Campanile di Val Montanaia

L’urli di piere…

Cheste Istât 2022 si siere cun il bot dilunc il troi CAI353 che mi à puartât a lì dal Cjampanili di Val Montanaia e al ripâr Perugini… une cjaminade une vore preseade che si scugne fâ almancul une volte inte vite e che ducj chei che a son passionâts di montagne a àn fate ancje plui di une volte… lant sù dilunc il canalon, indulà ch’al côr il riu Val Montanaia, si è contornâts de biele crete des Dolomiti Furlanis e biel prest si tache a viodi il Cjampanili, che si fâs un tic bramâ par vie che al mancje ancjemò un biel toc prin di rivâ lì dal ripâr Perugini… ma cuant che si rive lì de boschete si pues biel za viodilu in dute la so bielece e jo o ai pensât a tropis voltis che Mauro Corona al è lât a rimpinâsi sù chê biele crete e a cetant bulo che al è stât… di fat e je une parêt grandonone e une vore alte e par fâle e covente une buine preparazion sedi fisiche, che tecniche, che mentâl… fate la ultime fadure e rivâts lì dal prât si cjatâsi intun cjadin cenglât des cretis… la Croda Cimoliana, il Campanile Pordenone, la Cima Meluzzo, la Cima Rosina e v.i. e vint voie si pues lâ sù fintremai ae Forcella Montanaia… il timp al jere biel ancje se, la sù, la buere frede si faseve sintì… fatis lis fotos ancje ae biele parêt nord o soi tornât indaûr fin lì dal parcament dongje dal Ripâr Pordenon… par lâ e tornâ mi son ladis plui o mancul 4 oris e il disnivel fat al è stât D+ 850 m… in some, une biele cjaminade impegnative ma ripaiade de bielece dal Cjampanili di Val Montanaia…
Buinis cjaminadis a ducj !!!

Campanile di Val Montanaia

Monte Sernio

…cun il cûr plen di gjonde, di ca sù, mandi a ducj… with a heart full of joy, from up here, hello everyone…

Cheste cjaminade e je stade par me la prove dal fûc… di fat, lant dibessoi, par rivâ in cime bisugne vê buinis gjambis, un bon cûr ma soredut rivâ ad ore a stâ in pâs dentri di se… ven a stai dibisugne vê un cjâf calm… la fadure e je stade tante ma la sodisfazion di cuant che tu tu rivis in cime ti jemple il cûr di gjonde ripaianti di dut… o soi stât 4H40 par rivâ insom fasint diviersis fermadis par tornâ a cjapâ flât e 3H50 par tornâ indaûr… o ai ancje fate une pause di 25′ in cime… in some a coventin plui o mancul 09H00 oris par lâ e tornâ… mi soi puartât daûr 2 l di aghe e ancje alc di gustâ par tornâ a cjapâ lis fuarcis e ringraciant il Signôr al è lât dut ben… o puès dome che jessi contenton di cemût che o ai sierade cheste biele Istât 2022…
Buinis cjaminadis a ducj !!!

…Peace and Love… <3 monte Sernio 2.187 m - Val Aupa

. . .Sô Maestât la mont Sernio e in bande a cjampe la regjine la tor Nuviernulis . . .

Cippo Emilio Comici

Val Rosandra…

Cheste e je une biele cjaminade di 11 K e D+ 300 m, che e tache dal parcament de “ciclopedonale Cottur” dilunc la sp 11 bandis Triest e nus puartarà fintremai al “cippo Comici“, il monument in onôr dal grant rimpinadôr talian che intai agns ’30 e ’40 dal secul passât al jere impegnât a puartâ indenant il nivel de dificultât al sest grât… fat il sotpàs si cjamine dilunc une biele e largje strade di glerie che nus puartarà a passâ denant de viere stazion dai trens di S. Antoni di Moccò e po’ dopo dongje dal paîs di Hrvati… passât un arc si rive li de crete de “Piçule Ferovie” e lant indenant e passadis dôs galariis si rive ad une crosere cuntune stradute cementade che e va di ribe jù viers Bottazzo… cjapant cheste stradute in font si svolte a drete indulà che e je la tabele pe glesiute di S.Marie in Siaris… da chì il troi al è ben segnât e si rive fin ae biele glesiute… di li si va indenant dilunc un teren di claps e cretis ben segnât cun bolins che nus puartin fin insom indulà si cjate la piçule piramide dedeade a E. Comici… dopo vêlu saludât cuntun mandi o podìn gjoldi di une biele viste de valade e des cretis dongje… tant che la parêt dai Falchi, la mont Stena e lis cretis par lâ a rimpinâsi… in some, une biele cjaminade indulà ombrene e soreli si alternin in graciis dai arbui che a son dilunc dal troi tant amât dai triestins… inalore…
Buinis cjaminadis a ducj, mandi !

Tancj Auguroncici

…tancj auguroncici, Andrian !!!

Fin culì, di rif o di raf, o soi rivât… inalore sperin di lâ indenant ben ancjemò par cualchi an… fasintsi fuarce simpri cuntune preiere…
savint che… o deventarai vieli… i respiri parsore…
savint che… o podarai inmalami… i respiri parsore…
savint che… o prin o dopo o varai di lâ ancie jo… i respiri parsore…
savint che… o pierdarai ducj i miei afiets plui cjârs… i respiri parsore…
savint che… o puartarai di là dome ce che o ai fat … i respiri parsore…
savint che… o ai voie di jessi simpri cussint … i respiri parsore…
savint che… o vuei il ben di ducj… i respiri parsore…
savint che… o saludarai simpri cuntun biel mandi… i respiri parsore…

Qui sono sulla Cima di Terrarossa _ altopiani di Montasio

😎

Creta di Timau

Ch’e vadi il to pinsîr a ce che plui ti è cjâr… come il miò sunâ libar e clâr…

Cuant che, domenie passade 21/08/2022, o soi rivât a casere Pramosio Alte tor lis 09H45 al jere biel za cjaldut, l’aiar al soflave ben e il parcament al jere cuasi dut plen ma par fortune o ai cjatât un puest… tor lis 10H00 o soi partît dilunc il troi CAI402 par là sù al lât di Avostanis ma cheste volte la prime tape nol jere il lât ma la Crete di Timau che cuant che tu tu rivis a Cleulis tu tu la viodis denant biele e imponent… passade la malghe delle Manze e pôc prime di rivâ al lât o ai cjapât un troi a cjampe che al puarte fin sù la cime de Crete e daspò plui o mancul une cuarantine di minûts o ai tacât la parêt furnide di cuarde di açâl rivant cussì insom de Crete pôc prime di misdì… di lassù in graciis di un cîl net si podevin viodi dutis lis mont… il Colians al faseve biele mostre di se propit li denant ma slungjant il voli fin là jù si podevin ancje viodi la Tofane il Pelmo e di chê altre bande il Mangart e il Triglav e tantis altris montagnis… un spetacul bielonon… cuant che o soi rivât in cime l’aiar al jere bielzà cuietât e no jere int ma daspò une mieze orute si jere in une cuindisine di personis… dutis impegnadis a fâ lis fotos e a nomenâ lis monts che si rivavin a viodi, tant che un zovin al à fat svolâ il drone… dopo vê mangjât e vê polsât un pôc e saludadis lis bielis fantatis di Udin o soi lât viers la siele di Avostanis cjolint un troi ch’al traverse e al puarte parsore dal lât fin lì de crete prin des rivis de mont Avostanis… achì bisugne fâ un grum di atenzion stant che il troi al zire ator de crete lant prime sù e po dopo lant di ribe jù viers la siele e deventant une vore stret, esponût e plen di jerbe… rivâts li de siele il plui al è fat… e o ai podût tacâ la mont Avostanis rivant in cime dopo vê fat une ribe in sù avonde tirade… de piche, dividude jenfri Italie e Austrie, o ai potût gjoldi di un biel panorame sù la valade austriache e di un biel grifon che al svolave in cîl cun lis sôs alis tant largjis… di chì dute ribe jù fin al lât che tor lis trê al jere plen di int, frutins e cjans tant che sù la parêt li dongje cualchidun al tacave a rimpinâsi… in sumis o pues dî che e je stade une zornade bielonone ma ancje une zornade, par me, storiche stant che o soi rivât a meti insiemi dôs cimis di passe 2000 m… une biele sodisfazion… inalore…
Buinis cjaminadis a ducj !!! 🗻

Cjalait achì dutis lis fotos de cjaminade

Mont San Canziano

…valli del Natisone…

Daspò vê parcât la machine dongje il domo di S. Pieri dai Sclavons ( COORD: 46.12968954831961, 13.487701495557747 ) si cjape la strade che e puarte ae tratorie Le Querce e a chì si cjôl, a cjampe, il troi CAI 749 e si va indenant par plui o mancul 2 Km fin a cjatâ a drete il troi CAI 749a che nus puartarà fintremai al pas di Sant Canziano di lì cjolint il CAI 755 si rive, bot e sclop, dopo vê fat un toc di ribe sù, in cime a la mont San Canziano / svét Kocjàn – 723 m. In cime a chest mont o varês la biele sorprese di viodi chel ch’al reste di une viere glesiute dute fate in piere.

«La vista che si gode da quella vetta – scriveva nel 1912 Ivan Trinko – è magnifica: buona parte della pianura friulana, molte dirama­zioni delle Giulie di qua e di là dell’Isonzo, tra cui il gruppo del Krn, il prossimo Matajur, il Mia, la catena Stol – MonteMaggiore dietro la quale fan capolino il Prestreljenik ed il Canin»

La devozion a Sant Canziano ( svét Kocjàn in sloven ) e à dât vite al cognon Cocean, Coceani, Coceano, che si cjate inte zone dal Friûl a soreli jevât indulà che il Sant al jere plui cognossût e venerât…

Cheste e je une cjaminade une vore biele plene di storie e culture e ancje no masse lungje par vie che il troi al passe dut intal bosc cussì no si à il soreli simpri in batude parsore dal cjâf, ed in dut a son une dozene di km cuntun D+ 550 m par la cuâl no varessin di jessi problemis par EE…

Buinis cjaminadis a ducj !!!

La Mont Sante dal Lussari

la piçule Katmandu furlane

Rivâts a Camporosso – Tarvis si poie la machine li dal grant parcament dongie de teleferiche, di chì si tache a cjaminâ dilunc vie Lussari e passât il riu Lussari si va a drete dilunc il troi CAI 613, une biele e largje strade forestâl che us mene fintremai ae malghe Lussari… la strade e à une biele pendence e e je fate di tantis rampis une daûr di chê altre e no mole mai fin insom… pôc prime di rivâ ae malghe cjalait ben a drete par cjapâ il troi che us menarà fintremai a la Mont Sante dal Lussari… se no seis sigûrs cjalait il segn GPX… faseit atenzion che lant invezit dilunc il troi dal Alpe Adria Trail o cjataressis un piçul slac che al à cuviert un toc dal troi… ad ogni mût lant daûr dal dissen Gpx no si passe di chê bande… rivâts li dal Santuari e gioldût dal biel panorame sù la mont furlane si puès fâ un salt li de teleferiche di indulà si puedin fâ lis fotos a dut il blanc paesut… il D+ al è di cuasi 1000 m e a son 11 km A/R, par la cuâl a coventin buinis gjambis, tante aghe e un bon cûr… Mandi e buinis cjaminadis a ducj…

Santuario - Monte Santo del Lussari - Tarvisio

File .GPXCamporosso-La Mont Sante dal Lussari, traccia GPX

Ripâr Grauçarie – Val Aupa

cjaminant in Cjanâl da la Aupe

…dal parcament, (COORD 46.47630 , 13.18496 ), si cjape il troi CAI 437 che al puarte al ripâr Grauçarie… il troi si disvilupe par 2,6 km cuntun D+ di 561 m e al passe prin intun biel bosc e plui adalt si cjamine sui claps cun tancj cjanâi che a vegnin jù da la mont che cuant che al plûf a puartin jù des veris e propis lavinis di aghe… lis tabelis che o viodeis dilunc chest toc di troi a son stadis metudis par memorâ lis personis muartis par jessi stadis cjapadis de plene de aghe, par la cuâl prin di fâ cheste cjaminade al è miôr jessi sigûrs ch’al timp al sedi biel… di plui bisugne vê des buinis gjambis stant che il troi al tire sù ben… rivâts li dal ripâr, ch’al è viert dal 2 di Jugn 2022, si cjate une biele fontane cun aghe frescje e lis panchis par sintâsi sedi di fûr che dentri e il bon acet dal gjestôr simpri pront a serviti alc di bon o une bocalete di aghe… fate une piçule polse si pues lâ indenant simpri par il CAI 437 fintremai al Foran da la Gjaline cuntune altre biele tirade in mieç de biele boschete e di li ciapant il troi CAI 419 si rive ae Forcje di Nuviernulis indulà si pues viodi la tor di Nuviernulis tant grande cun il diedri Bulfoni e la sô maestât dal Sernio cetant bielonone… fin chì a son 5 km e un D+ di 1128 m, ma no son robis che ti metin in dificoltât e salacor al è avonde puartâsi alc di bevi e di mangiâ… dae Forcje vint voie e buinis gjambis si pues lâ fin sù la mont Sernio… ma cheste e je une altre storie… mandi e buine cjaminade a ducj…

Cima della Sfinge - Val Aupa, Carnia Friuli

Cjaminade su la mont Mia

Stupizza di Pulfero

il comun di Pulfero e à inmaneade, domenie 31 di Lui 2016, une fieste lì des malghis su la mont Mia in ocasion de concession forestâl par il sfrutament dal bosc… l’apontament al jere aes 11H30… tant che cualchidun al rivave in machine dilunc la strade forestâl, chei altris acompagnâts da dôs vuidis, Stefania e Marco, a levin a pît dilunc il troi che da Stupizza e rive sù la Mont Mia… une biele cjaminade fate cun calme in 2H30 e passant traviers bielis boschetis e i crets di calcâr inte part ad alt… a pene tacade la cjaminade o vin podût viodi a man çampe lis ruvinis di un antic borc, Pedrobac abitât fin al inizi dal ‘900, che e veve un mût inzegnôs di conservâ il formadi e altris prodots metintju dentri un çondar taponât cun lis pieris e lassant dome doi piçui barcons in mût che al fos il zîr di aiar, in chest mût la temperadure si mantignive simpri compagne dilunc dutis lis stagjons… po dopo il troi al tacave a lâ sù e stant che al jere une vore di scjafoiaç o vin sudât trê cjamesis… lis robis a son ladis miôr rivant inte valade dal Pradolino… une valade une vore alte che e je stade sgjavade dal Nadison intal cret di calcâr , par vie che il so jet al passave, tancj agns indaûr, di chestis bandis… rivant aes malghis tor lis 11H30 o vin podût gjoldi di un biel licôf cun bire, vin e di gustâ pastesute cun tocj di cjar, e par secont a jerin i ćevapčići o lis fetutis di cjar cun la polente o ancje i fasûi… insome tante robe… ma par cui che e veve fate dute che cjaminade e al veve ancjemò di tornâ indaûr a pît salacor une biele fete di angurie o dei pierçui a saressin lâts une vore benon… tant che si mangjave, il sindic e i studiôs nus contavin de concession e de impuartance di chest bosc, stant che al è deventât SIC ven a stai Sît d’Interès Comunitari, e di ce che a àn intenzion di fâ par tignîlu in bon stât… tor la une, cun Marco, o vin decidût di tornâ indaûr stant che il meteo nus faseve viodi che al jere dongje a rivâ un biel burlaç… e cheste e je stade la nestre fortune par vie che rivâts al parcament, tor lis 15H00, pôc dopo e tacave a gotâ e in cinc minûts si à discjadenade une biele bissebove… no sai però cemût che e je lade a finîle a chei altris che cun Stefania a jerin restâts sù par gjoldi dal conciert di trombis e che a son partîts plui a tart… un graciis di cûr a Stefania e Marco che nus àn vuidât displeantnus lis bielecis de nature e un riviodisi a ducj l’an che al ven… mandi a ducj !!!

look at… the photos: Cjaminade Monte Mia

:mrgreen: