Cappella Zita e malga Rauna

la biele capele dedeade ae imperadore Zita di Borbone…

Une zornade maraveose cuntun cîl turchin/blâf cuasi cence nûi e une lune che nus cjalave lâ sù dilunc dal troi CAI 607 dut biel cuviert di nêf ma ben segnât e batût da chei cun lis cjaspis… e lant sù dilunc la forestâl che passe in mieç de boschete milenarie di Tarvis cuasi no si sint la fadure tant e je la bielece dai peçs ancjemò plens di nêf… nêf che ogni tant e cole jù fasint un biel sunôr e rinfrescjant la muse di nô che i si passave dongje… rivâts lì de malghe Raune o vin fat un pit stop par bevi alc di cjalt e po dopo o sin lâts sù fin ae biele capele Zita… achì il prât di nêf che si intaie cun il cîl ad alt dal cjadin al è un spetacul… e rivâts lì de capele o ai vude une biele sensazion di pâs… po dopo pôc plui ad alt si pues gjoldi di un biel panorame su dutis lis monts… in some o soi stât tant contenton di cheste zornade spetacolâr passade in buine compangnie cuntun soreli ch’al spacave lis pieris e sot di un cîl turchin che no mi visi di vêlu mai viodût tant biel… 😍

Cappella Zita
Cappella Zita – Valbruna Malborghetto Tarvisio

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Forcele Nebria

…in Val Saisera

Vuê o ai fate une biele cjaminade dilunc il troi CAI 658 e CAI 608 rivant fin lì de forcele Nebria a 940 m… po dopo no soi plui rivât a lâ indenant par vie che la nêf sfarinose e jere alte 50 cm e cence rachetis e jere penze… di plui rivât lî de forcele no si viodeve plui il segn dal troi ma dome lis olmis di cualchi puar ungulât… par fortune il timp al jere avonde biel e i nui si viodevin dome in lontance… tornant indaûr o ai cjatât 3 personis che a lavin sù cun lis rachetis ma ancje lôr no jerin mai stâts di chês bandis e come me a lavin a la venture… biel cussì… ad ogni mût e je stade une biele cjaminade sù di un tapët di nêf fofe e lizere… ❄⛄❄

. . . Cjale il filmut 🎥 . . .

Forcella Nebria - Val Saisera

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Lis motoslitis ator pe mont furlane

Storie di cemût che cinc piçui comuns de Cjargne a àn aministrât i fonts PFR

E jere une cjalde zornade d’Istât cuant un trop di zovins a tacavin a lâ dilunc il troi des bandis di Sostâs… a pene tacât a cjaminâ a sintirin il rumôr fuart di un scavadôr a bene e fate la svolte lu vioderin lì denant ch’al slargjave il troi spostant la tiere par fâ un stradon… ducj i fantats a restarin scaturîts e biel prest tornant indaûr ur vignî intal cjaf di creâ un grup sù Facebook par difindi il troi e par metisi cussì adun e fâ des manifestazions di proteste fasint sintî la vôs de int ai sorestants che a vevin dât il benstâ a cheste violence sul ambient naturâl…

Il grup “Salviamo i sentieri CAI 227 e 228” al ve di subit un bon acet e ae prime manifestazion inmaneade, di lì a pôc, si cjatarin in tancj a cjaminâ dilunc il troi CAI 227… partîts di Plan di Vas a rivarin fin lì de malghe Tuglia gjoldin, vie pal troi, dal biel paesaç… lenti cualchidun al tacà a fevelà… ducj a jerin dacuardi intal pensâ che fâ un stradon intun puest tant biel no sarès stade une buine idee sedi par vie dai slacs che a vegnin jù cence padin de mont ( viôt la CLPV ) sedi par il rispiet de tante int passionade di lâ a cjaminâ in pâs dilunc di un troi cenglât de mont cjargnele… cualchidun al berlave disint di sbusâ lis gomis dal scavadôr ma chei altris si meterin a ridi… ae fin a deciderin di lâ a tabaiâ cun i sorestants de regjon e cun i sindics dai piçui comuns par displeâ lis lôr motivazions in difese dal troi CAI 227/CAI228…

Dopo ve fevelât cun i sorestants i zovins si inarcuarzerin biel prest di cjatâsi denant un mûr di gome… di fat i sorestants no rivavin a capî lis lôr motivazions e, stant che i lavôrs a jerin bielzà tacâts, a lavin indenant cun il progjet di fâ il stradon par fâ passâ lis motoslitis… eh za, i zovins a vevin capît che cheste e jere la finalitât dal stradon, ven a stai mudâ la mont furlane fasint respirâ smog e fasint davoi tant che in citât… biele robe po… di fat il stradon al varès di unî la Cime di Sapade cun il ripâr Chiampizzulon passant par malghe Tuglia, dilunc il troi CAI227 e il CAI228 e viazant parsore de cuote de boschete tor dai 1600 m e po dopo lâ fin a Sostâs passant pe mont Talm… un biel zirut, pecjât però par i puars animâi e pe int che a varès di patî dut chel rumôr e dut chel incuinament… ancje in chest câs i sorestants a pandevin pocje capacitât di viodi lontant no rivant a creâ armonie jenfri economie e ambient…

A chest pont i zovins si domandarin: “Ce fasìno cumò po?”… par fortune a cualchidun i vignì intal cjâf di lâ a cjalâ lis mapis online e si inacuarzè che suntune mape alc nol jere segnât ben… biel cjalant la mape sul sît idrogeo.isprambiente.it al viodè che no jere segnalade la presince di slacs dilunc il troi CAI 227… visâts i compagns ducj si meterin in opare par capî cemût risolvi il probleme… la storie e va indenant…

Buinis cjaminadis a ducj !!!

#peaceandlove 💙

☮ − ☯ − ☵ − ☸ − 🌍

Mirok par il Clime

Mirok the scarecrow and Gina the lark. . .

Une gnove striche di Mirok il pipinat e Gine la lodule…

Mirok per il Clima - fumetto

Gine: Mirok, âstu sintût fevelâ dal mudament dal clima ?
Mirok: Sigûr po, ma ce centrial chest cun nô?
Gine: Ben po, il mudament dal clime al pues vê une influence sù la nestre vite, par esempli lis temperaduris a son daûr a deventâ simpri plui altis…
Mirok: O crôt di capîti, inalore no varai plui pôre di deventâ un cjandelot di glaçe in Invier…
Gine: Sì, ancje chel, ma a son ancje consecuencis penzis tant che lis bissebovis plui fuartis e il sec…
Mirok: Orpo, no mi va par nuie ben il sec! Cemût o fasarai a stâ sù cence un pocje di tiare bagnade…
Gine: Juste apont, o vin di fâ la nestre part par prevignî il mudament dal clime, e chest lo podìn fâ tacant a butâ fûr intal aiar mancul CO2 e sparagnant energjie…
Mirok: Benon po, o fasarai la mê part… ma par cumò o voi a cirî un pocje di tiare bagnade…
Gina: Inalore si viodìn dopo… Mandi !
Mirok: Mandi !

#peaceandlove 💙

☮ − ☯ − ☵ − ☸ − 🌍

Cjaminant ator pe mont

Une poesie dedeade ae mont furlane…

Cjaminant

Jenfri i glaçs, i sdrups e lis cretis eternis
Si rimpine la mê ment e il gno cuarp
Intal cinidôr de mont, inte urne
De Nature, indulà ogni robe e je ancjemò.

O scolti la vôs dal aiar, ch’e sofle
Tra i pâs sù la crete, e mi puarte
In chest viaç interiôr, indulà ogni robe
al à un sens, un significât e une lûs.

E intant che o cjamini, il gno cûr ad alt
cun la cime, si lasse lâ intun inzirli
dal infinît, e i miei pinsîrs a svolin
tant che uciei, viers orizonts lontans.

E o sint il pês dai miei ingòs, des mês pôris
sfantâsi, intal cinidôr di chei lûcs imens
E mi visi che la fuarce de Nature
e je la fuarce dal Om, e che nô o sin part di jê.

Biel inalore il plasè di cjaminâ,
Di sintîsi vîfs, intun mont imens,
Di preseâ la bielece de mont,
des nestris Alps in ogni moment.

Buinis cjaminadis a ducj !!!

. . . Cjale il filmut 🎥 . . .

#peaceandlove 💙

☮ − ☯ − ☵ − ☸ − 🌍

Mont Fieste

parsore dal lâc di Cjavaç

Poiade la machine a Tarnep intal parcament dongje cjase Culau si cjape il troi CAI 838 che al va sù fin ae fuartece de mont Fieste… il troi al è ben segnât e daspò il prin toc dilunc de trincee di claps si incuintre la strade forestâl ven a stai il troi des Paveis… achì si pues sielzi se lâ sù par cheste strade biele largje e cuntune pendence dolce o lâ indenant par il troi che al va sù dret scurtant di un biel pôc la strade ma cuntune pendence une vore penze… par rivâ ae fuartece a son 800 m di D+ e a coventin plui o mancul 02H00 oris e buinis gjambis ma dae terace si pues gjoldi di une viste spetaculâr sul Tiliment e sul lâc di Cjavâç e si pues ancje visitâ la fuartece cun i siei labirints… tornant indaûr visaitsi di jemplâ la buracje cun la aghe de fontane tant buine…⛲
Buinis cjaminadis a ducj !!!

. . . Cjale il filmut 🎥 . . .

Tolmezzo e il Tagliamento
Tumieç e il Tiliment

#peaceandlove 💙

☮ − ☯ − ☵ − ☸ − 🌍

Benvignût 2023

…WELCOME 2023 !!!

I wish you all a HAPPY NEW YEAR 2023 !!!!!

Nô furlans o vin a cûr il nestri biel Friûl e o domandin, in chest inizi di an 2023, che finalmentri la regjon fvg e podedi clamâsi Friûl e vonde… di plui o varessin gust che la nestre biele lenghe furlane e deventi lenghe veicolâr inte scuelis di ogni ordin e grât… biadelore… #fuarceFriûl simpri . . .

E cumò une riflession che e ven de savietât dal Orient lontan:
“La ativitât dai umign e va indenant cence padin; co che e rive ae fin e torne di gnûf a scomençâ. Duncje e pues lâ indenant in perpetui. Cuant che une ruede e à un as indulà zirâ, e pues lâ lontan. La ativitât de Nature e je une, cence disviaments; par la cuâl no fale.
Co che la energjie dal cîl e ven jù e la energjie de tiare e va sù, yin e yang a comunichin, e compagn a fasin ducj i vivents.
Co che i umign savis a stan intai puescj publics ad alt, i puars umign intal spirt a van vie; cheste e je la Vie dal cîl e de tiare.”

Mandi a ducj !!!

#peaceandlove ☮ 💙 ☯

Mont Matajur

. . . la prime nêf di Dicembar

Profitant di une biele zornade soreglade o soi lât a fâ une cjaminade su la mont Matajur tant par sierâ in bielece chest an 2022 tacât propit il prin dal an cuntune cjaminade su cheste biele mont furlane… lì dal parcament dongje dal ripâr Pelizzo il panorame su la plane furlane al jere maraveôs e il soreli al slusive sul mâr… rivât in cime o ai cjatât tancj nui, une biele buerate e a tacavin a vignî jù dai biei flocs di nêf… al someave di jessi intune flabe di Andersen… cussì o soi tornât indaûr cun tante gjonde intal cûr sintint dentri une grande calme… inalore sperìn di podê tornâ sul Matajur biel prest…

Buinis cjaminadis a ducj… Mandi!

. . .cjale il filmut 🎥

☮ − ☯ − ☵ − ☸ − 🌍

Mont Glemine

e i piçui zupets che a cjapin il soreli dilunc dal troi . . .

Daspò vê parcade la machine insom de vie Sottomonte a Glemone si cjape la vie mont Glemine indulà si cjate il biel lavadôr di pôc timp fat sù come ch’al jere une volte e cjalant ad alt si viôt come un puint in piere parsore de galarie e chel cuant ch’al plûf e je la pissande dal Glemine, pôc plui indenat cjalait ben a cjampe par cjoli il troi ch’al va sù dongje de galarie e di lì lait par la strade turistiche e dopo 100 m al tache il troi CAI 716 ch’al puarte sul Cuarnan… rivâts ad une crosere si cjate la tabele par lâ sul Glemine… di chì indenant il troi al è un spetacul par vie dal panorane che nus lasse gjoldi sul Tiliment, su Glemone, su la mont Brancot e v.i. di plui in cheste zornade maraveose cuntun cîl celest cence nancje un nûl e un soreli ch’al scjaldave ben si podevin viodi a svolâ chei cun il “parapendio”… rivâts li de anconute faseit atenzion, stant che nol è segnalât ben, a cjapâ il troi che si cjate daûr de anconute e di lì in dîs minûts si rive in cime dal Glemine ( 721 m )… indulà che si cjate une biele crôs fate cun dai tubos taronts… di chì si puedin viodi il Cuarnan, il Cjampon, il Simeon e v i. insome une zornade bielonone par lâ a fâ une cjaminade par la mont furlane…

Buinis cjaminadis a ducj… mandi

:: peace ::

Monte Glemina
Monte Glemina – 721 m – Friuli

Mont Paulâr

e i lichens limon vert

Parcade la machine intal grant parcament lì de malghe Pramôs si cjape la strade par lâ al ripâr Fabiani e daspò plui o mancul 210 m si svolte a drete cjapant il troi, ben segnât, CAI 404 che nus puartarà fin cuasi in cime… rivâts parsore ad un plan il troi al tache a lâ di ribe jù prime di tornâ a lâ sù dilunc il lât Nord de mont… chest toc al è facil di fâ ma o crôt ch’al sedi ancje il plui pericolôs stant che al è di flanc a une cleve che e à slacs… po dopo il troi al tache di gnûf a lâ di ribe sù dilunc il lât Nord e al è dut in ombrene e al presente cualchi toc un tic inclinât e cun la crete ch’e salte fûr e indulà bisugne vê un pas sigûr… chì o ai cjatât int cun la mountain bike… cetant bulos… pôc prime di rivâ in cime, a cjampe, si viôt un lât ma nol è chel di Dimon… lant indenant si svolte a drete par il CAI 405 e si rive in pôc timp in cime… vuê il cîl al jere une maravee e si podevin viodi in lontanance dutis lis Dolomiti e plui dongje lis alps de Cjargne… un spetacul maraveôs… lâ e tornâ a son ~10 Km cuntun D+ 600 m…

Monte Paularo – movie

Buinis cjaminadis a ducj !!!

Jôf di Sompdogne

la cime cenglade dai baranclis di mont

Da Dogne una biele strade e puarte a Sele Sompdogne e rivâts achì si cjape il troi CAI 610 ch’al tache a drete subite dopo il parcament… a son dai piçui scjalins di len e di lì si va di ribe sû inte biele boschete di peçs che cumò a tachin a pierdi lis risclis… e vuê l’aiar lis faseve svolâ tant che flocs di nêf cuvierzint il troi cuntune biele baradure di colôr maron clâr… ma biel prest la cleve e devente fuarte e il troi plen di claps e cussì al va indenant fin insom cun dome cualchi toc indulà che al splane… rivâts fûr de boschete si tache a lâ sù par la crete cence masse fadure, gjoldint dal biel panorame su lis monts dongje… soredut sul Montâs, ancje se vuê la cime e jere cuasi simpri scuindude dai nui birichins che a zuiavin a corisi daûr… rivât in cime, 1889 m, o ai cjatât une biele crôs grandonone plene di stickers… e subite cualchi biel merlot al è vignût dongje… i nui a scuindevin cuasi dutis lis cimis tor ator ma no chês a Est tant bielis, il Nabois grande e la Spalla del Nabois… il disnivel fat al è stât di 500 m e par lâ sù e tornâ jù a son di fâ plui o mancul 5 km …

Buinis cjaminadis a ducj… mandi!!!

Jenfri mâr e Carso

z morje na Krasu

Une biele cjaminade jenfri mâr e Cjars dilunc il Troi de Salvie partint di Aurisina e rivant a Sante Crôs indulà che si cjate, in vie dal Pucino, la biele crete par lâ a rimpinâsi…


…Cjalait il filmut… (video)


Buinis cjaminadis a ducj… mandi !!!
🙋