Fai marathon

… @ Cividât dal Friûl (UD)

Dal bielvedê sul Nadison la viste e je cetant biele, rivant a viodi il flum Nadison, il Puint dal Diaul e ancje il Borc Brossane, il borc medievâl di Cividât indulà e je logât il Munistîr di S. Marie in Val cun il Tempiut dai Langobarts. Domenie passade, 13 Otubar 2013, la maratone dal FAI e partive propit chenti par un zîr ator de citât a viodi i palaçs cun i lor zardins cetant sflandorôs, lis muris antighis e altris bielecis.
Palaç Paciani al jere la prime tape ( fotos 16 – 39 ). Il palaç non è tant ben mantignût e in plui al è dividût in dôs proprietâts ma il zardin cun il bielvedê sul Nadison e sul centri S. Francesc e merête une visite. Dongje dal palaç a si cjatin lis muris di Cividât indulà al è ancjemò ben visibil il fossâl e indulà a son stadis fatis lis rievocazions storichis ( fotos 40 – 44 ). Daspò caminat dilunc vie S.Lazzaro o sin rivâts ae biele glesiute di S.Giorgio in Vado (fotos 49 – 77 ) che e va indaûr ai prins agns dal XIII secul e che e faseve part di un antîc munistîr di muiniis agostinianis. Intal 1432 la badesse Antonie di Mugle scugnî bandonâ il munistîr. La storie de so partence e je une vore misteriose, cun di fat la badesse e jere restade di bessole cuntune fantate che la judave e cheste robe no plaseve ae glesie di Cividât ancje parcè si contavin des storiis no tant bielis intor di chel che e capitave dentri des muris dal munistîr. Bisugne savê che in che volte il puest al jere un lûc di passaç obleât par chei che a rivavin tart la gnot e no podevin jentrâ in citât, stant che lis puartis a vignivin sieradis aes dîs, o a rivavin cun i cjars e no podint passâ dilunc il puint dal Diaul, che e jere un piçul passaç di len, a scugnivin passâ par il vât, par la cuâl tante int si fermave al munistîr e la gnot e jere lungje… e cuissà ce che e capitave e soredut cuissà cetantis peteçs che si contavin. Come se nol fos avonde il munistîr e veve il pro dai cavalîrs teutonics che a passavin simpri a cjatale e la badesse ur dave la… benedizion. Alore il Cjapitul di Cividât al ordene ae badesse di bandonâ il munistîr ma je no ur scoltave, alore e ven clamât in cause il Patriarçât di Acuilee che i ordene di lâ vie ma ancje cheste volte je e fâs il cuc, alore e ven clamât in cause il pape che dome cun la seconde bole papâl e rive a parale vie ma la munie e rive ad otignî di lâ intal munistîr di Cividât. Un finâl che no crôt e vedi fat tant plasê a chei di Cividât che se la cjatarin in cjase tant che volevin parale vie. In ogni câs daspò des muiniis, intal 1451, a rivarin i fraris e cun di fat si cjate piturât inte glesie un biel S.Francesc. Intai fresc de glesie, une vore ruvinâts, si cjatin ancje cetancj cavalîrs che apartignivin al ordin dai teutonics. Ma… al è ancje piturât un cavalîr, Thomas Becket, inglês, e no si capîs cemût al jere adun cun chei de Gjermanie. Dongje de glesie a si cjate ancje un zardin une vore curât e un ort coltivât in mût naturâl adun cuntun osservatori astronomic (foto 60 ). La cjaminade e va indenat dilunc il puint gnûf, e passe dacìs des muris rivant al mulin a aghe, cumò mudât in cjase dai alpins ( fotos 78 – 88), e passe pe place S.Francesc e rive al palaç Bonessa cuntun splendit bielvedê sul Nadison e sul puint dal Diaul (fotos 91 – 101) par finî in plaçute S. Biagio indulà e jere la fieste des cocis.
Mandi a ducj !

Look at… the photos: FAI Marathon 2013

FAI Marathon 2013 a Cividale del Friuli

😎

Pordenone Pedala 2013

ancje cun i patins a rodelis

A son lis vot e cuarante cuant o rivi in place Domo a Davian indulà e varès di partî la corse cun i patins fintremai a Pordenon, no viodint dinissun in place o domandi par sigurece ai agjents se a san alc de corse ma mi disin che salacor la partence e je a Montreâl. Di là a passin chei cun la bici che a fasin il zîr lunc ma mi somee che la partence par i skaters e sedi propit chenti, alore ringraciant o voi a viodi intal parcament e propit in chel moment o viôt rivà il Campa e chei dal Gru di Udin. Bon, il puest al è chel just! Ducj intune o lin intal bar Centrâl a cjoli alc che nus dedi une sveade. Aes dîs e trentecinc finalmentri, daspò ve spietât che a rivassin i patinadôrs che a fasevin il zîr lunc di 40 km, si va vie ducj daûr une machine tant che il furgon di chei dal Comine al siere il bisson. E jo o pues meti a tiere i miei 110 cjavai di potence ven a stai o pues provâ i patins par la corse, chei cun il cjaruç lunc made in roxa e o ai di dî che al è un biel cori ancje se bisugne vê une tecniche buine par menâju. Il timp al è biel ma al è un scjafoiaç di murî. O passìn denant de aeropuart militâr american, di dulà o sperin che a no si alcin sù avions par là a semenà dolôrs tor par il mont. Cuant che dopo une orete o rivìn intal parc Galvani di Pordenon indulà o podin distirâsi discolçs sul prât a bevi e a mangjâ alc.
O ringracii di cûr chei dal Skating Club Comina che come ogni an a àn curade dute la organizazion de corse dantnus un bon jutori e une biele ocasion par cjatâsi.
Un mandi ancje a ducj chei dal Gru par la biele zornade passade in compagnie e in ligrie.

Look at… the photos: Pordenone Pedala 2013

Pordenone Pedala 2013: maratonina con i rollers: le foto

😎