Vueli dai Patriarcs

…@ Colorêt

La Pro Loco di Colorêt e à inmaneât, domenie 15 Jugn 2014, une biele cjaminade dilunc lis culinis di Cjampei par fâ visite aes aziendis agriculis che a produsin vueli. Cjatantsi denant de biele glesiute di Colorêt, dedeade ai SS. Zuan e Paoli, o sin lâts dilunc il troi che e zire ator la culine, passant li dal vieli acuedot e indulà si cjate inmò la risultive, par rivâ al piçul paîs di Cjanâl Alt e daspò ae aziende agricule S. Rocco indulà nus spietave Sandre Zamarian par contânus alc de lavorazion dal vueli e par mostrânus la cantine. Chenti o vin ancje profitât dal bon acet cerçant sedi il vueli sedi il vin acompagnât da pan e formadi o salam. Graciis Sandre !
La cjaminade e continuave rivant a Cjampei ae aziende di Achille Stefanelli, “Ronc dai Ulivârs“, indulà nus spietave la fie, Silvie che nus contave dai problemis che a son cun la cultivazion dai ulîfs e lis diversis cualitât che lôr a àn. Ancje chenti o vin gjoldût dal bon acet cerçant sedi il vueli sedi il vin acompagnât da pan e formadi. Graciis Silvie !
Il zîr al continuave tornant sù pe culine, passant il riu Merîs e rivant a Colorêt li de aziende di Comelli indulà il bielvedê su lis culins al è un incjant. Ancje culì o vin podût visitâ la cantine e cerça il vueli di Comelli e chel des aziendis Suffumbergi e Purinan simpri di Colorêt.
Cussì tra une tabaide e chê altre, cerçant alc, o sin stâts in legre compagnie.
Mandi a ducj !

Look at… the photos: Cjaminade par i roncs dai ulivârs dilunc lis culinis di Cjampei

Look at... the photos: Camminata tra gli uliveti delle colline di Campeglio

:mrgreen:

Mirinde cun lis jerbis 2014

dilunc i comunâi di Faedis (UD)

Il 25 di Avrîl e il 04 di Mai 2014 o sin lâts ator par i comunâi di Faedis cun Rita dal ristorant “Ai nove Castelli” di Faedis, che nus à contât cemût doprâ lis jerbis salvadiis. Cussì o vin scuviert che dilunc dai trois a si cjatin cetantis jerbis che si puedin doprâ in cusine ma bisugne cognossile par no cjapâ sù chês velenosis. Il tamar e il urtiçon a fasin un zermuei che si pues doprâ cetant che un sparc intai risots, ma il tamar al à lis fueis in forme di cûr e e à di jessi bulît prin di doprâlu cuant che il urtiçon al è plui ruspiôs cun sfueis a trê pontis simii a chês de cannabis. La talate o pissecjan e je une jerbe garbe doprade par fâ salate. E intal filmut si viodin cetantis altris jerbis che si puedin doprâ…
Inte prime jessude o sin lâts ator par i comunâi che si cjatin su lis culinis denant dal ristorant e ae fin dal zîr o sin rivâts intun roncûl indulâ nus spietave il gustâ improntât da Matteo il cogo dal ristorant, e di bevi a jerin i sirops di saût, sedi chel blanc fat cun lis rosis sedi chel ros fat cun lis pomulis, fats da Rita.
La seconde jessude e je stade fate dilunc il troi che al mene al cjstiel di Zucco ristruturât, parzialmentri, da cualchi an e indulâ o vin podût fermâsi a gustâ il vuardi cun lis jerbis, un pastiç di lasagnis e altris robis cetant buinis. Tant che intal salon dal cjstiel si podeve scoltâ un zovin duo, il “Progetto corde”, in conciert. Il timp une vore biel nus à permitût di gjoldi a plen des dôs zornadis stant in legre compagnie. Un graciis a Matteo e Rita, alla Pro Loco di Colorêt e al circul Legambiente di Udin par ve organizât lis dôs jessudis.
Mandi a ducj !

Look at… the photos: jerbis 2014

Look at… the movie 2013: Le erbe selvatiche @ Faedis (UD)

Look at... the movie: Le erbe selvatiche @ Faedis (UD)

😎

Cuestelungje, Pedrose e Reant

parsore Cjampei (UD)

Cjaminant tra i borcs di une volte parsore di Colorêt di Sufumberc o sin lâts a viodi cun la Pro Loco i paîs di Cuestelungje, Pedrose e Reant. In graciis di une zornade splendide o vin gjoldût di un biel soreli cuntun aiarin clip che nus à tignût compagnie dut il dì fasint lizer il pas. Intai ultins agns chescj borcs a son resurîts par vie che cualchidun al è tornât a meti a puest lis cjasis e i terens, tribolant no pôc par fâ rivâ la aghe in paîs. No mancje chenti la tecnologjie, di fat jentrant a Pedrose si cjate, a mût di sentinele, il pâl che a ten sù lis antenis de television e de telefonie mobile ma altris trê antenis a son dilunc il troi che e mene a Reant e une e somee a un crani. Il biel al è che in paîs il telefonin no cjape ben.
I borcs a son nassûts co a rivarin des fameis slovenis che, no podint lâ a stâ inte plane furlane indulà che si cjatavin bielzà i Langobards, si fermarin culì , rivant, cuntun dûr lavôr, a fâ dai implants di coltivazions a roncâi. Impen il paîs di Pedrose, come si rive a capî dal non, al à une origjin plui antighe e i slovens, rivant culì, a tignirin par bon il non che al vûl dîsi fat di pieris.
Il troi che al mene da Pedrose a Reant, parsore di Torean, al passe intun bielissim bosc di faiârs e cumò, inte Vierte, il vert clâr des zovins sfueis al è maraveôs di viodi. A Reant lis cjasis metudis a puest a son anciemò pocjis, ma cui che al è tornât a vivi chenti al è tant vivarôs, rivant a sistemâ la glesie di S. Lurinç e fasint ogni an un biel licôf intal mês di Avost (chest an il 09/10 di Avost ) par onorâlu.
Ancje chest an in ogni paîs o vin podût gjoldi de ospitalitât de int dal lûc che nus à contât la storie dai borcs. A Cuestelungje a jerin a stâ dome int che si clamave Borgnolo, ven a stai i brugnui, ma chest fin ai agns ’80 cuant aromai dute la int e veve bandonât un pôc par volte il paîs. A Pedrose, aromai, e je a stâ dome une famee, cuntun nono cetan braurôs che nus conte simpri alc de sô lungje e tribolade vite e un nevôt che cumò al fâs un mîl di cjastinâr cetant bon. Par finî, a Reant nus à dât bon acet sot il pergolât une famee dal lûc, indulà o vin podût gustâ e stâ in legre compagnie al sun di une armoniche, scoltant ancje une vilote furlane sunade cuntune ande moderne.
A ducj un graciis di cûr e sperin di riviodisi ducj intune l’an che ven !
Al è stât ancje biel stâ in compagnie di ducj cuntune zornade cetant biele e cuntun finâl plen di aventure tant che il grup lassant Reant a trops e si è tornât a cjatâ a Val dopo stramps zîrs che nissun al è rivât ben a capî ma fasintnus tant ridi.
Mandi a ducj !

Look at… the photos: Cuestelungje, Pedrose e Reant

Antichi borghi - le foto

😎

Pai Trois Di Une Volte

… @ Cjampeis (UD)

Un cîl grîson… une ploie lizere che no molave… ma aes vot e mieze i runners a àn tacât a partî un ad un o a trops tant che la partence e jere pussibil fin ae dîs. Cualchidun vint fat dut il zîr di 7 km dentri lis dîs, no content, al à tacât a fâ un altri zîr. Biel che la corse di 17 km e jere stade scancelade par resons di sigurece.
Cussì vuê a Cjampeis di Faedis (UD) o vin slontanât l’Invier corint in 154 personis “pai trois di une volte”, e rivant a tocjâ i borcs di Roscjà, di Cjanâl Alt e di Colorêt. Une siore nus à dite che il brut timp al jere par vie che o vin preât masse pôc, alore par che e sedi biel timp l’an che e ven tachin ducj intune a preâ fin di cumò.
Mandi a ducj e a riviodisi a Palme fra cuindis dîs 😉

Look at… the photos: Pai Trois di Une Volte

Pai trois di une volte a Cjampeis

😎

Camminando in collina

con gli asini

La Pro Loco di Colloredo di Soffumbergo in Comune di Faedis (UD) ha organizzato una bella camminata in collina con gli asini. L’asino cammina lento e si ferma a valutare gli ostacoli che incontra prima di affrontarli. E’ molto sensibile e affettuoso. Il suo pelo caldo e morbido è piacevole al tatto. Certo che se decide di non andare avanti allora diventa veramente dura x chi gli sta a fianco e la sua fama in questo caso è ben meritata.

Look at… all the pictures: camminata lungo le colline, (le foto sono quelle a partire dalla 46).

Camminata lungo le colline di Colloredo di Soffumbego con gli asini (UD)

😎