Bivacco Dino Brollo

Bivac Brollo

dilunc il troi dai materâs . . .

Vuê o ai fate une biele cjaminade in Alte Val Tor dilunc il troi CAI 737 che mi à  puartât sù al bivac Dino Brollo… e je stade une cjaminade impegnative par vie che il troi al tache fin di subite a tirâ sù ben e in 3.2 km si fâs un disnivel di 1014 m… di fat al è un troi une vore salvadi che al passe dongje canalons, glereons e cretis e al è in tancj puescj esponût stant che si cjamine sù dai biei curnisons e al à un passaç cence dinissune protezion che o clamarês il passaç des fantacinis tant che chel par lâ sul Cjampon… al è ancje un altri passaç delicât di ribe jù su la crete ma achì al è un fîl di fier par tignîsi… e a son ancje cetantis cretis indulà che  e tocje di rimpinâsi… ma la bielece di chest puest salvadi al ripaie di dutis lis faduris… lant sù la prime robe biele che si sint al è l’odôr dal prât cun lis rosutis bielis che a nulissin bon e dai peçs… rivâts dongje de salvadie mont Tamor si jentre intune biele boschete al ripâr dal soreli e prime di rivâ lì dal bivac a son diviers tocs di ribe jù/sù di fâ passant in mieç dai faiârs… intal ultin toc dal troi si pues gjoldi dal spetacul dal Musi tant biel… o vevi pensât di lâ sù fin ae Cime Est ma vuê lis gjambis no ziravin tant ben e rivât al bivac o ai vût miôr fermâmi a lì… intal bivac al è puest par 4 forsit 5 personis e e je une stue e un cjanton cusine… fûr dal bivac e je une taule indulà  che o ai sostât par une bocjade e par fevelâ cuntune cubie di zovins passionâts di lâ a cjaminâ ma ancje di lâ a rimpinâsi e cussì o vin fate une biele tabaiade tant che jê si gjavave une raspule cjatade inte man … la robe che mi à  colpît e je che, viôt po ce câs, no si visavin i nons par furlan di cierts puescj… dal acent mi somee che a vignivin bande dal cjâf lûc cjarsolin… chest mi à  fat un tic rifleti sul mût che nus viodin di chês bandis… po ben, amen… cussì par cheste volte la Cime Est e je lade sù pal stec ma o speri biel prest di tornâ chenti… insome une biele cjaminade par EE cic (=cjaminadôrs in curnison)… i materâs a saressin lis cretis ad alt che si viodin biel vignint di ribe jù a çampe e che a son inclinadis une di flanc a chê altre …
D+ 1150 A/R 6.4 km . . .

Buinis cjaminadis a ducj !!!

Mobte Musi
Dal bivacco Brollo vista sul Musi Cima Ovest ed Est. .

CAI737, Ciclamini – Bivacco Brollo, GPX

#peaceandlove


☮ − ☯ − ☵ − ☸ − 🌍



Questo sito gestisce tutti i dati trattati nel rispetto del Regolamento europeo noto come GDPR che riguarda il trattamento e la libera circolazione dei dati personali, inoltre utilizza i dati al solo fine di fornire i servizi richiesti. I cookie ci aiutano a fornire i nostri servizi. Utilizzando tali servizi, accetti l'utilizzo dei cookie da parte nostra. Nessun dato trattato è fornito a terze parti.
Privacy Policy OK !