. . . 09 Avrîl 2023 . . .
28 1- Passade la sabide, sul cricâ dal prin dì de setemane, Marie di Magdale cun chê altre Marie e vignì a fâi visite al sepulcri. 2- E ve ch’al capità un grant taramot: di fat un agnul dal Signôr, vignût jù dal cîl, si svicinâ, al rodolâ vie la piere e si sentâ parsore di jê. 3- Il so aspiet al jere come il folc e lis sôs viestis blancjis come la nêf. 4- Viodintlu, lis vuardiis a restarin interdetis e a deventarin come muartis. 5- L’agnul ur disè a lis feminis: “Vualtris no stait a vê pôre! O sai ch’o cirîs Jesù metût in crôs; 6- nol è culì, al è resurît, come ch’al veve dit. Sveltis, vignît a viodi il lûc là ch’al jere metût. 7- E cumò lait a dîur ai siei dissepui che lui al è resurît dai muarts. E ve che lui al va denant di vualtris in Galilee; li lu viodarês. Ve, us al ài dit”.
L’aparizion a lis feminis
8- E chês, lassât di presse il sepolcri, e, plenis di grande pôre e tal stes timp di grande gjonde, a lerin di corse a puartâ la gnove ai siei dissepui. 9- E ve: Jesù ur lè incuintri disint: “Stait contentis!”. Lôr si svicinarin, i strengerin i pîts e lu adorarin. 10- Alore Jesù ur disè: “No stait a vê pôre, lait e visait i miei fradis ch’a ledin in Galilee; li mi viodaran”.
La coruzion dai soldâts
11- Biel che lôr a jerin pe strade, ve che un troput di vuardiis a lerin in citât e a contarin ai sorestants dut ce ch’al jere sucedût. 12- Chei, dâts dongje insiemi cu i anzians, si consearin fra di lôr e ur derin ai soldâts un slac di bêçs 13- disint: “Disêt che vie pe gnot a son rivâts i dissepui di lui e lu àn puartât vie, biel che nô o durmivin. 14- Se la robe e ves di rivâi par cumbinazion tes orelis al governadôr, lu convinçarìn nô a no fâus nissune malegracie”. 15- Lôr, cjapâts i bêçs, a faserin come che ur vevin insegnât. Cussì cheste cjàcare e à cjapât pît framieç dai gjudeus fint in dì di vuê.
L’aparizion in Galilee
16- I undis dissepui a lerin in Galilee, su la mont, tal lûc che ur veve dit Jesù. 17- Viodintlu lu adorarin; cualchidun però al veve ancjemò dubits. 18- Alore Jesù ur fevelà disint: “Mi è stât dât ogni podê in cîl e su la tiere. 19- Lait duncje, inscuelait dutis lis nazions, batiantlis tal non dal Pari e dal Fi e dal Spiritussant, 20- insegnantjur a meti in pratiche dut ce che jo us ài ordenât. E ve che jo o soi cun vualtris ducj i dîs, fint a la fin dal mont”.
. . . Cjale il filmut 🎥 . . .
Buinis cjaminadis a ducj !!!
#peaceandlove 💙
☮ − ☯ − ☵ − ☸ − 🌍
