. . . parêt Nord . . .
Buinis cjaminadis a ducj !!!
. . . Cjale il filmut 🎥 . . .
#peaceandlove 💙
☮ − ☯ − ☵ − ☸ − 🌍
Mont Sernio
Tag: Sernio
Mont Tersadie
. . .la mont dai Celtis
Cheste e je une mont cun tante Storie daûr ancje une vore antighe stant che a son dai segns dal passaç dai Celtis tant che intal prât dongje de malghe Valmedan Alte in ocasion de fieste celtiche dal 2016 al è stât fat cun i claps un biel triskell che ancjemò si pues viodi… po dopo par vie che dae cime si viodeve ben dut tor ator, la mont e je deventade un biel sisteme par difindisi inte Grande Vuere… la cjaminade e tache lì de biele glesiute di San Martin a Val di Rualp, lant sù pe stradute asfaltade che si cjape juste daûr de glesie e e va sù dilunc de boschete fin ae malghe Valmedan Alte.. rivâts ae malghe e tignint la malghe a drete si cjape a çampe il troi CAI 409 che al va sù fin a 1780 m puartantnus sul versant Nord de mont indulà si cjape il troi che al rive insom dal Tersadia… tor dai 1800 m il troi al va di ribe jù e chest toc al è ancjemò plen di nêf ma no son problemas a lâ indenant… passât chest toc il troi al tache a lâ sù ben e la buere vuê e soflave ben ma cun il cjalt che al jere si stave benon… rivât in cime dopo cuasi trê oris di cjaminade o soi stât apaiât di un panorame spetacolâr… ma bielzà lant sù o ai podût gjoldi de bielece dal Sernio il gno amôr segret che cumò nol è plui tant segret… in cime si cjate une biele statue blancje de Madonute e une grande crôs di metal e dongje a son ancjemò i mûrs di un cason di sigûr doprât dai militârs… cualchi metri plui in sù e je la vere cime e di chì si gjolt di une viste maraveose su dute la mont furlane e il Peralba al è propit lì denant… dopo vê dade une bocjade o soi lât jù fasint la stesse strade e in dôs oris o soi rivât di gnûf lì de biele glesiute e o jeri biel cuet par il cjaldon stant che o soi partît a vonde a tart, magari cussì no, ma il gno cûr al jere plen di gjonde… in sumis une biele cjaminade che o consei a ducj di fâ…
D+ 1100 m – 12 km…
. . . Sernio, parêt Nord, cjale il filmut . . . 🎥
Buinis cjaminadis a ducj !!!
#peaceandlove 💙
☮ − ☯ − ☵ − ☸ − 🌍
Fieste de Patrie dal Friûl
… il leam cun lis nestris lidrîs
Il 3 di Avrîl dal 1077, co il patriarcje di Aquilee Sigjeart di Tengling al ricêf a Pavie la investidure feudâl bande di Indrì IV, al nas il Stât Patriarcjâl furlan, ven a stai la Patrie dal Friûl, une istituzion che e larà indenant fintremai il XVIII secul. Il stât feudâl, une vore plui grant dal Friûl di vuê, tal imprin al jere vuidât dai patriarcjis di divignince todescje e a darà cetant lustri ae nestre tiere tant di fâle deventâ un pont di riferiment economic, politic e culturâl a nivel european. Il pês che e veve la Patrie i à permetût ai patriarcjis di no interessâsi di papis e rês. Di fat Ricart Cûr di Leon chenti al è stât fat presonîr di Gofrêt, tant che al cirive di tornâ viers cjase, di li si dîs che e sedi nassude le conte di Robin Hood.
Si che duncje, cul fat che il patriarcje Sigjeart tal 1077 nol jere plui dome vescul ma ancje cont, e scomence la storie dal Stât indipendent furlan de Ete di Mieç.
Dal 1077 indenant, il Friûl al è un Stât tant indipendent che al à parfin un parlament. Nô o vin i documents di une riunion dal parlament furlan vincj agns prin di chel inglês che i storics talians e inglês a disin jessi stât il prin. Dal 1200 nô o vevin za il parlament, ma il nestri nol jere come chel inglês. Chel inglês al veve une sole funzion: che il re nol podeve imponi une tasse e tirâle, cence che i siôrs si metessin dacuardi su cui che al veve di paiale. Nuie altri! Culì no; culì, intant, il patriarcje al è dome il president e al è obleât a ubidî a ce che il parlament al decît. Seconde robe: tal nestri parlament no son dentri dome siôrs, ma a son ancje lis libaris comunitâts, i comuns, come Udin, Glemone e Cividât. Tierce robe: nissun al po tignî un esercit cence il permès dal parlament. Il parlament furlan tacât in che epoche li e larâ indenant fintremai tal 1420.
Cumò, daspò 946 agns, in Friûl si fâs fieste par ricuardâ lis nestris lidris…
Fieste de Patrie dal Friûl – ducj i apontaments dal mês di Avrîl 2023
Fuarce Friûl, simpri !
🙋 💙💛
Ripâr Grauçarie – Val Aupa
cjaminant in Cjanâl da la Aupe…
…dal parcament, (COORD 46.47630 , 13.18496 ), si cjape il troi CAI 437 che al puarte al ripâr Grauçarie… il troi si disvilupe par 2,6 km cuntun D+ di 561 m e al passe prin intun biel bosc e plui adalt si cjamine sui claps cun tancj cjanâi che a vegnin jù da la mont che cuant che al plûf a puartin jù des veris e propis lavinis di aghe… lis tabelis che o viodeis dilunc chest toc di troi a son stadis metudis par memorâ lis personis muartis par jessi stadis cjapadis de plene de aghe, par la cuâl prin di fâ cheste cjaminade al è miôr jessi sigûrs ch’al timp al sedi biel… di plui bisugne vê des buinis gjambis stant che il troi al tire sù ben… rivâts li dal ripâr, ch’al è viert dal 2 di Jugn 2022, si cjate une biele fontane cun aghe frescje e lis panchis par sintâsi sedi di fûr che dentri e il bon acet dal gjestôr simpri pront a serviti alc di bon o une bocalete di aghe… fate une piçule polse si pues lâ indenant simpri par il CAI 437 fintremai al Foran da la Gjaline cuntune altre biele tirade in mieç de biele boschete e di li ciapant il troi CAI 419 si rive ae Forcje di Nuviernulis indulà si pues viodi la tor di Nuviernulis tant grande cun il diedri Bulfoni e la sô maestât dal Sernio cetant bielonone… fin chì a son 5 km e un D+ di 1128 m, ma no son robis che ti metin in dificoltât e salacor al è avonde puartâsi alc di bevi e di mangiâ… dae Forcje vint voie e buinis gjambis si pues lâ fin sù la mont Sernio… ma cheste e je une altre storie… mandi e buine cjaminade a ducj…
