i timps de Ete di Mieç, indulà i artesans a lavoravin il len, la lane, il corean, la piere e i metai e lis pieris preziosis tant che la int si cjatave la sere intes betulis. Vie par il Pali i cinc borcs si disfidin in dôs garis: la corse e il tîr cun l’arc. Une volte aes garis a cjapavin part ancje i citadins di altris citâts o cjistiei e al jere ancje la corse cun i cjavai. Il moment plui biel di chest avigniment al è il corteu dilunc lis stradis dal centri la domenie matine indulà si puedin viodi i nobiloms compagnâ lis cotesanis, i popolans e i contadins cun i lôr cjars, i soldâts intes lôr armaduris cun lis spadis, i sunadôrs cun il fulzic o il tambûr grant e lis compagniis di saltarins e di bufons. Cuant, po’, e cale la sere cjaminant dilunc lis scuindudis luminadis des cjandelis e somee propit di rivivi chei timps.
Il 20 di Avost dal 1368, la sflandorose Citât di Cividât, e decideve cun leç che il Pali di S.Donât si fos tornât a fâ “par simpri”, par la cuâl si pues pensâ che al jere aromai deventât une manifestazion une vore impuartantone. Si larà indenant a fâlu fintremai al 1797 cuant Napoleon no vûl plui che si fasedi.
Ma intal 2000 il Pali e ven riscuviert e si tache a fâlu insuazantlu inte seconde part dal XIV secul, ven a stai intal periodi dal patriarcjât di Marquardo von Randeck (1368-1382), par vie che chest al è un dai moments storics plui impuartants pal Friûl e par il Patriarcjât. Di fat Marquardo e rive ad ore a fâ la leç “Constitutiones Patriae Forojulienses”, un gnûf ordenament une vore inovatîf par chei timps che e restarà in vore fin a cuant no rive, magari cussì no, il Patriarcjât di Vignesie.
Il Pali si davuelç intal fin di setemane plui dongje ae zornade di S.Donât, il 21 di Avost, e a vegnin fatis lis garis di corse e di tîr cun l’arc e la balestre.
I cinc borcs storics dentri lis muris de citât a son:

Burgo dal Domo: : cun i colôrs e il steme de nobile famee De Portis;
Burgo Brossane: cun i colôrs e il steme de nobile famee Formentini;
Burgo Sant Domeni: cun i colôrs e il steme de nobile famee Canussio
Burgo Sant Pieri: cun i colôrs e il steme de nobile famee Boiani
Burgo Ponti: cun i colôrs e il steme de nobile famee Conti.

stemma Borgo Duomo stemma Borgo Brossana stemma Borgo San Domenico stemma Borgo San Pietro stemma Borgo Ponte

Il borc che al rive a vê plui ponts intes garis al vinç il Pali e al ten il confenon inte sô glesie
Il sît dedeât al avigniment al è paliodicividale.it

1- Look at… the movie: PALIO di SAN DONATO 2014 @ Cividale del Friuli
2- Look at… the pictures: Palio di San Donato 2011
3- Look at… the movie: PALIO di SAN DONATO 2011 @ Cividale del Friuli

Palio di San Donato a Cividale del Friuli

😎