La Fai marathon ator par Cividât . . .
Dal bielvedê sul Nadison, in Borc di Puint a Cividât, la viste e je cetant biele, rivant a viodi il flum Nadison, il Puint dal Diaul e Borc Brossane, ven a stai il borc medievâl indulà che al è logât il Munistîr di S. Marie in Val cun il Tempiut dai Langobarts. . . domenie passade, 13 Otubar 2013, la maratone dal FAI e partive propit chenti par un zîr ator de citât par viodi i palaçs cun i lôr zardins cetant sflandorôs, lis muris antighis e altris bielecis . . .
Palaç Paciani , in vie S. Lazzaro, al jere la prime tape ( fotos 16 – 39 ). . . il palaç non è tant ben mantignût e di plui al è dividût in dôs proprietâts ma il zardin cun il bielvedê sul Nadison e sul centri S. Francesc al merete une visite. . . dongje dal palaç si cjatin lis muris di Cividât indulà che al è ancjemò ben visibil il fossâl e indulà che a son stadis fatis lis rievocazions storichis ( fotos 40 – 44 ). . .
daspò cjaminant dilunc vie S.Lazzaro o sin rivâts ae biele glesiute di S. Giorgio in Vado (fotos 49 – 77 ) che e va indaûr ai prins agns dal XIII secul e che e faseve part di un antîc munistîr di muiniis agostinianis. . . intal 1432 la badesse Antonie di Mugle scugnì bandonâ il munistîr. . . la storie de so partence e je une vore misteriose, cun di fat la badesse e jere restade di bessole cuntune fantate che la judave e cheste robe no plaseve ae glesie di Cividât ancje parcè che si contavin des storiis no tant bielis intor di chel che al capitave dentri des muris dal munistîr. . .
bisugne savê che in chê volte il puest al jere un lûc di passaç obleât par chei che a rivavin tart la gnot e no podevin jentrâ in citât, stant che lis puartis a vignivin sieradis aes dôs, e rivavant cui cjars e no podint passâ dilunc il puint dal Diaul, che e jere un piçul passaç di len, a scugnivin passâ par il vât, par la cuâl tante int si fermave al munistîr e la gnot e jere lungje . . . e cuissà ce che al capitave e soredut cuissà cetancj peteçs che si contavin. . .
come se nol fos avonde il munistîr e veve il pro dai cavalîrs teutonics che a passavin simpri a cjatâle e la badesse ur dave la . . . benedizion . . . alore il Cjapitul di Cividât al ordene ae badesse di bandonâ il munistîr ma jê no ur scoltave, alore e ven clamât in cause il Patriarçât di Acuilee che i ordene di lâ vie ma ancje cheste volte jê e fâs il cuc, alore e ven clamât in cause il pape che dome cun la seconde bole papâl e rive a parale vie ma la munie e rive ad otignî di lâ intal munistîr di Cividât. . . un finâl che no crôt e vedi fat tant plasê a chei di Cividât che se la cjatarin in cjase tant che a volevin parale vie. . .
In ogni câs daspò des muiniis, intal 1451, a rivarin i fraris e cun di fat si cjate piturât inte glesie un biel S.Francesc. . . intai fresc de glesie, une vore ruvinâts, si cjatin ancje cetancj cavalîrs che apartignivin al ordin dai teutonics. . . . ma al è ancje piturât un cavalîr, Thomas Becket, inglês, e no si capîs cemût che al jere adun cun chei de Gjermanie. . . dongje de glesie si cjate ancje un zardin une vore curât e un ort coltivât in mût naturâl adun cuntun biel osservatori astronomic compagn di chel di Stonehenge dome che chest al dopre i lens al puest des pieris. . .
la cjaminade e va indenat dilunc il puint gnûf, e passe dacîs des muris rivant al mulin a aghe, cumò mudât in cjase dai alpins ( fotos 78 – 88), e po dopo e passe pe place S.Francesc e e rive al palaç Bonessa . . . palaç une vore biel cuntun magnific bielvedê sul Nadison e cuntune biele cjamare segrete pai amants . . . po dopo o sin lâts a viodi il puint dal Diaul (fotos 91 – 101) e par finì o sin rivâts in plaçute S. Blâs indulà che e jere la fieste des cocis. . .
Mandi a ducj !!!
Il giardino del chiostro . . .
#peaceandlove
☮ − ☯ − ☵ − ☸ − 🌍
